ပှၤဒိးလဲဒိးသိလ့ၣ်ဒီးပှၤဂၤတဖၣ်အကျါ တဂၤန့ၣ် ပာ်ဖျါထီၣ်အတၢ်လဲၤခီဖျိ, ဒီးစံးဝဲလၢ ဖဲအဒိး သိလ့ၣ်တဘျီန့ၣ် ဘၣ်ဝံသးစူၤ ပှၤနီၣ်သိလ့ၣ်တဂၤ လၢအအီၣ်ဝဲတၤသၣ်လၢ အစိနၤတမုာ်ကတၢၢ်အဂ့ၢ်, ဒီးအတဂၤန့ၣ် ဖဲအနီၣ်သိလ့ၣ်အကတီၢ် အတၢ်ကတိၤအါလိာ်အသးဒီးအတၢ် အဲၣ်တီ, ဒီးအဂၤတဂၤန့ၣ် ကျဲးစၢးကွဲန့ၢ်အီၤလၢ ကပာ်ဖှိၣ်ဘျၢလီၤစ့ ဖဲ ဖီၣ်စံၢ် တၢ်တိာ်ကျဲပာ်ဖှိၣ်စ့ (Ponzi Scheme)န့ၣ်လီၤ. လၢတၢ်ဂ့ၢ်တမံၤစူၢ်စူၢ်အဖီခိၣ်န့ၣ် တၢ်ဟ့ၣ်တၢ်ထိၣ်နီၤဖးအပတီၢ်ဖုၣ် အလီၢ်န့ၣ်, ပှၤနီၣ်သိလ့ၣ်တဖၣ်အံၤအဂီၢ် ဟ့ၣ်ဝဲဒၣ်တၢ်ထိၣ်နီၤဖးလၢအမ့ၢ်ဆၣ်ယဲၢ်ဖျၢၣ်န့ၣ်လီၤ. အဝဲပာ်ဖျါထီၣ်,“အဝဲသ့ၣ်ကိးဂၤဒဲးန့ၣ် ဖျါလၢ အမ့ၢ်ပှၤအဂ့ၤတဖၣ်န့ၣ်လီၤ. ခီဖျိလၢယတၢ်ထိၣ်တဲာ်နီၤဖးအဖုၣ်အဃိ, ယတအဲၣ်ဒိး အဝဲသ့ၣ်ကဘၣ်တၢ်ထုးထီၣ်ကွံာ်လၢအတၢ်ဖံးတၢ်မၤ န့ၣ်ဘၣ်.” အဝဲတပာ်ဖျါထီၣ် ပှၤနီၣ်သိလ့ၣ်တဖၣ်အဂ့ၢ် တီတီလိၤလိၤန့ၣ်, မ့ၢ်ဝဲတၢ်အုၣ်သးကဘျံးကဘျၣ်န့ၣ်လီၤ.
လၢတၢ်ဂ့ၢ်အါမံၤအဃိ, ပပၢၤဃာ်ခူသူၣ် တၢ်မ့ၢ်တၢ်တီလၢ ပှၤတနီၤနီၤအလိၤန့ၣ်လီၤ. ဘၣ်ဆၣ်, ပှၤစူၢ်က့ၤနာ်က့ၤတၢ်ဖိလၢ ဝ့ၢ်အ့ဖ့းစူးတဖၣ်အဂီၢ်, ပှၤတၢ်မၢဖိ စီၤပီလူး ဟ့ၣ်ဂံၢ် ဟ့ၣ်ဘါဝဲလၢ အဝဲသ့ၣ်ကဒဲကဒဲ ကစံးကတိၤတၢ်မ့ၢ်တၢ်တီလၢ တၢ်အဲၣ်တၢ်ကွံအပူၤ, ဒ်အမ့ၢ် တၢ်ဘၣ်တ့အသီတဖၣ်လၢ ကစၢ်ခရံာ်အပူၤန့ၣ်လီၤ. ပကစံးကတိၤ တၢ်မ့ၢ်တၢ်တီအဂီၢ်န့ၣ် အလီၤအိၣ်ဝဲ ဒ် အ့းဖ့း ၄:၂၄ ပာ်ဖျါဝဲအသိး, ပကဘၣ်ဒုးအိၣ်ထီၣ် “တၢ်တီတၢ်လိၤဒီးတၢ်စီ တၢ်ဆှံ” အလုၢ်အလၢ်-တၢ်ပာ်လီၤဆီ တၢ်အိၣ်မူအိၣ်ဂဲၤလၢ ကစၢ်ခရံာ်အဂီၢ်, ဒီးဆဲးကပီၤဖျါထီၣ်က့ၤ အကျဲတဖၣ်န့ၣ်လီၤ. အဝဲသ့ၣ် ကဘၣ်ဆီတလဲကွံာ် တၢ်လီၤတၢ်ဝ့ၤဆူ တၢ်စံးကတိၤ တၢ်မ့ၢ်တၢ်တီတဂၤဒီးတဂၤ, မ့ၢ်လၢပှၤစူၢ်က့ၤနာ်က့ၤတၢ်တဖၣ်အဂီၢ် တၢ်လီၤတၢ်ဝ့ၤ မၤလီၤဖးတၢ်, ဒီးတၢ်စံးကတိၤ တၢ်မ့ၢ်တၢ်တီန့ၣ် မၤဃူမၤဖိးတၢ်န့ၣ်လီၤ. အဆၢဖိ ၂၀ န့ၣ် စီၤပီလူးကွဲးပာ်ဖျါဝဲလၢ “မၤသးဒ်န့ၣ် ဒီးကွံာ်တ့ၢ်ကွံာ် တၢ်ကတိၤကဘျံးကဘျၣ် ဒီးကတိၤလိာ်သုသးဒီးတၢ်မ့ၢ်တၢ်တီတဂၤ ဒီးတဂၤတက့ၢ်. အဂ့ၢ်ဒ်အံၤ, ပမ့ၢ်ပဂီၤသကိးပဂီၤ တဂၤဒီးတဂၤ” န့ၣ်လီၤ.
ကစၢ်ယ့ၣ်ရှူး ဟ့ၣ်စိဟ့ၣ်ကမီၤပှၤလၢတၢ်သးဒူ, ဒ်သိးပကထီဒါ တၢ်လီၤတၢ်ဝ့ၤ ဒီး တၢ်ဟ့ၣ်လိာ်သး “တၢ်ထိၣ်တဲာ်နီၤဖးကဘျံးကဘျၣ်တၢ်” တဂၤဒီးတဂၤ- တၢ်လၢအကမၤ တံာ်တာ် ပတၢ်အိၣ်ဃအိၣ်ဖိးဒီးပှၤစူၢ်က့ၤနာ်က့ၤတၢ်အဂၤတဖၣ်န့ၣ်လီၤ. ဒ်အဝဲနဲၣ်ပှၤအသိး, တၢ်အိၣ်မူ တၢ်အဲၣ်အတၢ်အိၣ်မူန့ၣ် အဆၢဖိ ၃၂ ပာ်ဖျါဝဲလၢ ကနဲၣ်ဆှၢပှၤဆူ တၢ်ဟ့ၣ်ခီဟ့ၣ်နီၤ “တၢ်ဝံသးစူၤလိာ်သး, တၢ်သူၣ်ကညီၤသးကညီၤလိာ်သး” လၢအပာ်ဖျါထီၣ်တၢ်မ့ၢ်တၢ်တီ န့ၣ်လီၤ.
