ခ့(မ)(Kim)ဝံဃာ်အထၢၣ်ဝံချၢဖိ, ဒီးလၢတၢ်သူၣ်ဆူၣ်သးဂဲၤအပူၤ အိၣ်ခိးဝဲဒၣ်အပၢ်ကဟဲ အိၣ်အီၤ, ဖဲပဲတြီဖိအကပၤန့ၣ်လီၤ. ဘၣ်ဆၣ် မုၢ်အတၢ်ကပီၤဟါမၢ်, ဒီးမုၢ်နၤအကတီၢ် တုၤဃီၤလံအဃိ, အတၢ်သူၣ်ဆူၣ်သးဂဲၤတဖၣ် လီၤမၢ်ကွံာ်ဝဲဒၣ်န့ၣ်လီၤ. ခ့(မ)နၢ်ပၢၢ်ဝဲဒၣ် လၢ တဘျီအံၤစ့ၢ်ကီး အပၢ်တဟဲကိးအီၤလၢၤဘၣ်န့ၣ်လီၤ.
ခ့ (မ) အမိၢ်ဒီးအပၢ် မ့ၢ်နီၢ်ဒီမိၤဝၤလၢ အထုးလီၤဖှၣ်လိာ်အသးအဃိဒီး, အဝဲအဲၣ်ဒိးဟံးန့ၢ် တၢ်ဆၢကတီၢ်လၢအပၢ်န့ၣ်လီၤ. လၢအသးပူၤန့ၣ် ဆိကမိၣ်ထီၣ်ဝဲလၢ “တၢ်အံၤတမ့ၢ် တၢ်အခီၣ်ထံးကတၢၢ်တဘျီဘၣ်. ယတမ့ၢ် တၢ်အကါဒိၣ်တမံၤလၢ ယပၢ်အဂီၢ်န့ၣ်ဘၣ်. ယပၢ်န့ၣ်တအဲၣ်ယၤဘၣ်” န့ၣ်လီၤ.
ဖဲ ခ့ (မ) စူၢ်က့ၤနာ်က့ၤ ကစၢ်ယ့ၣ်ရှူးဝံၤအလီၢ်ခံ, အဝဲသ့ၣ်ညါက့ၤဝဲလၢ ပဝဲပှၤစူၢ်က့ၤနာ်က့ၤတၢ်ဖိခဲလၢာ်, ပမိၢ်ပပၢ်လၢဟီၣ်ခိၣ်ချၢအံၤ, ဒီးပှၤဂုၤပှၤဂၤတဖၣ် အသးကဟးဂီၤလၢ ပလိၤဘၣ်ဆၣ်, ပအိၣ်ဒီးပပၢ်လၢမူခိၣ်, လၢအအဲၣ်ပှၤ, ဒီးတမၤဟးဂီၤပသးနီတဘျီဘၣ်အံၤန့ၣ်လီၤ.
စီၤယိၤဟၣ် – ပှၤလၢအကွဲးလံာ်စီဆှံ တၢ်ပရၢသၢဘ့ၣ်, လံာ်တၢ်သးခုကစီၣ်, ဒီးလံာ်လီၣ်ဖျါတဂၤန့ၣ် နၢ်ပၢၢ်တ့ၢ်ဝဲဒၣ် ယွၤအတၢ်အဲၣ်တၢ်ကွံဒိၣ်ဒိၣ်ယိာ်ယိာ်န့ၣ်လီၤ. နီၢ်နီၢ်န့ၣ်, လၢ ယိၤ ၂၁:၂၀ အပူၤန့ၣ် စံးလီၤအသး, ဒ်အမ့ၢ် “အပျဲၢ်အဘီၣ် လၢယ့ၣ်ရှူးအဲၣ်အီၤတဂၤ,” ဒီးပာ်ဖျါထီၣ်အသး ဒ်အမ့ၢ် ပှၤလၢအတၢ်အိၣ်မူလဲလိာ်အသးတဂၤ, ခီဖျိလၢကစၢ်ခရံာ်အတၢ်အဲၣ်အီၤအဃိန့ၣ်လီၤ. ၁ ယိၤ ၃:၁ အပူၤန့ၣ် စီၤယိၤဟၣ် ကွဲးပာ်ဖျါဝဲလၢ, “ကွၢ်တက့ၢ်, ပၢ်ဟ့ၣ်လံပှၤလၢ တၢ်အဲၣ်တၢ်ကွံ ဒ်လဲၣ်ဒ်လဲၣ်, လၢတၢ်ကကိးပှၤလၢ ယွၤအဖိန့ၣ်လီၤ. ဒီးပမ့ၢ်တၢ်အဝဲန့ၣ်လီၤ.”
၁ ယိၤ ၃:၁၆, ဒီး ယိၤ ၃:၁၆ အပူၤန့ၣ် ပကထံၣ်ဘၣ် ကစၢ်ယွၤအဲၣ်ပှၤဟီၣ်ခိၣ်ဖိ တုၤအဟ့ၣ်လီၤကွံာ် အဖိခွါအိၣ်တဂၤဃီ လၢအဟ့ၣ်လီၤအသးသမူလၢပဂီၢ်န့ၣ်လီၤ. ခီဖျိလၢပထုကဖၣ်တၢ်န့ၣ်, ကစၢ်ယွၤ ကဟ့ၣ်ပှၤတၢ်ဆၢကတီၢ်ထီဘိ, ဒီး ဧ့ၤဘြံၤ ၁၃:၅ အပူၤန့ၣ်, အၢၣ်လီၤစ့ၢ်ကီးဝဲလၢ, “ယတညိကွံာ်ဘၣ်နၤဘၣ်, ယတလဲၤသဒၣ်ဘၣ်နၤဘၣ်” န့ၣ်လီၤ. ပအိၣ်ဘံၣ်အိၣ်ဘၢ လၢယွၤအတၢ်အဲၣ်အပူၤသ့ဝဲဒၣ်န့ၣ်လီၤ.
