ကဘီယူၤ အတၢ်လဲၤကျဲ ယဲၢ်နၣ်ရံၣ် အကတီၢ်န့ၣ် ပိာ်မုၣ်တဂၤ ဆးဝဲဆ့က့ၤလၢၤလၢ တၢ်သးဆူၣ်အပူၤန့ၣ်လီၤ. ဖဲအခွဲးခွးထးဆဲးတၢ်အဘိ, ဒီးအလုၢ်လဲၤလဲၤက့ၤက့ၤန့ၣ် အဝဲပာ်သူၣ်ပာ်သးဝဲလၢ ဖိသၣ်ယဲၢ်လါဖိတဂၤ ခိးကွၢ်စူၢ်အတၢ်ဟူးတၢ်ဂဲၤ, ဒီးအသးလီၤသပ့ၤဘၣ်အသးန့ၣ်လီၤ. လၢအသးပူၤန့ၣ် ပိာ်မုၣ်အံၤ ဆိကမိၣ်ထီၣ်ဝဲလၢ ကမၤဝံၤက့ၤဆ့လၢၤလၢ အဆဲးဝဲတဘ့ၣ်အံၤအလီၢ်န့ၣ်, ကဆဲးန့ၢ်ဝဲ ခိၣ်သလုးဖိတဖျၢၣ်လၢ ဖိသၣ်လၢ အသးစဲကွၢ်အီၤတဂၤအံၤအဂီၢ်န့ၣ်လီၤ. တၢ်ဆၢကတီၢ် အိၣ်လီၤတဲာ်တ့ၢ်ထဲ တနၣ်ရံၣ်ဧိၤအတီၢ်ပူၤန့ၣ် ပိာ်မုၣ်အံၤကဘၣ်မၤဝံၤ ခိၣ်သလုးဖိအံၤန့ၣ်လီၤ. ပိာ်မုၣ်အံၤ ဟ့ၣ်လီၤခိၣ်သလုးဖိဆူ ဖိသၣ်အမိၢ်အအိၣ်န့ၣ်ဒီး, အဟံၣ်ဖိဃီဖိတဖၣ် တူၢ်လိာ်ဝဲလၢတၢ်သူၣ်ခုသးခုအကတီၢ်, ပှၤလဲၤတၢ်ဖိအဂၤတဖၣ်န့ၣ်, နံၤကမှံထီၣ်ဝဲ, ဒီးဒဲစုဟ့ၣ်ဂံၢ်ဟ့ၣ်ဘါဝဲဒၣ်န့ၣ်လီၤ.
တၢ်ဟ့ၣ်မၤကမၢကမၣ်တၢ်တဖၣ်န့ၣ် ပှၤဒိးန့ၢ်အီၤလၢ တၢ်သးခုအပူၤတလီၢ်လီၢ်န့ၣ်လီၤ. တၢ်ဟ့ၣ်တဖၣ်အံၤ ပှၤလိၣ်ဘၣ်အီၤမ့ၢ်ဂ့ၤ, ပှၤသးလီအီၤမ့ၢ်ဂ့ၤ, ဘၣ်သ့ၣ်သ့ၣ် ပှၤဟ့ၣ်တၢ်တဖၣ် အသးအိၣ်ဒုးနဲၣ် ကစၢ်ခရံာ် အတၢ်သးကညီၤ ခီဖျိလၢတၢ်ဟ့ၣ်တဖၣ်န့ၣ်လီၤ. လၢသီတၢ်အိၣ်ဖှိၣ်အကတီၢ်, မၤ ၉:၃၆ ပာ်ဖျါဝဲလၢ နီၢ်တဘံၤသါ န့ၣ် ဘၣ်တၢ်သ့ၣ်ညါအီၤလၢ ပှၤဟ့ၣ်တၢ်ကူတၢ်သိးတဂၤ, “လၢထီၣ်ပှဲၤထီၣ်ဒီးတၢ်မၤဂ့ၤ, ဒီးတၢ်ဟ့ၣ်သးကညီ” ထီဘိန့ၣ်လီၤ. အဆၢဖိ ၃၉ စံးဘၣ်ပှၤ, ဖဲ နီၢ်တဘံၤသါ သံဝဲဒၣ်န့ၣ်ဒီး, ပှၤလၢအမၤဘျုးဝဲတဖၣ် “ဒုးနဲၣ်ဆ့ဒီးယၣ်တဖၣ်လၢ (အဝဲ)မၤဝဲ” န့ၣ်လီၤ. အဝဲသ့ၣ်အုၣ်အသးလၢ နီၢ်တဘံၤသါ အတၢ်သူၣ်ကညီၤသးကညီၤ, ဒီးအိၣ်မူမၤဘျုး အဝဲသ့ၣ်ဒ်လဲၣ်အဂ့ၢ်န့ၣ်လီၤ.
တၢ်မၤအသးလၢအလီၤသူၣ်ပိာ်သးဝးတမံၤန့ၣ် အဆၢဖိ ၄၀ ပာ်ဖျါဝဲလၢ စီၤပ့းတရူး မၤမူထီၣ်က့ၤ နီၢ်တဘံၤသါ လၢတၢ်သံ, ခီဖျိလၢ သးစီဆှံအစိကမီၤန့ၣ်လီၤ. အဆၢဖိ ၄၂ စံးဘၣ်ပှၤလၢ စီၤပ့းတရူး အတၢ်မၤန့ၣ် မၤပှဲၤဝဲတၢ်သးခုလၢ ပှၤအဲၣ်ဘၣ် နီၢ်တဘံၤသါတဖၣ်, ဒီးနဲၣ်ဆှၢပှၤဂုၤပှၤဂၤတဖၣ် ဒ်သိးကစူၢ်က့ၤနာ်က့ၤကစၢ်ခရံာ်အဂီၢ်န့ၣ်လီၤ.
ကယဲၢ်တၢ်မၤလၢ ပမၤတဖၣ်အကျါ, ပတၢ်အဲၣ်တၢ်သးကညီၤအတၢ်မၤန့ၣ် ကဲထီၣ်တၢ်အုၣ်အသးတမံၤလၢ ပသ့ၣ်နီၣ်ထီၣ်အဒိၣ်ကတၢၢ် သ့ဝဲဒၣ်န့ၣ်လီၤ. ဒ်ကစၢ်ယွၤ ကတဲာ်ကတီၤန့ၢ်ပှၤအသိး, တနံၤအံၤ, မ်ပကဟ့ၣ်ခီနီၤလီၤ တၢ်ဟ့ၣ်မၤကမၢကမၣ်တၢ်တဖၣ်ဆူ ပှၤဂုၤပှၤဂၤတဖၣ်န့ၣ်တက့ၢ်.
