ဒ်ပှၤလိၣ်ဘိထီၣ်သီတဂၤအသိး တၢ်လိၣ်ကွဲ ဒိးစက့း ဒုးနဲၣ်တၢ် (figure skating) န့ၣ်ယဘၣ်သူၣ်ဘၣ်သးဒိၣ်မးန့ၣ်လီၤ. ယသးဘၣ်ယဲလၢ တၢ်ပာ်ဖှိၣ်ဃါဃုာ်ဒွဲလၤကူၣ်သ့ဒီးတၢ်လိာ်ခိၣ်လိာ်ကွဲ ဖဲထံလီၤသကၤ အဖီခိၣ်, လၢတၢ်ဝံၢ်တရံးနီၢ်ကစၢ်ချ့ချ့, တၢ်စံၣ်ဂဲၤကလံၣ်, ဒီးတၢ်ဒုးနဲၣ်က့ၢ်ဂီၤ အကလုာ်ကလုာ်န့ၣ်လီၤ. ဖဲယကွၢ်ကီတ့ၢ် ပှၤဒိးစက့းစဲၣ်နီၤတဖၣ် ဟ့ၣ်ထီၣ်တၢ်ဒုးနဲၣ်တၢ်ဂဲၤဒိတဖၣ်ဝံၤန့ၣ်ဒီး, အကတၢၢ်န့ၣ် ယဒိးန့ၢ် ခွဲးယာ်လၢ ကလဲၤမၤလိန့ၢ် တၢ်ဒိးစက့းလၢ ပှၤမၤလိတၢ်ဖိတဖုအကျါန့ၣ်လီၤ. ယမၤလိန့ၢ် ပကဘၣ် ဒိးစက့းစံၣ်ယူၤဝဲဒၣ်ဒ်လဲၣ်, အိၣ်ကတီၢ် ဒ်လဲၣ်န့ၣ်လီၤ. ပှၤဒိးစက့းတဖၣ် အပတီၢ်ကအိၣ်ဝဲဒၣ် ဒ်လဲၣ်ဂ့ၤ, တၢ်အကါဒိၣ်ကတၢၢ်လၢကဘၣ်သ့ၣ်ညါမၤလိန့ၢ်ဝဲန့ၣ်, ပမ့ၢ်လီၤဃံၤန့ၣ်ဒီး, ပကဘၣ် ဂဲၤဆၢထၢၣ်က့ၤချ့ချ့ဒ်လဲၣ်န့ၣ်လီၤ. လၢခံကတၢၢ်, ဖဲနီၢ်တဂၤ အတၢ်မၤလိန့ၣ်, ယမၤလိန့ၢ်ဘၣ် ပကဝံၢ်တရံးပနီၢ်ကစၢ်ချ့ချ့ဒ်လဲၣ်. ပကစံၣ်ဒ်လဲၣ်ဘၣ်ဆၣ်, ထီဘိန့ၣ် ယဘၣ်သန့ၤလီၤယသးလၢ တၢ်သ့တၢ်ဘၣ် အဂံၢ်ခီၣ်ထံး, လၢအမ့ၢ် ပမ့ၢ်လီၤဃံၤန့ၣ်ဒီး, ပကဘၣ်ဂဲၤဆၢထၢၣ်ကဒါက့ၤဒ်လဲၣ်န့ၣ်လီၤ.
ဒ်သိးပကသ့ၣ်ညါ “တၢ်လီၤဃံၤ” န့ၣ် မ့ၢ်ဝဲတၢ်လဲၤခီဖျိတမံၤလီၤန့ၣ် တလိၣ်လၢ ပကဘၣ်မ့ၢ် ပှၤလိာ်တၢ်ကွဲဖိတဂၤဘၣ်. နီၢ်နီၢ်န့ၣ်, မ့ၢ်လၢပမၤတၢ်ဒဲးဘးအဃိ, (မ့) ပခီၣ်ဘၣ်တိၢ်လီၤဃံၤ ခီဖျိလၢတၢ်ကမၣ်တမံၤမံၤအဃိ, (မ့) တၢ်မၤလီၤဃံၤပှၤ, ခီဖျိလၢ တၢ်အိၣ်အသးမၤအသးလၢ ခိၣ်ဃၢၤတဖၣ် ပှဲၤလုၣ်ဘၢကွံာ်ပှၤအဃိ, ပကလီၤဃံၤသ့ၣ်သ့ၣ်န့ၣ်လီၤ. ဘၣ်သ့ၣ်သ့ၣ် ပသ့ၣ်ညါထွဲလၢ မုၣ်ကီၤလံၢ် မၤဘၣ်ဒိဆါပှၤလၢကျဲတဘိဘိအပူၤန့ၣ်လီၤ. ၂ ကရံၣ် ၄:၈-၉ ပာ်ဖျါဝဲလၢ, “တၢ်မၤအၢမၤနးပှၤဘၣ်ဆၣ်ဒီး တၢ်တလဲၤသဒၣ်ဘၣ်ပှၤဘၣ်. တၢ်မၤလီၤဃံၤပှၤဘၣ်ဆၣ်ဒီး ပတဟးဂီၤဘၣ်” န့ၣ်လီၤ. လၢတၢ်ဂ့ၢ်တမံၤမံၤအဃိ, ပဝဲကိးဂၤဒဲး ပကလီၤဃံၤ, ဒီးကလဲၤခီဖျိဘၣ် တၢ်မၤနၢၤပှၤ လၢပတၢ်အိၣ်မူအပူၤန့ၣ်လီၤ.
ဘၣ်ဆၣ်, တမ့ၢ်တၢ်အခီပညီလၢ ပကဘၣ်အိၣ်မူလၢ တၢ်မၤနၢၤပှၤ, တၢ်မၤမဲာ်ဆှးပှၤ, ဒီးတၢ်သးအုးသးဟးဂီၤအပူၤန့ၣ်ဘၣ်. ကတိၤ ၂၄:၁၅ ပာ်ဖျါဝဲလၢ ဖဲပဒုၣ်ပဒါခိးခူသူၣ်, ဒီးကျဲးစၢး ဃုမၤဟးဂီၤပှၤအကတီၢ်, ပကဘၣ်သ့ၣ်နီၣ်ထီၣ်က့ၤ ကစၢ်ယွၤဒုးတၢ်လၢပဂီၢ်, ဒီးဒ်အဆၢဖိ ၁၆ ပာ်ဖျါဝဲ, “ပှၤတီပှၤလိၤလီၤဃံၤနွံဘျီဘၣ်ဆၣ်ဒီး ကဂဲၤဆၢထၢၣ်က့ၤလီၤ” အသိး, ဒ်သိး ပကဂဲၤဆၢထၢၣ်ကဒါက့ၤအဂီၢ် ယွၤကမၤစၢၤပှၤန့ၣ်လီၤ.
ဖဲပလီၤဃံၤ (မၤတၢ်ဒဲးဘး) န့ၣ် မ်ပကဃၣ်က့ၤပသး, ပညိၣ်ကွၢ်ဃီၤ ကစၢ်ယွၤ, ဒ်သိးပကဂဲၤဆၢထၢၣ်ကဒီးအဂီၢ်, လၢအဟ့ၣ်ဂံၢ်ဟ့ၣ်ဘါပှၤတဂၤန့ၣ်လီၤ.
