ဖဲ ကၠိ (Joan) ထံၣ်ဝဲဒၣ် စူစၣ် (Susan) တီၣ်ထီၣ်ဝဲ အတၢ်ဂီၤတဖၣ် လၢတၢ်ရ့လိာ်ဘၣ်ထွဲ ကမျၢၢ်တၢ်ကစီၣ် (Social Media) န့ၣ်ဒီး, ကအုကစွါဝဲန့ၣ်လီၤ. တၢ်ဂီၤအံၤပာ်ဖျါဝဲဒၣ်တံၤသကိးလၢတၢ်ဘါသရိာ် အဂၤ (၁၀) န့ၣ် ဆ့ၣ်နီၤဝဲလၢတၢ်အီၣ်ကျးအပူၤ, ဒီးအမဲာ်သၣ်တဖၣ်န့ၣ် အိၣ်ပှဲၤဝဲဒီးတၢ်နံၤကမှံၤန့ၣ်လီၤ. တလါအံၤအတီၢ်ပူၤန့ၣ် အဝဲသ့ၣ်ထံၣ်လိာ်ရ့လိာ်အသးခံဘျီ တဘျီဘၣ်ဆၣ်, အဝဲသ့ၣ်တကိးဝဲဒၣ် ကၠိ ဘၣ်န့ၣ်လီၤ. ကၠိ ထွါကွံာ်ဝဲဒၣ် အမဲာ်ထံတဖၣ်န့ၣ်လီၤ. အဝဲတအိၣ်ဃူအိၣ်ဖိးလိာ်သးဒီးပှၤဂၤန့ၣ်ဘၣ်. တၢ်ဘူၣ်သကိးဘါသကိးတၢ်ဒီးပှၤလၢ အတကနၣ်ပှၤလၢတၢ်ဘါသရိာ်တဖျၢၣ်ဃီအပူၤန့ၣ် ကမ့ၢ်ဝဲလၢ တၢ်တညီနုာ်မၤအသးန့ၣ်လီၤ.
နံၣ်ကယၤတၢ အကတီၢ်စ့ၢ်ကီး တၢ်မၤအသးဒ်သိးအံၤဘၣ်ဆၣ်, ကစၢ်ယ့ၣ်ရှူးအသးအိၣ်ဝဲ တၢ်ဃူတၢ်ဖိး, ဒီးဟဲယါဘျါက့ၤ ပတၢ်လီၤမုာ်လီၤဖးန့ၣ်လီၤ. လၢတၢ်အိၣ်ဖှိၣ်စးထီၣ်ဝဲ အကတီၢ်လံလံန့ၣ်, ပှၤလၢအတဘၣ်လိာ်ဖိးဒ့လိာ်သးကဒဲကဒဲတဖၣ် ဃုထံၣ်န့ၢ်ဝဲ တၢ်ဃူ တၢ်ဖိး လၢကစၢ်ခရံာ်အပူၤန့ၣ်လီၤ. မ့ၢ်လၢပှၤတခီဘီမုၢ်ဖိလၢ အစူၢ်က့ၤနာ်က့ၤကစၢ်ခရံာ်တဖၣ် တလူၤပိာ်ထွဲ ယူဒၤအလုၢ်အလၢ်အဃိ, ပှၤယူဒၤဖိ ထံၣ်ဆံးဝဲ ပှၤကလုာ်အဂၤ, ပှၤတခီဘီမုၢ်တဖၣ်စ့ၢ်ကီး အသးဟ့ဝဲ ပှၤယူဒၤဖိတဖၣ်, ခီဖျိလၢအဝဲသ့ၣ်ထံၣ်လီၤအသး, ဒ်အမ့ၢ် ပှၤလၢအဂ့ၤန့ၢ် ပှၤကလုာ်အဂၤတဖၣ်အဃိန့ၣ်လီၤ. လၢတၢ်န့ၣ်အဃိ, အ့း ၂:၁၄-၁၅ ပာ်ဖျါဝဲလၢ ကစၢ်ယ့ၣ်ရှူးမ့ၢ် “ပှၤလၢအမၤက့ၤပှၤခံဖုတဖုဃီ, ဒီးမၤလီၤပှီၢ်ကွံာ်တၢ်ခိၣ်ဒူ အိၣ်လၢ ပဘၢၣ်စၢၤ, ဒီးလၢအဖံးအညၣ်အပူၤ မၤဟးဂီၤတၢ်ထီဒုၣ်ထီဒါ, ဒ်ပစံးတၢ်အသိး, တၢ်သိၣ်တၢ်သီဘၣ်ဃးဒီးတၢ်မၤလိာ်လၢတၢ်အသနိ” န့ၣ်လီၤ. တၢ်အိၣ်မူထွဲတၢ်သိၣ်တၢ်သီန့ၣ် တမ့ၢ်တၢ်အကါဒိၣ်လၢၤဘၣ်, တၢ်လၢအကါဒိၣ်န့ၣ် မ့ၢ်ဒၣ် ကစၢ်ယ့ၣ်ရှူးန့ၣ်လီၤ. ပှၤယူၤဒၤဖိ, ဒီးပှၤတခီဘီမုၢ်ဖိတဖၣ် ကအိၣ်ဃူဖိးလၢ ကစၢ်ယ့ၣ်ရှူးအပူၤန့ၣ်ဧါ.
တၢ်ဂ့ၢ်တမံၤအံၤ သန့ၤထီၣ်အသးလၢ အဝဲသ့ၣ် အတၢ်စံးဆၢန့ၣ်လီၤ. အဆၢဖိ ၁၇ ပာ်ဖျါဝဲ ကစၢ်ယ့ၣ်ရှူး “စံၣ်တဲၤတဲလီၤတၢ်ဃူတၢ်ဖိးလၢ သု (ပှၤတခီဘီမုၢ်) လၢအအိၣ်ယံၤ, ဒီးတၢ်ဃူတၢ်ဖိးဒီးပှၤ (ပှၤယူဒၤဖိ) လၢအအိၣ်ဘူး” န့ၣ်လီၤ. တၢ်ကစီၣ်တမံၤဃီဘၣ်ဆၣ်, တၢ်ဆိးကါအီၤတဒ်သိးဘၣ်. ပှၤယူဒၤဖိလၢအပာ်တီပာ်လိၤအသးတဖၣ်, အလီၢ်အိၣ်ဝဲလၢကဘၣ် အၢၣ်လီၤက့ၤအသးလၢ အဝဲသ့ၣ်တဂ့ၤန့ၢ်ပှၤဂၤဘၣ်. ဒ်န့ၣ်အသိး, ပှၤတခီဘီမုၢ်လၢတၢ်ကွၢ် တလီၤအီၤ တဖၣ်စ့ၢ်ကီး, ကဘၣ်သ့ၣ်ညါလီၤအသးလၢ အတမ့ၢ် ပှၤအၢသီဒိၣ်န့ၢ်ပှၤဂၤဘၣ်န့ၣ်လီၤ. ပှၤခံဖုလိာ်န့ၣ် အလီၢ်အိၣ်လၢ ကဆိကတီၢ် တၢ်မၤကီမၤခဲလိာ်သးကဒဲကဒဲ, ဒီးကွၢ်ပညိၣ်တပယူၢ်ဃီဆူ ကစၢ်ခရံာ်, ဒ်အဆၢဖိ ၁၅ စံးဘၣ်ပှၤအသိး, “ပှၤခံကလုာ်န့ၣ်တ့က့ၤဝဲလၢ ပှၤအသီတဂၤဃီလၢအကစၢ်ဒၣ်ဝဲအပူၤဒီး, မၤတၢ်ဃူတၢ်ဖိး” န့ၣ်လီၤ.
မ့ၢ်နဘၣ်တၢ်စူးကွံာ်ညိကွံာ်နၤဧါ. မ့ၢ်တၢ်လီၤသးဘၣ်ဒိန့ၣ်လီၤ. တကြၢးလၢပသးဘၣ်ဒိဘၣ်ထံးဘၣ်. ဘၣ်ဆၣ်, ဒ်နအိၣ်ဂၢၢ်ကျၢၤလၢ ကစၢ်ယ့ၣ်ရှူးန့ၣ်ဒီး, နကဲထီၣ်ပှၤမၤဃူမၤဖိးတၢ်တဂၤသ့ဝဲန့ၣ်လီၤ. ကစၢ်ယ့ၣ်ရှူးန့ၣ် မ့ၢ်ဒံးဝဲဒၣ် ပတၢ်ဃူတၢ်ဖိးန့ၣ်လီၤ.
