လၢကီၢ်ခဲညၣ် (Kenyan) န့ၣ် ကဆီတဖၣ်အဂီၢ် သ့ၣ်ပှၢ်လီၢ်ပူၤဖျဲးတတီၤ, ဖဲမုၢ်နၤယိာ်အဆၢကတီၢ်န့ၣ်, ပှၤဒိးန့ၢ်တၢ်ကစီၣ်လၢ ကဆီဆံးဖိတဒု လီၤတဲာ်ဝဲလၢထံပူၤတပူၤန့ၣ်လီၤ. ပှၤမၤထူၣ်ဖျဲးတၢ်တဖု ဟဲတုၤဝဲဒၣ်ဆူ တၢ်လီၢ်ခံးသူယိာ်အကျါ တၢ်ကိးပသူလၢအလီၤသးဘၣ်ဒိအလီၢ်, ဒီးထံၣ်ဝဲဒၣ် ကဆီဖိတဒု, ဒီးအကမျိၤ ခံပူသၢပူ န့ၣ် ဘၣ်တၢ်အီၣ်ကွံာ်ဝဲလၢ ဟဲၣ်အံၤနၤ (Hyenas) ထွံၣ်မံၤတဖၣ်န့ၣ်လီၤ. ပှၤဟဲက့ၤစိာ် ကဆီဖိဆူ အဝဲသ့ၣ် အတၢ်လီၢ်တၢ်ကျဲ, ဒီးယုၢ်န့ၢ်ဝဲကဆီဖါဖိအမံၤလၢ “လီအူရိၣ်” (Long’uro), အခီပညီမ့ၢ်ဝဲ “တၢ်တမံၤမံၤလၢအဘၣ်တၢ်ဒီၣ်တဲာ်” န့ၣ်လီၤ. ကဆီဖိတဒုအံၤ အကမျိ အထီန့ၣ် အိၣ်ဝဲဒၣ်ထဲ သၢပူတပူၤဘၣ်ဆၣ်, အိၣ်ဆူၣ်ထီၣ်က့ၤ, ဒီးကဆီအဂၤတဖၣ်လၢ အအိၣ်ဆိးလၢ သ့ၣ်ပှၢ်လီၢ်ပူၤဖျဲးအပူၤန့ၣ် တူၢ်လိာ်မုာ်အီၤန့ၣ်လီၤ. ကဆီတဖၣ်န့ၣ် အိၣ်ဝဲဒီးသးအန့ဆၢၣ်သ့ၣ်ညါတၢ်, အဝဲသ့ၣ်ကဒဲကဒဲ လိၣ်ဘၣ်လိာ်အသးအဃိ, ကဆီတဖၣ် မၤစၢၤလိာ် အသးကဒဲကဒဲန့ၣ်လီၤ.

ကစၢ်ခရံာ်အနီၢ်ခိက့ၢ်ဂီၤအပူၤ, အလီၢ်အိၣ်လၢပကအံးထွဲကွၢ်ထွဲလိာ်ပသးအဂ့ၢ်န့ၣ်, စီၤပီလူး ပာ်ဖျါထီၣ်ဝဲ ဖဲ ၁ ကရံၣ်သူး ၁၂ အပူၤန့ၣ်လီၤ. မ့ၢ်လၢနီၢ်ခိက့ၢ်ဂီၤတဖၣ် လိၣ်ဘၣ်လိာ်အသးကဒဲကဒဲ, ဒ်သိးနီၣ်တဂၤကမၤတၢ် လၢအလီၢ်ဘၣ်အကျဲဘၣ်အဂီၢ်, အဆၢဖိ ၁၂-၂၆ န့ၣ် စီၤပီလူး စူးကါဟ့ၣ်ဒိဝဲ ပှၤကညီအနီၢ်ခိက့ၢ်ဂီၤန့ၣ်လီၤ. နီၣ်ခိက့ၢ်ဂီၤတမံၤဘၣ် တမံၤန့ၣ် လိၣ်ဘၣ်လိာ်အသးကဒဲကဒဲ, ဒ်သိးကပာ်ဖျါထီၣ် ကစၢ်ယွၤ အတၢ်ပညိၣ်လၢ အပှၤဂီၢ်မုၢ် ကတူၢ်လိာ်မုာ် ကယဲၢ်တၢ်ဟ့ၣ်တဖၣ်ခဲလၢာ်လၢ ပှၤကညီတဂၤဘၣ်တဂၤအပူၤန့ၣ်လီၤ. ဝံၤန့ၣ်ဒီး, တၢ်လၢအလီၤဆီတဒ်သိးလိာ်အသးအပူၤန့ၣ် တၢ်မၤဝံၤမၤကဲထီၣ် တၢ်တမံၤဃီၤဒ်လဲၣ်အဂ့ၢ်န့ၣ် စီၤပီလူး ကွဲးပာ်ဖျါထီၣ်ဝဲလၢ, “မ့မ့ၢ်ယွၤကတဲာ်ကတီၤပနီၢ်ခိ, ဒီးဟ့ၣ်အလၤကပီၤဒိၣ်လၢ တၢ်လၢအလၤကပီၤဆံးတဖၣ်န့ၣ်, ဒ်သိးတၢ်လီၤမုၢ်လီၤဖးသု တအိၣ်လၢနီၢ်အပူၤတဂ့ၤ, မ့မ့ၢ်အက့ၢ်အဂီၤ ကအံးက့ၤကွၢ်က့ၤလိာ်အသးထဲသိးထဲသိးန့ၣ်လီၤ.” (၂၄-၂၅)

ဂံၢ်ဘါစၢ်မ့ၢ်ဂ့ၤ, ဆူၣ်မ့ၢ်ဂ့ၤ, ဖျါဃံလၤမ့ၢ်ဂ့ၤ, တဖျါဃံလၤမ့ၢ်ဂ့ၤ, မ်ပကဟုကယာ်လိာ် ပသးတက့ၢ်. ဒ်ကဆီသ့ၣ်တဖၣ်အသိး, ပှၤကညီတဖၣ်စ့ၢ်ကီး လိၣ်ဘၣ်လိာ်သကိး အသးကဒဲကဒဲန့ၣ်လီၤ.