တၢ်ဆါသံသတြိာ်အဃိ, ပဘၣ်အိၣ်လီၤဖးဒီဒၣ်ယသး တဘျုးလါဝံၤ, ဖဲယလဲၤနုာ်လီၤဆူသရိာ်အပူၤန့ၣ်ဒီး, ဖဲလၢယဘၣ်လဲၤအိၣ်လီၤဖးဒီဒၣ်ပသးအကတီၢ်, တၢ်အိၣ်ဖှိၣ်ဖိလၢပတထံၣ်လိာ်ဘၣ်ပသးတဖၣ်န့ၣ် ယထံၣ်ဘၣ်အဝဲသ့ၣ်အဃိ, ယသူၣ်ဟူးသးဂဲၤယဲဒၣ်န့ၣ်လီၤ. လီၤဆီဒၣ်တၢ် ပှၤသးပှၢ်တဖၣ်, တနီၤန့ၣ်, ဒ်သိးကဒီတဒၢအသးလၢ တၢ်ဆါသံသတြိာ်အဂီၢ်, ဒီးတနီၤန့ၣ်, လၢတၢ်တဆိကမိၣ်အပူၤ, လဲၤပူၤကွံာ်တ့ၢ်ဝဲ ဟီၣ်ခိၣ်လံအဃိ, ယသ့ၣ်ညါနၢ်ပၢၢ်လၢ တၢ်အိၣ်ဖှိၣ်ဖိတနီၤ တမ့ၢ်ဟဲကတုၤဝဲဘၣ်န့ၣ်လီၤ. လၢတၢ်န့ၣ်အဃိ, ဖဲယထံၣ်ဘၣ် သးပှၢ်ဒီမိၣ်ဝၤခံဂၤ ဟဲနုာ်လီၤဆူသရိာ်ပူၤ, ဒီးဆ့ၣ်နီၤဝဲ ဖဲလီၢ်ဆ့ၣ်နီၤလၢယလီၢ်ခံ, လၢအညီနုၢ်ဆ့ၣ်နီၤဝဲန့ၣ်ဒီး, ယသူၣ်ဟူးသးဂဲၤယဲနီၢ်နီၢ်န့ၣ်လီၤ. ယဝံၢ်ဝၢ်ယစုဆူအဝဲသ့ၣ်အအိၣ်လီၤ. အဝၤန့ၣ် ဝံၢ်ဝၢ်ဆၢက့ၤယၤဘၣ်ဆၣ်, မ့မ့ၢ်အမါန့ၣ်ကွၢ်စူၢ်ယၤ, တၢ်နံၤတၢ်အ့ဒၣ်လဲာ် တပာ်ဖျါထီၣ်ဝဲဒၣ်ဘၣ်. ယသးဘၣ်ဒိ, ဒီးယဆိကမိၣ်လၢယသးပူၤ, ဘၣ်မနုၤအဃိလဲၣ်န့ၣ်လီၤ.
မုၢ်အိၣ်ဘှံးနံၤတနီၤလဲၤပူၤကွံာ်ဝံၤ, ယပာ်သူၣ်ပာ်သးယဲလၢ ပိာ်မုၣ်တဂၤဃီ, (လၢအတစံးဆၢက့ၤ ယတၢ်ဆၢဂ့ၤဆၢဝါအဝဲသ့ၣ်) န့ၣ် ဘၣ်တၢ်မၤစၢၤအီၤလၢ တံၤသကိးတဂၤ, ဒ်ပှၤလၢအအံးက့ၤကွၢ်က့ၤအီၤတဂၤအသိးန့ၣ်, ဒုးနဲၣ်အီၤလၢ ကဘၣ်ဆၢထၢၣ်ဆ့ၣ်နီၤ ဖဲလဲၣ်န့ၣ်လီၤ. ယတံၤသကိးသးပှၢ်မုၣ်, လၢအညီနုၢ်ဘါသကိးယွၤဒီးယၤတဂၤအံၤ ဖျါလၢဆါဆိးက့ဒိၣ်မးအဃိ, ကွၢ်နီၣ်တိၢ်နီၣ်ယၤတန့ၢ်လၢၤဘၣ်. ဖဲန့ၣ်အခါ, မ့ၢ်လၢယတလဲၤဆူအအိၣ်အဃိ, ဖဲယဆၢဂ့ၤဆၢဝါအီၤလၢ တၢ်သးခုသးဆူၣ်အပူၤဒၣ်လဲာ် အဝဲတစံးဆၢက့ၤယၤအခါ, ယသးတဘၣ်ဒိဘၣ်ထံးအဃိ, ယသးခုယဲဒၣ်န့ၣ်လီၤ.
တၢ်အိၣ်မူလၢတၢ်ကူၣ်သ့အဂီၢ်, လံာ်တၢ်ကတိၤဒိ ဟ့ၣ်ထီၣ် တၢ်ဟ့ၣ်ကူၣ်တဖၣ်အကျါ, ပသးအသုတဒိၣ်ကဲၤထီၣ်ညီကဒၣ်အဂီၢ် တၢ်ဟ့ၣ်ကူၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်တမံၤန့ၣ်လီၤ. နီၢ်နီၢ်န့ၣ်, ကတိၤ ၁၉:၁၁ စံးဘၣ်ပှၤ, “ပှၤကူၣ်တၢ်သ့န့ၣ်သးထီၣ်ကီ, ဒီးလဲၤကပာ်တၢ်ကမၣ်န့ၣ် မ့ၢ်အလၤကပီၤ” န့ၣ်လီၤ. အဆၢဖိ ၁၁ ပာ်ဖျါထီၣ် တၢ်ဃုထၢ ပသးအသုတကိၢ်ကဲၤထီၣ်, ဒီးတၢ်မၤလိန့ၢ် “တၢ်ပၢၤဃာ်ပတၢ်သးဒိၣ်ကိၢ်ကဲၤထီၣ်” န့ၣ် ဟဲစိာ်န့ၢ်ပှၤတၢ်လၤကပီၤသ့ဝဲန့ၣ်လီၤ. အဆၢဖိ ၈ န့ၣ် တၢ်မၤအံၤလိၣ်ဘၣ် တၢ်သူၣ်စူၤသးစူၤ, ဒီး “တၢ်ကူၣ်သ့” ဘၣ်ဆၣ်, လၢပနီၢ်ကစၢ်အလီၢ်န့ၣ် ပဃုထၢလၢပကအဲၣ်ပှၤဂၤအဂီၢ် ခိၣ်ဖးစ့ၢ်ကီး ကမ့ၢ်တၢ်လုၢ်ဒိၣ်ပှ့ၤဒိၣ်လၢပကြၢးဒိးန့ၢ်ဝဲဒၣ်န့ၣ်လီၤ.
