လၢတၢ်တဆိကမိၣ်အပူၤ ယတၢ်အိၣ်ဆူၣ်အိၣ်ချ့နးထီၣ် ဒီးဘၣ်လဲၤခီဖျိကီကီခဲခဲဝံၤအလီၢ်ခံ ယပိာ်ထီၣ် ယဝၤအခံ ဃုာ်ဒီး ပှၤဂုၤပှၤဂၤတဖၣ် ဒီးပလဲၤ ဟးကသုၣ်ဆူ ကစၢၢ်ခိၣ်န့ၣ်လီၤ. ယထီၣ်ကစၢၢ်လၢဃီသွါသ့ၣ်ဘ့ၣ်ဘၣ်လိၤ ကယီၤကယီၤ ဆူသရိာ်ဆံးဖိတဖျၢၣ်လၢအိၣ်ဖဲကစၢၢ်ခိၣ်န့ၣ်လီၤ. လၢတၢ်ခံးကျါ ယအိၣ်ထဲတဂၤဧိၤဒီး ယဆ့ၣ်နီၤ လၢဃီသွါသ့ၣ်ဘ့ၣ်ဘၣ်အလိၤန့ၣ်လီၤ. ဖဲတၢ်သံကျံသီၣ်ထီၣ်အကတီၢ်န့ၣ် ယကတိၤကသွံလၢ “ယွၤဧၢ, မၤစၢၤယၤ”န့ၣ်လီၤ. ယလဲၤကယီၤကယီၤ တုၤယလဲၤတုၤဆူဒၢးဆံးဆံးဖိန့ၣ်လီၤ. လၢတၢ်တမုာ်တလၤအပူၤ ယသါထီၣ်သါလီၤ ဒီးစံးဘျုးယွၤလၢအနၢ်ဟူပှၤ လၢသ့ၣ်ပှၢ်ကျါန့ၣ်လီၤ.
လၢလံာ်စီဆှံတၢ်ကွဲးနီၣ်တဖၣ်အပူၤ တၢ်ဘူၣ်ထီၣ်ဘါထီၣ်ယွၤ လၢတၢ်ရ့လိာ်သးဒီးယွၤ ဘူးဘူးတံၢ်တံၢ်အကတီၢ်တဖၣ် အိၣ်ထီၣ်ဝဲအလီၢ်မ့ၢ် ဖဲပှၢ်မုၢ်ကနၢပူၤန့ၣ်လီၤ. ဖဲစီၤဒၤဝံးအိၣ်ခူသူၣ်လၢယူဒၤအပှၢ်မုၢ်ကနၢအပူၤ, ဘၣ်သ့ၣ်သ့ၣ်ကမ့ၢ်ဖဲ အဘၣ်ဃ့ၢ်ဝဲလၢအဖိခွါစီၤအးဘရှါလိၣ် အမဲာ်ညါအကတီၢ်န့ၣ် အဝဲသးဝံၣ်ထီၣ် “ယွၤဧၢ, နမ့ၢ်ယကစၢ်လီၤ. ယဃုနၤ ဂီၤဂီၤ, ယသးအံၤ သူအသးလၢနၤ, ယဖံးယညၣ်ဆၢန့ၢ်နၤ” လီၤ(စံး ၆၃:၁). အဝဲသ့ၣ်ညါပလၢၢ်ဘၣ်ဝဲ ယွၤအစိကမီၤဒီး အလၤကပီၤအဃိ အဝဲစံးဝဲလၢ “နဘျုးနဖှိၣ်ဂ့ၤန့ၢ်တၢ်မူတက့ၢ်လီၤ“ (:၃)န့ၣ်လီၤ. လၢတၢ်န့ၣ်အဃိ လၢပှၢ်မုၢ်ကနၢပူၤ ဒၣ်လဲာ် အဝဲဘူၣ်ထီၣ်ဘါထီၣ်ယွၤ တစိၤသးန့ၣ်လီၤ(:၂-၆). အဝဲစံး, “အဂ့ၢ်ဒ်အံၤ နမ့ၢ်တၢ်မၤစၢၤယၤ, ဒီးယကသူၣ်ဖှံ သးညီလၢ နဒံးဆ့အကဒုပူၤလီၤ. ယသးသန့ၤအသးလၢနၤ, နစုထွဲမၤစၢၤယၤလီၤ“(:၇-၈).
ပတၢ်အိၣ်မူမ့ၢ်မၤအသးဒ်လဲၣ်မ့ၢ်ဂ့ၤ, ပဒုၣ်ဒါတဖၣ်မ့ၢ်အၢသီလီၤပျံၤလီၤဖုးထဲလဲၣ်မ့ၢ်ဂ့ၤ, ဒ်စီၤဒၤဝံးအသိး ပပာ်ဖျါထီၣ် ပတၢ်နာ်န့ၢ်အီၤ ခီဖျိတၢ်စံးထီၣ်ပတြၢၤအီၤန့ၣ်လီၤ(:၁၁). မ့တမ့ၢ် ပတၢ်ကမၣ်နာ်က့ ပဘၣ်တူၢ်ဘၣ် ခီၣ်ဘၣ်တၢ်, ဘၣ်ဆၣ် ယွၤအတၢ်အဲၣ်တၢ်သးကညီၤန့ၣ် ဂ့ၤန့ၢ်တၢ်မူလီၤန့ၣ် ပနာ်သပှၢ်ကတၢၢ်သ့န့ၣ်လီၤ.
