မ့ၢ်လၢအတံၤသကိးတဖၣ်,ဃုာ်ဒီးအဟံၣ်ဖိဃီဖိတဖၣ် ဃုထၢအိၣ်မူတ့ၢ်ဝဲ ကျိၤကျဲလၢ အတဖိးမံလိာ်အသးဒီးယွၤအကလုၢ်ကထါအဃိ, ဘၣ်ထွဲဒီးတၢ်ရ့လိာ်ဘၣ်ထွဲလိာ်သးဒီးအဝဲသ့ၣ်အဂီၢ်, စကီး (Scott) ဒီး ဘြံ (Bree) အသူၣ်အူသးကဲၤ, ဒီးစံးကတိၤလိာ်သးလၢ “ပကမၤတၢ်မနုၤလဲၣ်” န့ၣ်လီၤ. ဒ်အဝဲသ့ၣ်ခံဂၤ မၤလိ ကစၢ်ယွၤကလုၢ်ကထါ, ဒီးဃ့ထုကဖၣ်သကိးတၢ်န့ၣ်ဒီး, တၢ်လဲၤကျဲဆူညါန့ၣ် ဟဲအိၣ်ဖျါထီၣ်ဝဲဒၣ်န့ၣ်လီၤ. အဆိကတၢၢ်န့ၣ်, အဝဲသ့ၣ် ကမၤဆူၣ်ထီၣ်အါထီၣ် အတၢ်အဲၣ်တံၤအဲၣ်သကိး,ဃုာ်ဒီး ပှၤလၢအဝဲသ့ၣ်အဲၣ်ဘၣ်ဝဲတဖၣ်န့ၣ်လီၤ. ခံမံၤတမံၤန့ၣ်, ပှၤဂုၤပှၤဂၤအဂီၢ်, အဝဲသ့ၣ်ကဒုးနဲၣ်ပာ်ဖျါ တၢ်အမ့ၢ်အတီ, ဒီးတၢ်အဂ့ၤအဝါ, တၢ်ဂ့ၢ်သန့ၤထီၣ်အသးလၢ ယွၤအဒိဂ့ၤတဲာ်ဘၣ်န့ၣ်လီၤ. ဒီးသၢမံၤတမံၤန့ၣ်, ဒ်ယွၤကလုၢ်ကထါ အတၢ်ကူၣ်သ့အသိး, အဝဲသ့ၣ် ကရ့လိာ်ဘၣ်ထွဲလိာ်သး လၢတၢ်အဲၣ်အပူၤဒ်လဲၣ်အဂ့ၢ်န့ၣ် ဟ့ၣ်ခီနီၤဝဲဒၣ်န့ၣ်လီၤ. မ့ၢ်လၢ စကီးဒီးဘြံ မၤလဲၢ်အါထီၣ် ကစၢ်ခရံာ်အတၢ်အဲၣ်ဆူ ပှၤလၢအဘၣ်ထွဲဒီးအဝဲသ့ၣ်အဃိ, လၢတၢ်အကတီၢ် တကတီၢ်အပူၤန့ၣ်, ဒုးအိၣ်ထီၣ် တၢ်ရ့လိာ်ဘၣ်ထွဲ အတၢ်နာ်န့ၢ်လိာ်သးတဖၣ် ဒိၣ်ဒိၣ်မုၢ်မုၢ်န့ၣ်လီၤ.

ဝံဟိၤရှ့ သးအတၢ်ဆိကမိၣ် ကဒိၣ်ဝဲယိာ်ဝဲသ့ၣ်သ့ၣ်, ဘၣ်ဃးဒီးတၢ်ရ့လိာ် မၤဘၣ်ထွဲက့ၤအသးဒီးအမါ- ပိာ်မုၣ်လၢဃုထၢအကစၢ်အကျဲဒၣ်ဝဲ, လၢအတမၤလၤကပီၤယွၤမ့ၢ်ဂ့ၤ, အဝၤမ့ၢ်ဂ့ၤဘၣ်န့ၣ်လီၤ. ဟိၤ ၃:၁ န့ၣ် ကစၢ်ယွၤ စံးကတိၤနဲၣ်လိ ဝံ, “လဲၤကဒီး, အဲၣ်ပိာ်မုၣ်လၢ အတံၤသကိးအဲၣ်အီၤ, ဒီးပှၤအဲၣ်ဘၢဝၤ …” န့ၣ်လီၤ. အဆၢဖိ ၃ န့ၣ် ဝံမၤဂၢၢ်မၤကျၢၤက့ၤအတၢ်အဲၣ် လၢအမါအဂီၢ်, ဒီးတကတီၢ်ဃီန့ၣ် ဒုးနဲၣ်ဖျါထီၣ်ဝဲ တၢ်လၢအဘၣ်, ဒီးတၢ်အမ့ၢ်အတီ, လၢယွၤအပှၤဂီၢ်မုၢ်အဂီၢ်, ဒီးအတၢ်ရ့လိာ်ဘၣ်ထွဲလိာ်သးဒီးယွၤအဂ့ၢ်န့ၣ်လီၤ. ဝံအတၢ်ဘၣ်ထွဲဒီးအမါန့ၣ် မ့ၢ်တၢ်ပနီၣ်ဟ့ၣ်ဒိလၢ ကစၢ်ယွၤ အတၢ်တၤ ပှၤအံၣ်စရ့လးဖိတဖၣ်လၢ အပူထီၣ်အီၤန့ၣ်လီၤ. ပှၤဂီၢ်မုၢ် ဃုထၢကျဲလၢ အကမၣ်ဘၣ်ဆၣ်, ယွၤကတဲာ်ကတီၤ တၢ်လဲၤဆူညါအကျဲ, ဒီး ဟိၤ ၁၄:၄ အပူၤန့ၣ် ပာ်ဖျါထီၣ်ဝဲ, “ယကအဲၣ်က့ၤကွံက့ၤဒၣ်အီၤ,” (ယွၤတၢ်အဲၣ်န့ၣ် အဒူၣ်အဆၢတအိၣ်). ဘၣ်ဆၣ်, ဒ်အဆၢဖိ ၉ ပာ်ဖျါဝဲအသိး, မ့ၢ်လၢ “ယွၤအကျဲဧိၤကပူၤဧိၤန့ၣ်တီဝဲလိၤဝဲအဃိ,” ပှၤဂီၢ်မုၢ်တဖၣ် ကဘၣ်ဃုထၢယွၤအကျဲတဖၣ်န့ၣ်လီၤ.

ဒ်ယွၤဟ့ၣ်ပှၤတၢ်ကူၣ်သ့, ဒီးသးအတၢ်သ့နီၤဖးတၢ်အသိး, ပှၤလၢဃုထၢအိၣ်မူ ကျိၤကျဲလၢအတဖိးမံဒီးယွၤအကလုၢ်ကထါတဖၣ်အဂီၢ်, မ်ပကမၤလဲၢ်ထီၣ် ကစၢ်ယွၤအတၢ်အဲၣ်, ဒီးအတၢ်မ့ၢ်တၢ်တီဆူညါကွ့ၢ်ကွ့ၢ် န့ၣ်တက့ၢ်. ယွၤအတၢ်ဟ့ၣ်ဒိ ကတဲာ်ကတီၤန့ၢ်ပှၤ တၢ်လဲၤကျဲဆူညါန့ၣ်လီၤ.