တၢ်ဂိၢ်ခါအဆၢကတီၢ်, လၢကီၢ်စဲၣ် မ့းခၠံၣ်ကၣ် (Michigan) အပူၤ, ဘၣ်ဖဲမုၢ်တနံၤန့ၣ်, ပှၤဟးဆှၢတၢ်ဖိတဂၤ ထံၣ် ပိာ်မုၣ်သးပှၢ်တဂၤ မၤကဆှီထီၣ်ဝဲဒၣ် ဘှ့ၣ်ပစီၤတဖၣ်လၢ အဟံၣ်ကရၢၢ်ပူၤကျဲလိၤန့ၣ်လီၤ. ပှၤဆှၢတၢ်တဂၤအံၤ ဆိကတီၢ်အသိလ့ၣ်, ဒီးဃ့ဝဲ ခွဲးယၢ်, ဒ်သိးဖံသးပှၢ်လၢအသးအိၣ်ဃိးဆံတနံၣ်တဂၤ ကပျဲအီၤလၢကမၤဝံၤတၢ်မၤလၢအမၤဝဲဒၣ်န့ၣ်လီၤ. ပိာ်မုၣ်သးပှၢ်အံၤ ဘၣ်ယိၣ်ဝဲလၢ ပှၤဆှၢတၢ်တဂၤကစဲၤခံဝဲလၢအတၢ်ဖံးတၢ်မၤအဃိ, ဟဲစိာ်ဝဲ အနီၣ်တြိာ်လၢခံတခါန့ၣ်လီၤ. အဝဲသ့ၣ်ဆၢထၢၣ် သဃဲၤ, မၤသကိး တၢ်မၤစီဘှ့ၣ်ပစီၤန့ၣ် တၢ်ဆၢကတီၢ် ကအိၣ်ဝဲတဆံယဲၢ်မံးနံး, ဒီးပှၤအိၣ်လၢခိၣ်ဃၢၤတဖၣ် ခိးကွၢ်ဝဲလၢတၢ်အယံၤန့ၣ်လီၤ. သးပှၢ်မုၣ်အံၤ စံးဘၣ်အီၤ, “နမၤစၢၤယၤအဃိ, ယစံးဘျုးဘၣ်နၤလီၤ. နမ့ၢ်ပှၤလၢ ကစၢ်ယွၤဆှၢလီၤဝဲတဂၤ” န့ၣ်လီၤ.
လူၤ ၁၀:၂၅-၃၇ ပာ်ဖျါဝဲ, ဖဲကစၢ်ယ့ၣ်ရှူး စံးကတိၤသကိးတၢ်ဒီးပှၤသ့တၢ်သိၣ်တၢ်သီတဂၤအကတီၢ်န့ၣ်, ဒုးနၢ်ပၢၢ်အါထီၣ် တၢ်အဲၣ်ပှၤလၢပဃၢၤ အတၢ်သိၣ်တၢ်ဘျၢအန့ဆၢၣ်န့ၣ်လီၤ. ဖဲ အဆၢဖိ ၂၇ န့ၣ် ကစၢ်ယ့ၣ်ရှူး စံးဘၣ်ပှၤသ့တၢ်သိၣ်တၢ်သီတဂၤ, ဒ်သိးကထုးထီၣ်ဝဲ တၢ်သိၣ်တၢ်သီ အခီပညီလၢအသ့ၣ်ညါဝဲဂ့ၤဂ့ၤန့ၣ်ဒီး, အဝဲ စံးဆၢဝဲဒၣ်, “အဲၣ်ယွၤနကစၢ် လၢနသူၣ်ကံၢ်နသးလဲ, ဒီးနသးဒီဖျၢၣ်ညါ, ဒီးနတၢ်ကူၣ်တၢ်ဆးတုၤအလၢာ်, ဒီးနဂံၢ်နဘါခဲလၢာ်တက့ၢ်,” ဒီး “အဲၣ်ပှၤလၢနဃၢၤ ဒ်နအဲၣ်လီၤနသးဒၣ်နဲတက့ၢ်” န့ၣ်လီၤ.
ဝံၤန့ၣ်ဒီး, အဆၢဖိ ၃၀-၃၅ ပာ်ဖျါဝဲလၢ ကစၢ်ယ့ၣ်ရှူး ဟ့ၣ်ခီနီၤဝဲဒၣ် ပူတယုၢ် ဘၣ်ဃးဒီးတၢ်ဘူၣ်တၢ်ဘါခိၣ်နၢ်ခံဂၤလၢ အလဲၤကပာ် ပှၤလၢတမျိးတမျာ်ဒိတီၢ်အီၤတဂၤအဂ့ၢ်န့ၣ်လီၤ. ဘၣ်ဆၣ် စိၤဆၢကတီၢ်ဖဲ ပှၤယူၤဒၤဖိခိၣ်နၢ်တဖၣ် ညီနုာ်ထံၣ်ဝဲဒံး ပှၤလၢအတကဆှီဘၣ်တဂၤ, လၢအမ့ၢ် ပှၤရှၤမရံဖိတဂၤ ဟ့ၣ်လီၤအသးလၢ ကမၤစၢၤပှၤဘၣ်ဒိဘၣ်ထံးတဂၤ, လၢအလိၣ်ဘၣ်ဝဲတၢ်မၤစၢၤန့ၣ်လီၤ. ဖဲပှၤသ့လံာ်တၢ်သိၣ်တၢ်သီ သ့ၣ်ညါနၢ်ပၢၢ်ဝဲဒၣ် ပှၤလၢအသးကညီၤ ပှၤလၢတမျိးတမျာ်ဒိတီၢ်အီၤတဂၤန့ၣ် မ့ၢ်ဒၣ် တၢ်အဲၣ်ပှၤလၢပဃၢၤ, ဒီးအဆၢဖိ ၃၆-၃၇ န့ၣ် ကစၢ်ယ့ၣ်ရှူး ဟ့ၣ်ဂံၢ်ဟ့ၣ်ဘါအီၤလၢ ကမၤဝဲဒၣ်ဒ်န့ၣ်အသိးန့ၣ်လီၤ.
ထီဘိန့ၣ်, တၢ်အဲၣ်ပှၤဂၤစံးတၢ်န့ၣ် တမ့ၢ်တၢ်အဘီၣ်အညီဘၣ်. ဘၣ်ဆၣ်, ကစၢ်ယ့ၣ်ရှူး လုၢ်ဘၢပှၤလၢအတၢ်အဲၣ်အဃိ, ဒ်ပှၤရှၤမရံဖိလၢအဂ့ၤတဂၤမၤဝဲအသိးပကအဲၣ်ပှၤလၢပဃၢၤတဖၣ်အဂီၢ်န့ၣ်, ကစၢ်ကမၤစၢၤပှၤန့ၣ်လီၤ.
