ဖဲလ့ဒယၣ် ဒိးန့ၢ်ဘၣ် ဒီလၣ်တကလး ခီဖျိ ပှၤဟ့ၣ်မၤဘူၣ်တၢ် လၢတပာ်ဖျါထီၣ်အမံၤတဂၤန့ၣ် ဒီးလၢအဂီၢ်န့ၣ် အ၀ဲစူးကါဝဲ ထဲဒၣ်တဆံးတက့ၢ်ဖိန့ၣ်လီၤ. စ့လၢအိၣ်လီၤတဲာ်တ့ၢ်တဖၣ်န့ၣ် ဟ့ၣ်လီၤဝဲ ဒ်တၢ်သးအိၣ်အတၢ်ဟ့ၣ်ဆူ အပှၤမၤသကိးတၢ်တဖၣ်, ဒူၣ်ဖိထၢဖိတဖၣ်, ပှၤဘၣ်ကီဘၣ်ခဲလၢ ထံဒိၣ်လုၣ်ဘၢပှၤတဖၣ်, ဒီးဆူတၢ်ဟ့ၣ်သးကညီၤကရၢတဖၣ်န့ၣ်လီၤ. စ့ဒီလၣ်တကလး, လၢအတအိၣ်ဒီးတၢ်စၢဃာ်တမံၤမံၤအံၤန့ၣ်, ဘၣ်တၢ်ဟ့ၣ်လီၤဆူ ပှၤခံကယၤအအိၣ်, ဒီးဘၣ်တၢ်မၤလိမၤကွၢ်လၢ မ့ၢ်ပှၤတဖၣ် ကမၤဆၢတၢ်ဒ်လဲၣ်န့ၣ်လီၤ. လ့ဒယၣ် တသ့ၣ်ညါဝဲလၢ အဝဲမ့ၢ် ပှၤတဂၤ, လၢပှၤခံကယၤ အကျါန့ၣ်ဘၣ်. ခီဖျိလၢ တၢ်မၤကွၢ်အံၤန့ၣ် တၢ်ထံၣ်န့ၢ်ဝဲလၢ တၢ်ဟ့ၣ်သၢပူခံပူန့ၣ် လ့ဒယၣ် ဟ့ၣ်မၤဘူၣ်က့ၤဝဲဆူ ပှၤဂၤန့ၣ်လီၤ.

လၢတၢ်ဟ့ၣ်နီၤတၢ်ဂ့ၢ်တၢ်ကျိၤအံၤန့ၣ်, ထံၣ်.အံ.ဒံၢ် (TED) အတၢ်ကရၢကရိလၢ အတကွၢ်တၢ်အဘျုးအဖှိၣ်တဖုအခိၣ်, ခရ့း(စ) ဟဲဒၢၣ်စၢၣ် ပာ်ဖျါထီၣ်က့ၤဝဲလၢ “တၢ်အစၢဖျါထီၣ်ဝဲလၢ… ဒ်သိးပကမၤဆၢက့ၤ တၢ်ဟ့ၣ်ညီတၢ်လၢ တၢ်ဟ့ၣ်ညီက့ၤတၢ်အဂီၢ်, ပဝဲပှၤကညီတဖၣ်အံၤ ဘၣ်တၢ်ပာ်ဖှိၣ်ဘျးစၢပှၤန့ၣ်လီၤ.”

လံာ်စီဆှံအပူၤန့ၣ် ပကထံၣ်ဘၣ် ဖဲလၢပှၤကညီတဖၣ် မ့ၢ်အိၣ်မူအိၣ်ဂဲၤဝဲလၢတၢ်ဟ့ၣ်တၢ်သးအိၣ်န့ၣ်ဒီး, မ့ၢ်ဒၣ်အဝဲသ့ၣ် အိၣ်မူဆဲးကပီၤဖျါထီၣ် ကစၢ်ယွၤအသး, ယွၤလၢအတ့လီၤအဝဲသ့ၣ်န့ၣ်လီၤ. ယွၤမ့ၢ်ကစၢ် လၢအသးအိၣ်ဟ့ၣ်ညီတၢ်, သူၣ်ကညီၤသးကညီၤတၢ်, ဒီးသူၣ်အိၣ်သးအိၣ်တၢ်န့ၣ် တမ့ၢ်ဝဲဒၣ်ထဲလၢ ပှၤတနီၤအဂီၢ်ဧိၤန့ၣ်ဘၣ်. မ့မ့ၢ်လၢပှၤကိးဂၤဒဲးအဂီၢ်, “ပှၤလၢအတသ့ၣ်ညါဘၣ်တၢ်ဘျုးဘၣ်, ဒီးပှၤအအၢအသီဖိ” ဒၣ်လဲာ်န့ၣ်လီၤ. လၢတၢ်န့ၣ်အဃိ, ကစၢ်ယ့ၣ်ရှူး သိၣ်လိနဲၣ်လိဝဲဒၣ် ပှၤလၢအသးဆၢန့ၢ် အိၣ်မူဆဲးကပီၤဖျါထီၣ်က့ၤ ကစၢ်ယွၤ အက့ၢ်ဂီၤသူးသ့ၣ်ကံၢ်စီလၢ ကဘၣ်အဲၣ်, ကဘၣ်မၤဂ့ၤမၤစၢၤပှၤဂုၤပှၤဂၤ, ဒီးဒုၣ်ဒါဒၣ်လဲာ် ကဘၣ်ဟ့ၣ်ဒုးလိၢ်ဝဲ,ဒီး “သုတမုၢ်လၢ်ဘၣ်လၢ သုကဒိးန့ၢ်က့ၤတၢ်နီတမံၤဘၣ်” န့ၣ်လီၤ(၃၂-၃၅).

ဖဲပဟ့ၣ်တၢ်လၢ တၢ်တမုၢ်လၢ်ဒိးန့ၢ်ဘၣ်က့ၤတၢ်န့ၣ်ဒီး, ပကထံၣ်ဘၣ်လၢ တၢ်အိၣ်မူဒ်သိးအံၤန့ၣ် တမၤဘၣ်ဒိဆါပှၤဘၣ်န့ၣ်လီၤ. တၢ်ဂ့ၢ်အံၤ ကစၢ်ယ့ၣ်ရှူး ဒုးနဲၣ်စ့ၢ်ကီးဝဲ, ဒီးလၢအဆၢဖိ ၃၈ န့ၣ် စံးဝဲဒၣ်, “ဟ့ၣ်တၢ်တက့ၢ်, ဒီးတၢ်ကဟ့ၣ်တၢ်လၢသုလီၤ… ဒ်သုဃီၣ်ဟ့ၣ် တၢ်အသိးန့ၣ်, တၢ်ကဃီၣ်ဟ့ၣ်က့ၤတၢ်လၢသု” န့ၣ်လီၤ. ဖဲပမၤဆၢက့ၤ ယွၤအတၢ်အဲၣ်ဟ့ၣ်ညီတၢ်, ခီဖျိလၢပအဲၣ်ဟ့ၣ်ညီတၢ်န့ၣ်ဒီး, ပကထံၣ်ဘၣ် ပတၢ်အိၣ်မူ ထူးတီၤထီၣ်ဝဲလၢကျိၤကျဲအါဘိန့ၣ်လီၤ.