ကၠ့ စပ့း အိၣ်ဆိးဝဲလၢ ရီးခ်ဘ့လ်, ကီၢ်စဲၣ် မ့ၣ်ရံၣ်လဲ န့ၣ် မၤကွၢ်ဝဲ ဒံၢ်.အဲၣ်(န).အ့ၣ် (DNA) တၢ်သမံးသမိး, ဒီးအစၢ ဟဲထီၣ်ဝဲန့ၣ် ကဲထီၣ်တၢ်ကမၢကမၣ်လၢအဂီၢ်- တၢ်အစၢန့ၣ် ဖျါလၢ, အဝဲမ့ၢ် ဘံၣ်န့ (Benin) အထံကီၢ်စီၤပၤအဖိတဂၤလၢ အဲဖြ့ၣ်ကၤ-မုၢ်နုာ် တကပၤန့ၣ်လီၤ. တယံာ်ဘၣ်န့ၣ် ကၠ့ စပ့း ဒိးထီၣ် ကဘီယူၤ, ဒီးလဲၤဟးလိာ်ကွဲဆူ ဘံၣ်န့ ထံကီၢ်န့ၣ်လီၤ. ဖဲအလဲၤတုၤဆူ ဘ့ၣ်န့ အကီၢ်န့ၣ်ဒီး, အဝဲဘၣ်တၢ်တူၢ်လိာ်အီၤ ဒ်စီၤလိာ်စီၤပၤဒူၣ်ဖိထၢဖိအသိး, တၢ်ဟဲက့ၤဆူ အထံကီၢ် အတၢ်ရဲၣ်တၢ်ကျဲၤ- လၣ်တယၢ်, နီၣ်တယၢ်တဖၣ်, တၢ်ဂဲၤကလံၣ်, တၢ်သူၣ်ဝံၣ်သးဆၢ, ဃုာ်ဒီးသုးမုၢ်ဖးဒိၣ် လၢအဟဲခိးအီၤ, ဒီးတူၢ်လိာ်မုာ်အီၤန့ၣ်လီၤ.

ကစၢ်ယ့ၣ်ရှူး ဟဲလီၤဆူ ဟီၣ်ခိၣ်န့ၣ် ဒ်သိးကရၤလီၤဘိးဘၣ်သ့ၣ်ညါ ကစၢ်ယွၤ အတၢ်သးခုကစီၣ်န့ၣ်လီၤ. ကစၢ်ယ့ၣ်ရှူး ဟဲဆူ အပှၤကလုာ်, ပှၤအံၣ်စရ့လးဖိတဖၣ် ဒ်သိးကဟ့ၣ်လီၤ တၢ်သးခုကစီၣ်, ဒီးကဒုးနဲၣ် တၢ်ကထူၣ်ဖျဲးအကျဲ လၢတၢ်ခံးတၢ်နၤအဂီၢ်န့ၣ်လီၤ. ယိၤ ၁:၉,၁၁ ပာ်ဖျါဝဲလၢ အပှၤဂီၢ်မုၢ် တဘၣ်သူၣ်ဘၣ်သးလၢတၢ်ကစီၣ်အဃိ, တတူၢ်လိာ်အီၤ ဒ်အမ့ၢ် တၢ်ကပီၤနီၢ်နီၢ်, ဒီးသမၢဝဲဒၣ်လၢ အမ့ၢ် မ့းရှံအၤ န့ၣ်လီၤ. ဘၣ်ဆၣ်, တမ့ၢ်လၢပှၤဂီၢ်မုၢ် တစူၢ်တနာ်အီၤ, ဒီးတဘၣ်သူၣ်ဘၣ်သးအီၤခဲလၢာ်ဘၣ်. ပှၤဂီၢ်မုၢ်အကျါတနီၤန့ၣ်, လၢတၢ်ဆီၣ်လီၤသး, ဒီးလၢတၢ်သးခုအပူၤ, ဒိးန့ၢ်ကစၢ်ခရံာ်အတၢ်ကွဲမုာ်, တူာ်လိာ်အီၤ ဒ်အမ့ၢ် ကစၢ်ယွၤလၢအဟဲလီၤ လုၢ်ထီၣ်အသးသမူလၢပတၢ်ဒဲးဘးအဂီၢ်, ဒီးစူၢ်က့ၤနာ်က့ၤအမံၤန့ၣ်လီၤ. ပှၤစူၢ်က့ၤနာ်က့ၤတၢ်စှၤဂၤအဂီၢ် တၢ်လၢအလီၤကမၢကမၣ်တမံၤ အိၣ်ခိးပာ်ဝဲန့ၣ်လီၤ. ဒ်သိးဒီးပကမ့ၢ် စီၤလိာ်စီၤပၤ အဖိအဂီၢ် အဆၢဖိ ၁၂ ပာ်ဖျါဝဲလၢ ကစၢ်ယ့ၣ်ရှူး “ဟ့ၣ်ဝဲလၢအစိအကမီၤ, ဒ်သိးအကကဲထီၣ်ယွၤအဖိ,” ခီဖျိလၢနီၢ်သး အတၢ်အိၣ်ဖျဲၣ်ထီၣ်ကဒီးတဘျီအပူၤန့ၣ်လီၤ.

ဖဲပဃၣ်ကွံာ်ပသးလၢ တၢ်ဒဲးဘး, ဒီးတၢ်ခံးတၢ်နၤဝံၤ, တူၢ်လိာ် ကစၢ်ယ့ၣ်ရှူး, ဒီးစူၢ်က့ၤနာ်က့ၤ အမံၤစီဆှံန့ၣ်ဒီး, ပဃုထံၣ်သ့ၣ်ညါဘၣ်လၢ ပမ့ၢ်ကစၢ်ယွၤအဖိတဖၣ်, ဒ်စီၤလိာ်စီၤပၤဖိလံၤအစၢၤအသွဲၣ်, လၢယွၤအဒူၣ်ဖိထၢဖိအပူၤန့ၣ်လီၤ. ဖဲပအိၣ်မူအိၣ်ဂဲၤလၢတၢ်ဟံးန့ၢ်မူဒါတဖၣ် ဒ်အမ့ၢ်စီၤပၤအဖိတဖၣ်အသိးန့ၣ်, မ်ပကမုာ်လၤသးခုလၢ တၢ်ဆိၣ်ဂ့ၤတဖၣ်န့ၣ်တက့ၢ်.