အါနံၣ်အါလါအတီၢ်ပူၤန့ၣ်, အံၣ်ဘၢ (Evan) ဘၣ်ဂုာ်ဂဲၤလိာ်အသးဒီးအတၢ်သးစဲထီတၢ်မူတၢ်ဘှိး, တၢ်လၢအထုးယံၤအီၤလၢ အတၢ်ရ့လိာ်ဘၣ်ထွဲလိာ်သးဒီးကစၢ်ယွၤန့ၣ်လီၤ. “မ့ၢ်ယကကြၢးဒီး ယွၤအတၢ်အဲၣ်ကသ့ဝဲဒ်လဲၣ်” န့ၣ် မ့ၢ်တၢ်လၢအဆိကမိၣ်ထီၣ်ဝဲဒၣ်န့ၣ်လီၤ. လၢတၢ်န့ၣ်အဃိ, ဖဲအလဲၤထီၣ်ဘါယွၤလၢသရိာ်တဘျီလၢ်လၢ်န့ၣ်, အသးကလၢၢ်ဘၣ်ဝဲလၢ တြီၤလာ်ဖးဒိၣ်လၢ ပှၤပိာ်တိၤတသ့တမံၤန့ၣ် မၤလီၤဖးအီၤဒီးယွၤန့ၣ်လီၤ.
ဘၣ်ဆၣ်, ဖဲ အံၣ်ဘၢ (Evan) ဃ့ထုကဖၣ်ဝဲတဘျီလၢ်လၢ် လၢတၢ်သူၣ်ဆူၣ်သးဆူၣ်အပူၤန့ၣ်ဒီး, ယွၤဟ့ၣ်အီၤတၢ်စံးဆၢန့ၣ်လီၤ. ဖဲအဘၣ်ကီဘၣ်ခဲဝဲအကတီၢ်န့ၣ် ကစၢ်ယွၤဆှၢလီၤ ပှၤလၢအကဟ့ၣ်ဂံၢ်ဟ့ၣ်ဘါအီၤ, ဒီးကမၤမုာ်ထီၣ်က့ၤအီၤအဂီၢ်န့ၣ်လီၤ. နံၣ်တဖၣ်လဲၤပူၤကွံာ်ဝံၤန့ၣ်ဒီး, အံၣ်ဘၢ သ့ၣ်ညါနၢ်ပၢၢ်ဝဲလၢ ယွၤလူၤပိာ်အခံတပယူာ်ဃီ, ဒီးဒုးနဲၣ်အီၤလၢ ယွၤအဲၣ်အီၤ, ကဟုကယာ်အီၤထီဘိန့ၣ်လီၤ. စးထီၣ်ဖဲန့ၣ်, အဝဲစူၢ်က့ၤနာ်က့ၤ ကစၢ်ယွၤ အတၢ်ပျၢ်ကပာ်တၢ်ဒဲးဘး, ဒီးယွၤအတၢ်အဲၣ်န့ၣ်လီၤ. အံၣ်ဘၢ ပာ်ဖျါထီၣ်ဝဲလၢ “ခဲကနံၣ်အံၤ, ယဘၣ်ဂဲၤလိာ်ဒံးဝဲလၢ တၢ်သးစဲထီကသံၣ်မူၤဘှီးအဖၢမုၢ်ဒၣ်လဲာ်န့ၣ် ယသ့ၣ်ညါယဲလၢ ယဘၣ်တၢ်ပျၢ်ကပာ် ယတၢ်ဒဲးဘး, ဒီးပျဲပျၢ် ကစၢ်ယွၤ ကထုးဘူးက့ၤယၤဆူအအိၣ်သ့ဝဲဒၣ်န့ၣ်လီၤ,”
ယဃ့စက့လး ၃၄:၁၁-၁၆ ဒုးသ့ၣ်ညါပှၤ ကစၢ်ယွၤလၢအလူၤပိာ်အပှၤကလုာ်အခံတဂၤအဂ့ၢ်န့ၣ်လီၤ. အဆၢဖိ ၁၁ န့ၣ် ယွၤစံးဝဲဒၣ်, “ယဲဒၣ်အံၤ ယၤဒၣ်လဲာ်, ယကဃုယသိတဖု, ဒီးယချုးအီၤ,” ဒီးအၢၣ်လီၤအီလီၤဝဲလၢ ကအုၣ်က့ၤခီၣ်က့ၤ, ဒီးကဟ့ၣ်မၤစၢၤဝဲ အပှၤဂီၢ်မုၢ် အါအါဂီၢ်ဂီၢ်န့ၣ်လီၤ. အဆၢဖိ ၁-၆ ပာ်ဖျါဝဲလၢ တၢ်ဂ့ၢ်အံၤကမၤအသး, ဖဲလၢပှၤကညီခိၣ်နၢ်တဖၣ် စူးကွံာ်ညိကွံာ် ယွၤအပှၤဂီၢ်မုၢ်တဖၣ်, ဒီးယွၤအပှၤဂီၢ်မုၢ် အနီၢ်ကစၢ်ဒၣ်ဝဲ မ့ၢ်တဒိကနၣ်ဝဲ အပှၤကွၢ်သိနီၢ်နီၢ်တဂၤအကတီၢ်န့ၣ်လီၤ. တၢ်အိၣ်သးတဖၣ်အဃိ, မ့တမ့ၢ် ပဘၣ်ဂဲၤလိာ်ဝဲဒီး တၢ်လၢအပိာ်ထွဲထီၣ်အသးတဖၣ် ခီဖျိလၢပတၢ်ဒဲးဘးအဃိမ့ၢ်ဂ့ၤ, ဖဲပတၢ်မုၢ်လၢ် လီၤမၢ်ဝဲအကတီၢ်, ကစၢ်ယွၤ လူၤပိာ်ထွဲဝဲပခံ, လၢတၢ်အဲၣ်အပူၤန့ၣ်လီၤ. လၢတၢ်အဲၣ်တၢ်သူၣ်ကညီၤသးကညီၤန့ၣ်, ကစၢ်ယွၤထုးက့ၤပှၤဆူအအိၣ်န့ၣ်လီၤ. နမ့ၢ် သးပ့ၤနီၣ် ကစၢ်ယွၤန့ၣ်ဒီး, ဃာ်က့ၤနသးဆူ အအိၣ်န့ၣ်တက့ၢ်. ဝံၤန့ၣ်ဒီး, ဒ်ကစၢ်ယွၤနဲၣ်ဆှၢနၤအသိး, လဲၤတၢ်ဒီးအီၤ ကိးနံၤဒဲးန့ၣ်တက့ၢ်.
