ဖဲ ၁၉၇၁ နံၣ်န့ၣ် ဖံးလ့း ပတံး (Philippe Petit) မ့ၢ် ၦၤဂဲၤဒိ, ဒီးလဲၤဟးခီဂာ်ဝဲဒၣ် ပျံၤထးဘိလၢ အဘၣ်တၢ်စၢဖ့ၣ်ဆၢအီၤလၢ နီၣ်ထၢၣ်ဒ့ ကသံဒြဲၣ်သရိၣ်ဖးဒိၣ်တၢးထီတဖၣ် (Notre-Dame Cathedral) အဘၢၣ်စၢၤ, လၢ ဝ့ၢ် ဖဲရ့း(စ) (Paris) ဝံၤန့ၣ်ဒီး, အမံၤဟူသၣ်ဖျါဝဲဒၣ်န့ၣ်လီၤ. သၢနံၣ်လဲၤပူၤကွံာ်ဝံၤႇ မ့ၢ်လၢအလဲၤဟးခီဂာ်ဝဲ, လၢ ဝ့ၢ် နယူယီး (New York), တၢ်သူၣ်ထီၣ်လီၤဆီ တၢးထီၣ်သဃံာ် (Twin Towers) အဘၢၣ်စၢၤ, ခီဖျိလၢတအိၣ်ဒီးတၢ်ပျဲအဃိ, တၢ်ဖီၣ်စၢဃာ်အီၤန့ၣ်လီၤ. ဘၣ်ဆၣ်, ဖဲ ၁၉၈၇ နံၣ်န့ၣ်, ပတံး လဲၤဟးခီဂာ်တၢ်တဘျီန့ၣ် ဖျါလီၤဆီဝဲန့ၣ်လီၤ. ဝ့ၢ် ယရူၤၡလ့ၣ် ကီၢ်ခိၣ် တဲးဒံၣ် ကိလဲး (Teddy Kollek) ကွဲမုာ်အီၤအဃိႇ ပတံး ဟးခီဂာ် ပျံၤထးဘိအလိၤ, လၢဟ့နိၣ် ကစၢၢ်တြီၤ (The Hinnom Valley) အဘၢၣ်စၢၤ, ဖဲၦၤအံၣ်စရ့လးဖိ အမူးပွဲ အကတီၢ်န့ၣ်လီၤ. ဖဲတၢ်လဲၤအခၢၣ်သးတတီၤန့ၣ်, ပတံး ပျၢ်လီၤဝဲ ထိၣ်ကးက့ၣ် (ပျၢ်လီၤဝဲလၢ ထိၣ်လွံၢ်အလီၢ်) တဘ့ၣ်, ဒ်တၢ်ဃူတၢ်ဖိးအတၢ်ဃံတၢ်လၤအတၢ်ပနီၣ်န့ၣ်လီၤ. တၢ်လဲၤဟးဒုးနီၣ်တၢ် လၢအလီၤဆီ, ဒီးအလီၤဘၣ်ယိၣ်တမံၤဘၣ်ဆၣ်, မ့ၢ်ဒၣ်လၢတၢ်ဃူတၢ်ဖိးအဂီၢ်န့ၣ်လီၤ. လၢခံန့ၣ်, ပတံး စံးဝဲဒၣ်လၢႇ “ကယဲၢ်ၦၤဂီၢ်မုၢ်ခဲလၢာ် သးပ့ၤနီၣ်ကွံာ်အတၢ်လီၤဆီလိာ်သးတဖၣ် ဖဲအကတီၢ်ဖိအံၤန့ၣ်လီၤ.”

ပတံး လဲၤဟးလၢ ပျံၤထးဘိအလိၤ, လၢတၢ်လီၢ်ထီၣ်ထီအံၤ ဒုးသ့ၣ်နီၣ်က့ၤယၤ တၢ်လီၤကမၢကမၣ်အကတီၢ်ဖိအဂၤတမံၤ- ဖဲလၢကစၢ်ယ့ၣ်ၡူးအနီၢ်ခိ, ဘၣ်တၢ်ပျးထီအီၤလၢ မူခိၣ်ဒီးဟီၣ်ခိၣ်အဘၢၣ်စၢၤအကတီၢ်န့ၣ်လီၤ. ကလီး ၁:၁၉-၂ဝ န့ၣ် ပှၤတၢ်မၢဖိ စီၤပီလူး စံးဘၣ်ၦၤႇ “ဘၣ်ပၢ်အသးလၢ တၢ်လၢတၢ်ၦဲၤခဲလၢာ် ကအိၣ်ဝဲဆိးဝဲလၢအပူၤႇ ဒီးလၢအဝဲဒၣ်အဃိ ကမၤဖိးလိာ်တၢ်ခဲလၢာ်ဒီးအကစၢ်ဒၣ်ဝဲ, ဒီးမၤဃူမၤဖိးဝဲလၢ အထူၣ်စုညါအသွံၣ်အဃိ, တၢ်အိၣ်လၢ ဟီၣ်ခိၣ်မ့ၢ်ဂ့ၤ, တၢ်အိၣ်လၢ မူခိၣ်မ့ၢ်ဂ့ၤ” န့ၣ်လီၤ. အဆၢဖိ ၂၁ န့ၣ် စီၤပီလူး ကွဲးပာ်ဖျါဝဲႇ “အခီၣ်ထံးန့ၣ် သုမၤတၢ်အၢတၢ်သီသတးဒီးႇ သုမ့ၢ်ၦၤတခီဘီမုၢ်ဖိ” ဘၣ်ဆၣ်, ခဲအံၤတမ့ၢ်လၢၤဘၣ်. မ့ၢ်လၢကစၢ်ယ့ၣ်ၡူး, မ့းၡံအၤ ကစၢ်တဂၤအံၤ ဒုးအိၣ်ထီၣ်ဝဲ တၢ်ဃူတၢ်ဖိးနီၢ်နီၢ်, ခီဖျိလူလီၤဂၢ်လီၤဝဲဒၣ်အသွံၣ်လၢ ထူၣ်စုညါအလိၤအံၤန့ၣ် ဂ့ၤဒိၣ်န့ၢ်ဒံး တၢ်ဒုးနဲၣ်ကွၢ်ကီလီၤဆီ, လၢကမၤစၢၤ ဒုးအိၣ်ထီၣ် တၢ်ဃူတၢ်ဖိးအဂီၢ်န့ၣ်လီၤ. တၢ်ကဂ့ၤန့ၢ်ဒံး တၢ်လၢကစၢ် ဒုးနဲၣ်ဖျါထီၣ်တၢ် ဒ်သိးအံၤန့ၣ်, တမ့ၢ်ကအိၣ်ဝဲနီတဘျီလၢၤဘၣ်. မ့ၢ်လၢတလိၣ်လၢၤဘၣ်အဃိန့ၣ်လီၤ. ကစၢ်ယ့ၣ်ရှူး အတၢ်ဃူတၢ်ဖိးန့ၣ် မ့ၢ်တၢ်လီၤထူလီၤယိာ်န့ၣ်လီၤ.