ယမါဒီးယၤ ပလဲၤဒိးလ့ၣ်ယီၢ်ခီၣ်ဖိန့ၣ် ပအဲၣ်ဒိးသ့ၣ်ညါလၢ ပယီၢ်တ့ၢ်ဝဲ မံၤလာ်တဖၣ်အိၣ်ထဲလဲၣ်န့ၣ်လီၤ. လၢတၢ်န့ၣ်အဃိ, ဒ်သိးယကပှ့ၤ နီၣ်ထိၣ်တၢ်လဲၤအဂီၢ်, ယလဲၤဆူ ပှၤဆါတၢ်ပှ့ၤတၢ်အကျး, ဒီးယဟဲက့ၤစိာ် ပိးလီဖိအံၤဆူဟံၣ်န့ၣ်ဒီး, ယထံၣ်ဘၣ်လၢ တၢ်ထိၣ်ဒွး ရဲၣ်ကျဲၤတၢ်တဖၣ်န့ၣ် ကီခဲဝဲဒၣ်လၢယဂီၢ်န့ၣ်လီၤ.

ယက့ၤကဒါက့ၤဆူ ကျးလၢ ယပှ့ၤတၢ်အလီၢ်, ဒီးပှၤလၢအဆါလီၤယၤ ပိးလီၤအံၤ, ဒ်သိးပိးလီဖိအံၤ ကမၤတၢ်အဂီၢ်န့ၣ်, ရဲၣ်ကျဲၤဝဲလၢ တၢ်ဆၢကတီၢ်ဖုၣ်ကိာ်ဖိန့ၣ်လီၤ. ယထံၣ်လၢ တၢ်ရဲၣ်ကျဲၤပိးလီဖိအံၤန့ၣ် တကီတခဲဝဲဒၣ် ဒ်ယဆိကမိၣ်တ့ၢ်ဝဲအသိးန့ၣ်ဘၣ်.

လၢပတၢ်အိၣ်မူအပူၤန့ၣ် ပိးလီအသီ, ဒီးတၢ်ထံၣ်ဆိကမိၣ်အသီတဖၣ်န့ၣ် ကဖျါလၢ ပနၢ်ပၢၢ်အီၤတညီဘၣ်န့ၣ်လီၤ. တၢ်အဒိန့ၣ်, ကွၢ်ဆိကမိၣ်ထံ တၢ်အုၣ်က့ၤခီၣ်က့ၤအဂ့ၢ်တက့ၢ်. ပှၤတနီၤ ကဆိကမိၣ်ဝဲလၢ တၢ်ကဲထီၣ်ကစၢ်ယွၤအဖိန့ၣ် ကမ့ၢ်တၢ်လၢအမၤသဘံၣ်ဘုၣ်ပှၤအသးန့ၣ်လီၤ.

ဘၣ်ဆၣ်, ဖဲလံာ်မၤတၢ် ၁၆:၃၁ န့ၣ် လံာ်စီဆှံ ပာ်ဖျါထီၣ်ဝဲလၢ တၢ်ကတိၤကဆှီဒီဖိ, “စူၢ်က့ၤနာ်က့ၤ ကစၢ်ယ့ၣ်ရှူးခရံာ်တက့ၢ်. ဒီးနကတုၤလၢ တၢ်အုၣ်က့ၤခီၣ်က့ၤနဲ, ဒီးနပှၤဟံၣ်ဖိလီၤ” န့ၣ်လီၤ. တလိၣ်လၢတၢ်ကလူၤပိာ်ထွဲ တၢ်သိၣ်တၢ်ဘျၢတဖၣ်န့ၣ်ဘၣ်. တလိၣ်လၢ တၢ်ကဘှါဆှဲ တၢ်ဂ့ၢ်ခူသူၣ်တဖၣ်န့ၣ်ဘၣ်.

ရိမ့ၤ ၃:၂ စံးဘၣ်ပှၤ “ပှၤခဲလၢာ်မၤတၢ်ဒဲးဘး,” မး ၁:၂၁, ၁ ပ့း ၂:၂၄ ပာ်ဖျါဝဲလၢ ကစၢ်ယ့ၣ်ရှူး ဟဲလီၤဆူ ဟီၣ်ခိၣ်ချၢ, ဒ်သိးကအုၣ်က့ၤခီၣ်က့ၤပှၤလၢ တၢ်ဒဲးဘးအတၢ်စံၣ်ညီၣ်- တၢ်သံ, ဒီးတၢ်လၢအကမၤလီၤဖးပှၤဒီး ကစၢ်ယွၤ လီၤထူလီၤယိာ်အဂ့ၢ်န့ၣ် မ့ၢ်ဝဲဒၣ် တၢ်မ့ၢ်တၢ်တီကဆှီဒီဖိန့ၣ်လီၤ. ရိမ့ၤ ၁၀:၉ ပာ်ဖျါဝဲလၢ ကစၢ်ယ့ၣ်ရှူး ဂဲၤထၢၣ်သမူထီၣ်က့ၤလၢတၢ်သံန့ၣ်လီၤ. ဒီး ယိၤ ၃:၁၆ စံးဘၣ်ပှၤလၢ ပဘၣ်တၢ်အုၣ်က့ၤခီၣ်က့ၤပှၤလၢ နီၢ်သးအတၢ်သံဆူ တၢ်မူအထူအယိာ်, ခီဖျိလၢပစူၢ်က့ၤနာ်က့ၤ တၢ်လၢယွၤမၤဝဲလၢပဂီၢ်န့ၣ်လီၤ.

တၢ်နာ်သန့ၤ, ဒီးစူၢ်က့ၤနာ်က့ၤကစၢ်ယ့ၣ်ရှူးကဆှီဒီဖိန့ၣ် ကမ့ၢ်တၢ်အခီပညီလၢနဂီၢ်မနုၤလဲၣ်န့ၣ် ဆိကမိၣ်ကွၢ်တက့ၢ်. ဒ် ယိၤ ၁၀:၁၀ ပာ်ဖျါဝဲအသိး, ပျဲပျၢ် ကစၢ်ယ့ၣ်ရှူးဟ့ၣ်နၤ “တၢ်မူ… အါအါကလဲာ်” န့ၣ်တက့ၢ်.