လၢ ကီၢ်စဲၣ် မ့ရံၣ်လဲၣ် (Maryland) န့ၣ် တၢ်လီၢ်တၢ်ကျဲ ပှၤကိးအီၤလၢ ရှဲၤကရံၣ် လၣ် (Shangri-La) အိၣ်ဝဲတတီၤ, ဒီး ဖဲ ၁၉၄၃ နံၣ်န့ၣ် ဘၣ်တၢ်ပှ့ၤက့ၤအီၤ, ဒီးဒုးကဲထီၣ်က့ၤ တၢ်အိၣ်ဘှံးအိၣ်ကသူၣ်အလီၢ်အကျဲ လၢအမဲရကၤကီၢ်ခိၣ် ဖရၣ်ကလ့ ဒံၣ် ရူၤစဘဲး (Franklin D. Roosevelt) အဂီၢ်န့ၣ်လီၤ. တၢ်လီၢ်အံၤအိၣ်လၢခိ, ဘှ့ၣ်ဘှီၣ်ဒီးအိၣ်ယံၤဒီးပှၤကညီတဖၣ်, ဒ်အမဲရကၤကီၢ်ခိၣ်အဟံၣ် (White House) ပှၢ်ဘျးစဲသန့ပာ်ဖျါဝဲအသိး, ဒုးအိၣ်ထီၣ် “ခွဲးယာ်လၢ တၢ်အိၣ်ပူၤဖျဲးဒီးပှၤအဂၤ, ဒီးအိၣ်မုာ်အိၣ်ပၢၤ” ဃုာ်ဒီး “မ့ၢ်တၢ်လီၢ်တတီၤလၢ ကဖံးတၢ်မၤတၢ်, ဒီးကတူၢ်လိာ်ခီၣ်ဆၢ ခိၣ်နၢ်လၢထံဂုၤကီၢ်ဂၤတဖၣ်အဂီၢ်” စ့ၢ်ကီးန့ၣ်လီၤ. ဖဲ Dwight Eisenhower ကဲထီၣ် ကီၢ်အမဲရကၤကီၢ်ခိၣ်န့ၣ်ဒီး, လၢတၢ်မၤလၤကပီၤအပၢ်, ဒီးအဖုအဂီၢ်, ယုၢ်က့ၤဝဲတၢ်လီၢ်အံၤအမံၤလၢ Camp David, ဒီးဘၣ်တၢ်စူးကါအီၤတုၤမုၢ်တနံၤအံၤန့ၣ်လီၤ. တၢ်မၤဂ့ၤအါထီၣ် တၢ်ဘံၣ်တၢ်ဘၢအတၢ်ရဲၣ်တၢ်ကျဲၤတဖၣ်ဘၣ်ဆၣ်, တၢ်လီၢ်တၢ်ကျဲ ကလူၤထီၣ်ဘး ဒ်ခ့ခါတၢ်အိၣ်အသးအဂီၢ်န့ၣ်, တၢ်သုးကျဲၤမၤဂ့ၤထီၣ်ဝဲဒၣ် တဆံးတက့ၢ်ဖိန့ၣ်လီၤ. လၢကီၢ်အမဲရကၤခိၣ်နၢ်တဖၣ်, ဒီးအဟံၣ်ဖိဃီဖိတဖၣ်အဂီၢ်, တၢ်လီၢ်အံၤမ့ၢ်ဝဲဒ်တၢ်လီၢ်တၢ်ကျဲလၢ အပှဲၤဒီးတၢ်အိၣ်သဘျ့အိၣ်ပူၤဖျဲး, ဒီးတၢ်အိၣ်ဘှံးအိၣ်သါအလီၢ်န့ၣ်လီၤ.
ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်အဂီၢ်, အိၣ်ဝဲစ့ၢ်ကီးဒီးတၢ်အိၣ်ဘှံးအိၣ်သါအလီၢ် လၢပဃုန့ၢ်တၢ်အိၣ်ဘှံးသ့ဝဲ, ဖဲဟီၣ်ခိၣ်လၢအတမုာ်တပၢၤအပူၤန့ၣ်လီၤ. စံး ၃၂:၇ အပူၤန့ၣ် စီၤပၤစီၤဒၤဝံး ကွဲးပာ်ဖျါဝဲလၢ “နဲဒၣ် (ကစၢ်ယွၤ) အံၤ နမ့ၢ်ယအိၣ်ခူသူၣ်အလီၢ်လီၤ. နကမၤပူၤဖျဲးယၤဒီးတၢ်ကိၢ်တၢ်ဂီၤ, ဒီးနကဒုးအိၣ် ဝးတရံးယၤလၢ တၢ်သးဝံၣ်ဘၣ်ဃးဒီးတၢ်မၤပူၤဖျဲးတၢ်” န့ၣ်လီၤ. စီၤဒၤဝံး သ့ၣ်ညါနီၢ်ဝဲလၢ ကစၢ်ယွၤမ့ၢ်တၢ်အိၣ်ဘံၣ်အိၣ်ဘၢအလီၢ်အကျဲအမ့ၢ်အတီ လၢအဂီၢ်န့ၣ်လီၤ.
ကစၢ်ယ့ၣ်ရှူး ကွဲမုာ်ပှၤ ဒ်သိးပကဃုထံၣ်န့ၢ် တၢ်အိၣ်ဘှံး, ဒီးတၢ်မၤသီထီၣ်က့ၤပနီၢ်ခိနီၢ်သးလၢအပူၤန့ၣ်လီၤ. မး ၁၁:၂၈-၂၉ န့ၣ် စံးဝဲဒၣ် “ပှၤလၢတၢ်ဘှံးအသး, ဒီးဝံတၢ်ယိးတၢ်ဃၢခဲလၢာ်သ့ၣ်သုဧၢ, ဟဲဆူယအိၣ်တက့ၢ်. ဒီးယကဒုးအိၣ်ဘှံးသုလီၤ. ဟံးထီၣ်ယနီၣ်ယိးဘိလၢသုလိၤ, ဒီးမၤလိတၢ်လၢယၤတက့ၢ်. အဂ့ၢ်ဒ်အံၤ, ယသးစူၤ, ဒီးယသးဆီၣ်လီၤယသးလီၤ. ဒီးသုကထံၣ်န့ၢ်တၢ်အိၣ်ဘှံးလၢသုးသးအဂီၢ်” န့ၣ်လီၤ.
ကစၢ်ယ့ၣ်ရှူး ကဲထီၣ် ပတၢ်အိၣ်ဘှံးအိၣ်သါအလီၢ်အကျဲ တဘျီဘၣ်တဘျီ, ကိးဘျီဒဲး, ဒီးကိးဆၢကတီၢ်ဒဲး သ့ဝဲဒၣ်န့ၣ်လီၤ.
