ဖဲ ၁၈၁၇ နံၣ် လါအ့ဖြ့ၣ်န့ၣ် ပိာ်မုၣ်လၢအဟးဖျိးကျဲတဂၤ ကူကၤဝဲ ဆ့ကူဆ့ကၤလီၤဆီ, စံးကတိၤ ကျိာ်တၢ်ကတိၤလၢအလီၤဆီ, ဒီးဖဲအခိၣ်တိၤလိၤအလီၢ်န့ၣ် ဟးဝ့ၤဝီၤဝဲ ဖဲဝ့ၢ်ကလီးခၠဲး(စ)တၢၢ်ရှဲယၢၣ်, လၢကီၢ်အဲကလံးန့ၣ်လီၤ. ပှၤဘၣ်မူဘၣ်ဒါတဖၣ် ဆိကမိၣ်ဝဲလၢ ပှၤဃ့အီၣ်တၢ်ဖိတဂၤအဃိ ဖီၣ်အီၤဒီးပာ်အီၤလၢဃိာ်ပူၤန့ၣ်လီၤ. ဘၣ်ဆၣ် အဝဲစံးလီၤ အသးလၢ အမ့ၢ်နီၢ်ပၤမုၣ်ဖိ ခၣ်ရၣ်ပူ (Caraboo) လၢကီးကၠၣ်ပါစုး (Javasu) န့ၣ်လီၤ. ပှၤတဝၢဖိတဖၣ် ပာ်အီၤဒ်နီၢ်ပၤမုၣ်ဖိတဂၤ အနွံ တဆံ, တုၤလၢပှၤကွၢ်ထွဲဟံၣ်ဒွဲတဂၤ ဒုးနဲၣ်ပာ်ဖျါထီၣ်ဝဲလၢ အဝဲမ့ၢ် တၢ်ခ့တၢ်ပှၤတဂၤ, ဒီးအမံၤန့ၣ် မ့ရံၣ် ဝ့လ်ကီး (Mary Willcocks) န့ၣ်လီၤ.

တၢ်ဆၢကတီၢ် သၢလါဃာ်ဃာ်န့ၣ် ပိာ်မုၣ်ဖိတဂၤအံၤ လံာ်အီၣ်လီအီၣ် ပှၤတဝၢ ဒီတဖု ဒ်လဲၣ်န့ၣ် ပကဆိကမိၣ်သ့ၣ်သ့ၣ်န့ၣ်လီၤ. ဘၣ်ဆၣ် တၢ်လီတၢ်ဝ့ၤ တမ့ၢ်တၢ်အသီ, တၢ်လီၤဆီတခါဘၣ်. လံာ် ၂ ယိၤဟၣ်သိၣ်တၢ် ၁:၇ (ခ့ခါ) ဒုးသ့ၣ်နီၣ်ပှၤလၢ “ပှၤလီတၢ်ဝ့ၤတၢ်အါဂၤ အိၣ်ထီၣ်ဝဲလၢဟီၣ်ခိၣ်ချၢလီၤ” န့ၣ်လီၤ. အဆၢဖိ ၇ စံးဘၣ်ပှၤ အဝဲသ့ၣ်မ့ၢ် ပှၤတဖၣ်လၢ အတအၢၣ်လီၤအီလီၤဝဲလၢ ယ့ၣ်ရှူးခရံာ်ဟဲဝဲလၢ “တၢ်ဖံးတၢ်ညၣ်အပူၤဘၣ်,” မ့တမ့ၢ် ဒ်အဆၢဖိ ၉ ပာ်ဖျ်ဝဲအသိး “ပှၤလၢအလဲၤခါပတာ်ကွံာ် ခရံာ်အတၢ်သိၣ်တၢ်သီတဖၣ်,” ဒီးစံၣ်တဲၤတဲလီၤဝဲလၢ ခ့ခါအကတီၢ်န့ၣ် လၢအဝဲသ့ၣ်အဂီၢ် ထဲလံာ်စီဆှံန့ၣ် တမ့ၢ် တၢ်လၢတၢ်ပှဲၤလၢၤဘၣ်န့ၣ်လီၤ. ပှၤလီတၢ်ဝ့ၤတၢ်ဒ်သိးအံၤ ခံ ကလုာ်န့ၣ် ဒ်သိးပသုတဒိးန့ၢ်ဘၣ် အဆၢဖိ ၈ ပာ်ဖျါဝဲလၢ “တၢ်ဘျုးတၢ်ဖှိၣ်အလၢ အပှဲၤ,” ဒီးအဆၢဖိ ၁၁ (ခ့ခါ) ပာ်ဖျါဝဲ ဒ်သိးပက “ကဲထီၣ်အဝဲအပှၤမၤသကိးတၢ်လၢ အတၢ်မၤအအၢအသီတဖၣ်အပူၤ” အဂီၢ် ကူၣ်လီန့ၢ်ပှၤ သ့ဝဲဒၣ် န့ၣ်လီၤ.

မတၤတဂၤမး တအဲၣ်ဒိးဝဲလၢ တၢ်ကလီန့ၢ်ဝ့ၤန့ၢ်အီၤဘၣ်. ဝ့ၢ်ကလီးခၠဲး(စ)တၢၢ် ရှဲယၢၣ် ဖိတဖၣ် တူၢ်ဘၣ်ခီၣ်ဘၣ်ဝဲထဲ တၢ်ကူတၢ်ကၤတနီၤ, ဒီးတၢ်အီၣ်တနီၤအဃိ, တၢ်လီၤမုၢ်လီၤမၢ် တအိၣ်အါအါဘၣ်န့ၣ်လီၤ. ဘၣ်ဆၣ် လံာ်စီဆှံ စံးဘၣ်ပှၤ တၢ်ဒဲးဘး, ဒီးတၢ်လီတၢ်ဝ့ၤအဘူးအလဲန့ၣ် မၤပျံၤမၤဖုးပှၤတုၤခဲကနံၣ်အံၤန့ၣ်လီၤ. ပမ့ၢ်ဖးဒိကနၣ်လံာ်စီဆှံန့ၣ်ဒီး, ဒ်သိးပကဟးဆှဲးတၢ်လီတၢ်ဝ့ၤတဖၣ် ဒီးဒ်အဆၢဖိ ၆ ပာ်ဖျါဝဲလၢ “ပကလဲၤတၢ်ဒ် အတၢ်မၤလိာ်တဖၣ်အသိး” အဂီၢ်န့ၣ်, ကစၢ်ယွၤကမၤစၢၤပှၤန့ၣ်လီၤ.