ဖဲကီၢ်စွံးဒဲၢ် (Sweden) န့ၣ် တၢ်ကတိၤ “ဒူစတဲးန့” (dostadning) အိၣ်ဝဲတဖျၢၣ်, ဒီးအခီပညီလိၤလိၤန့ၣ် မ့ၢ်ဝဲ “တၢ်သံဒီးတၢ်မၤကဆှီတၢ်” န့ၣ်လီၤ. တၢ်ထံၣ်တမံၤအံၤ, အဲၣ်ဒိးစံးဝဲလၢ ဒ်ပသးပှၢ်ထီၣ်အကတီၢ်, ပကြၢးဆိကတီၢ် တၢ်ပာ်ဖှိၣ်ဟံးဃာ် ပိးလီတဖၣ်, ဒီးစးထီၣ် မၤစှၤလီၤ တၢ်ဖိတၢ်လံၤတဖၣ် လၢပတၢ်အိၣ်မူဒီစိၤ တၢ်လၢပထၢဖှိၣ်ပာ်ဖှိၣ်တ့ၢ်အီၤတဖၣ်န့ၣ်လီၤ. ပှၤစွံဒ့း(ၡ)ဖိတဖၣ်အဂီၢ်, “တၢ်သံဒီးတၢ်မၤကဆှီတၢ်” စံးတၢ်နီၢ်နီၢ်န့ၣ်, မ့ၢ်တၢ်အဲၣ်အတၢ်ဟ့ၣ်, ဒီးအတၢ်ပညိၣ်မ့ၢ်ဝဲ, ဖဲအလဲၤပူၤကွံာ် ဟီၣ်ခိၣ်ဝံၤန့ၣ်ဒီး, မၤဘီၣ်မၤညီထီၣ်ဝဲဒၣ် ဖိလံၤတဖၣ်, ဒီးပတံၤသကိးတဖၣ်အဂီၢ်န့ၣ်လီၤ. ဒ်သိး ဒီးဖိလံၤတဖၣ်, ဒီးတံၤသကိးတဖၣ် ကရဲၣ်ကျဲၤ တၢ်လၢပှၤသံတဖၣ် ပာ်လီၤတဲာ်တ့ၢ်တဖၣ် ကညီဝဲအဂီၢ်န့ၣ်လီၤ.
ဒ်ပမ့ၢ် ပှၤစူၢ်က့ၤနာ်က့ၤ ကစၢ်ယ့ၣ်ရှူးသ့ၣ်တဖၣ်အသိး, ဖဲပသးအနံၣ်အလါတုၤဃီၤဝဲ အကတီၢ်တကတီၢ်န့ၣ်, ပဆိကမိၣ်ထီၣ် တၢ်ဟ့ၣ်သါအဂ့ၢ်- တၢ်လၢအဒုးမူဒုးဂဲၤပှၤန့ၣ်လီၤ. ဖဲပစံးကတိၤ တၢ်ဟ့ၣ်သါအဂ့ၢ်န့ၣ်ဒီး, အါတက့ၢ်န့ၣ်. ပထံၣ်ဒၣ် ကျိာ်စ့, တၢ်န့ၢ်သါ, မ့တမ့ၢ် တၢ်အဲၣ်အတၢ်ဟ့ၣ်မၤစၢၤတၢ်တဖၣ် ဘၣ်ဆၣ်, ပကဘၣ်စံးကတိၤ တၢ်ဟ့ၣ်သါအဂ့ၢ် အိၣ်ဝဲအါမးန့ၣ်လီၤ. ပမ့ၢ်ကွၢ် ကစၢ်ယ့ၣ်ရှူး အတၢ်အိၣ်မူ လၢခံကတၢၢ်, ဒီးအပျၢ်အဘီၣ်တဖၣ်အဂ့ၢ်န့ၣ် ကကဲဘျုးဝဲသ့ၣ်သ့ၣ်- လၢ ယိၤ ၁၃:၃၆ န့ၣ် စံးဘၣ် စီၤပ့းတရူးလၢ, “မ့ၢ်ယကလဲၤဆူလဲၣ်ဆူလဲၣ်န့ၣ် ခဲကနံၣ်အံၤ နပိာ်ယခံတသ့ဘၣ်, ဆူညါနကပိာ် ယခံလီၤ” န့ၣ်လီၤ. အဆၢဖိ ၃၄-၃၅ န့ၣ် ကစၢ်ယ့ၣ်ရှူး စူးကါဝဲ တၢ်ကတိၤ “တၢ်အဲၣ်” လွံၢ်ဘျီ, ဒီးကစၢ်ယ့ၣ်ရှူး အတၢ်ဟ့ၣ်သါန့ၣ် မ့ၢ်ဝဲ “တၢ်အဲၣ်” န့ၣ်လီၤ. အဆၢဖိ ၃၄ န့ၣ် စံးဘၣ်အပျဲၢ်တဖၣ်လၢ, “ဒ်သိးသုကအဲၣ်လိာ်ကွံလိာ်သုသးသကိးသကိး ဒ်ယအဲၣ်သုအသိး” န့ၣ်လီၤ .
လၢပတၢ်အိၣ်မူတဖၣ်အပူၤန့ၣ်, ပမ့ၢ်မၤ “ပှၤစွံဒ့း(ၡ)ဖိတဖၣ်အတၢ်သံဒီးတၢ်ပဲာ်စီတၢ်” တနီၤ, လၢအမ့ၢ် တၢ်ပဲာ်စီကွံာ် ပိးလီတဖၣ်လၢ တကဲဘျုးလၢပဂီၢ်, ဒီး ပာ်လီၤတဲာ်တ့ၢ်ဒၣ်ထဲ တၢ်လၢအကါဒိၣ်ကတၢၢ်တဖၣ်န့ၣ်ဒီး, ကဂ့ၤဝဲဒၣ်န့ၣ်လီၤ. ဘၣ်ဆၣ်, တၢ်ဂ့ၢ်နီၢ်နီၢ်န့ၣ်, တမ့ၢ် တၢ်ဖိတၢ်လံၤတဖၣ်, မ့တမ့ၢ် ကျိာ်စ့တဖၣ်န့ၣ်ဘၣ်. တၢ်ဟ့ၣ်သါ အကါဒိၣ်ကတၢၢ် လၢနပာ်လီၤတဲာ်တ့ၢ်သ့ဝဲန့ၣ် မ့ၢ်ဒၣ်နတၢ်အဲၣ် ကစၢ်ယ့ၣ်ရှူးန့ၣ်လီၤ. ဖဲနဖိတဖၣ်, ဒီးနတံၤသကိးတဖၣ် မ့ၢ်သ့ၣ်နီၣ်ထီၣ်က့ၤနၤ ဒ်နမ့ၢ် ပှၤအဲၣ်ယ့ၣ်ရှူးတဂၤအသိးန့ၣ်ဒီး, တၢ်အံၤ ကမ့ၢ်တၢ်ဟ့ၣ်ခဲလၢာ်အကျါအဂ့ၤကတၢၢ်တမံၤန့ၣ်လီၤ. တၢ်အံၤ ကမ့ၢ်တၢ်အခီပညီအသီလၢ တၢ်ကတိၤ “ယပာ်လီၤတဲာ်တ့ၢ်” အဂီၢ်န့ၣ်လီၤ.
