ယတံၤသကိး ဒဝ့(န) (Dwayne) အမိၢ်, သးပှၢ်မုၢ် ခၠၣ်လံ(န) (Mrs. Charlene) တဂၤ, အသးနံၣ်လါ အိၣ်ဝဲဒၣ် ၉၅ နံၣ်, အနီၢ်ကစၢ်အထီန့ၣ် ဖုၣ်န့ၢ်ဝဲ ယဲၢ်ပ့ၣ်, ဒီးအနီၢ်ကစၢ်အတယၢၢ်န့ၣ် စှၤန့ၢ်ဒံး ပီၣ် တကယၤ န့ၣ်လီၤ. တၢ်သ့ၣ်တဖၣ်န့ၣ် ဆိကတီၢ်ဝဲဒၣ် မိၢ်တဂၤလၢ အဘၣ်ကွၢ်ထွဲ ကဟုကယာ်အဖိခွါ, ခီဖျိလၢနီၢ်ခိ အတၢ်ဂံၢ်စၢ်ဘါစၢ်အဃိ, ကအံးထွဲကွၢ်ထွဲလီၤအသး, တသ့, တန့ၢ်, တဂၤအဂီၢ်န့ၣ်လီၤ. ဖဲပလဲၤဟးအိၣ်သကိးဆူ အဝဲသ့ၣ်အဟံၣ်ခံကထၢ အကတီၢ်န့ၣ်, ပထံၣ်ဘၣ် မိၢ်သးပှၢ်အံၤ အါဒၣ်တက့ၢ်န့ၣ် အိၣ်ဆိးဝဲလၢ ခံကထၢ တကထၢန့ၣ်လီၤ. မိၢ်သးပှၢ်အံၤ ဟဲစံၣ်လီၤဝဲလၢ ဃီသွါ ၁၆ သွါ အလိၤ ကယီကယီဖိဆူ အခီၣ်ထံးတကထၢ, ဒ်သိးကတူၢ်လိာ်မုာ်ဝဲ သမှံၤသပျီၤတဖၣ်, ဒ်ကဟုကကယာ်အဖိခွါ, လၢအအဲၣ်ဘၣ်ဝဲတဂၤအသိးန့ၣ်လီၤ.
ခၠၣ်လံ(န) အတၢ်ပာ်လီၤအသးလၢ အတအိၣ်ဒီးတၢ်အဲၣ်လီၤသး, လၢတၢ်ကမၤဆိတၢ်လၢအဂီၢ်အလီၢ်န့ၣ်, ခၠၣ်လံ(န) ဆိကမိၣ် မၤဆိတၢ်လၢ အဖိခွါအဂီၢ်အံၤ, မ့ၢ်တၢ်လၢ အမၤဂၢၢ်မၤကျၢၤယတၢ်စူၢ်တၢ်နာ်, မ့ၢ်တၢ်လၢအတၤယၤ, ဒီးဟ့ၣ်ဂံၢ်ဟ့ၣ်ဘါယၤန့ၣ်လီၤ. ဖံလံးပံး ၂:၃-၄ အပူၤန့ၣ် ဒ် စီၤပီလူး ပာ်ဖျါဝဲ “လၢတၢ်ဆီၣ်လီၤသုသးသတးဒီး, မ်ပှၤပာ် ပှၤဂၤဂ့ၤန့ၢ် အကစၢ်ဒၣ်ဝဲတက့ၢ်” အသိး, ခၠၣ်လံ(န) အိၣ်မူဟ့ၣ်ဒိဝဲဒၣ်န့ၣ်လီၤ.
တၢ်ကွၢ်ထွဲကဟုကယာ် ပှၤအတၢ်အိၣ်ဆူၣ်အိၣ်ချ့ အတၢ်ဂ့ၢ်ကီခဲတဖၣ်, ဒီးတၢ်လိၣ်အဂုၤအဂၤတဖၣ်န့ၣ် အိၣ်ဒီးအပှ့ၤကလံၤန့ၣ်လီၤ. လၢပတၢ်အိၣ်မူအပူၤ ကယဲၢ်တၢ်လၢ အဃ့ထီၣ်ပှၤတဖၣ်န့ၣ် ကဒုးအိၣ်ထီၣ် နီၢ်ခိနီၢ်သးအတၢ်လၢာ်ဂံၢ်လၢာ်ဘါ, ဒီးပမ့ၢ်တကွံာ်ဒၣ်ထဲလၢပဂီၢ်ဒၣ်ဝဲ, ဒီးကွၢ်ဆိကမိၣ်ဒၣ်ထဲလၢပှၤဂၤအဂီၢ်န့ၣ်ဒီး, ပှၤအိၣ်လၢပကပၤ အဘူးကတၢၢ်တဖၣ်ဒၣ်လဲာ် ကဟံးန့ၢ်ဝဲ တၢ်ခွဲးတၢ်ယာ်လၢပလိၤ သ့ဝဲဒၣ်န့ၣ်လီၤ. ဖံ ၂:၁-၄ ပာ်ဖျါဝဲလၢ တၢ်ကွၢ်ဆိကမိၣ်ပှၤဂၤ လၢတၢ်ဆီၣ်လီၤသးအပူၤန့ၣ် မ့ၢ်တၢ်လၢ ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ကဘၣ်မၤဝဲဒၣ်န့ၣ်လီၤ. တၢ်စူးကွံာ်ညိကွံာ်ပသးန့ၣ်, မ့ၢ်ဒၣ်ပလူၤပိာ်ထွဲကစၢ်ယ့ၣ်ရှူး အတၢ်အိၣ်မူဟ့ၣ်ဒိ, ဒီးပမၤထွဲမၤစၢၤ ပှၤဂုၤပှၤဂၤဆူညါကွ့ၢ်ကွ့ၢ်န့ၣ်လီၤ. ပတၢ်ရ့လိာ်ဘၣ်ထွဲလိာ်သးဒီးပှၤဂၤအဂီၢ်, အဆၢဖိ ၅ န့ၣ် ပှၤတၢ်မၢဖိ စီၤပီလူး ဒုးသ့ၣ်နီၣ်က့ၤပှၤလၢ, “သးတမံၤလၢ အအိၣ်လၢ ယ့ၣ်ရှူးခရံာ်အပူၤန့ၣ်, မ်အအိၣ်စ့ၢ်ကီးလၢသုပူၤတက့ၢ်” န့ၣ်လီၤ.
