တမှံၤသရၣ် ဟဲစံၣ်တဲၤတဲလီၤ တၢ်ဂ့ၢ်ဘၣ်ထွဲဒီး တၢ်ကူၣ်သ့လၢ တၢ်နာ်န့ၢ် ကစၢ်ယွၤ ဒီးတၢ် “ခါထီၣ်ခီၣ်ကါ ဆူယၢ်ဒ့ၣ်ကျိအပူၤ” န့ၣ်လီၤ. အဝဲပာ်ဖျါထီၣ် တၢ်အိၣ်ဖှိၣ်သရၣ်တဂၤအဂ့ၢ်, လၢအနာ်န့ၢ် ကစၢ်ယွၤ, ဒီးဃုထၢစံးကတိၤ တၢ်မ့ၢ်တၢ်တီတဖၣ်လၢလံာ်စီဆှံအပူၤ, ဒီးဘၣ်တဘျီန့ၣ်, ဖဲလၢအဝဲသ့ၣ်ထံကီၢ်ထုးထီၣ် တၢ်ဘျၢသဲးစးအသီဒၣ်လဲာ်, စံၣ်တဲၤတဲလီၤဝဲန့ၣ်လီၤ. မ့ၢ်လၢအတၢ်စံၣ်တဲၤတဲလီၤတၢ်န့ၣ် ပှၤထံၣ် ဒ်အမ့ၢ် တၢ်သးဟ့အတၢ်ကတိၤအဃိ ဘၣ်တၢ်တ့ၢ်နုာ်အီၤလၢဃိာ်ပူၤ အသီသၢဆံ န့ၣ်လီၤ. ဘၣ်ဆၣ်, အတၢ်ဂ့ၢ်န့ၣ်ဘၣ်တၢ်ပတံထီၣ်, ဒီးဘျီၣ်ဒိၣ်စံၣ်ညီၣ်ဝဲလၢ သရၣ်တဂၤအံၤ, အိၣ်ဒီးခွဲးယာ်လၢ ကထုးထီၣ် လံာ်စီဆှံ အခီပညီ, ဒီးဟ့ၣ်သဆၣ်ထီၣ် ပှၤဂုၤပှၤဂၤလၢ ကအိၣ်မူပိာ်ထွဲဝဲအဂီၢ်န့ၣ်လီၤ.
ပှၤလုၢ်တၢ်အဒိၣ်တဖၣ် လၢအစိာ်တလါစီဆှံစ့ၢ်ကီး ဘၣ်ဃုထၢဝဲလၢ မ့ၢ်ကဘၣ်ခါထီၣ်ခီၣ်ကါ ဆူယၢ်ဒ့ၣ်ကျိအပူၤဧါ မ့တမ့ၢ် ကဘၣ်အိၣ်ဃိကလာ် လၢထံကျိကၢၢ်နံၤဧါန့ၣ်လီၤ. ဖဲပှၤအံၣ်စရ့လးဖိတဖၣ် ပူၤဖျဲးထီၣ်လၢ အဲၤကူပတူးဝံၤ, ဘၣ်ဟးဝ့ၤဝီၤဝဲလၢ ပှၢ်မုၢ်ကနၢ အနံၣ်လွံၢ်ဆံန့ၣ်လီၤ. ခဲကနံၣ်အံၤ, အဝဲသ့ၣ် အိၣ်ဆၢထၢၣ်လၢ ထံကျိယၢ်ဒ့ၣ်အကၢၢ်နံၤ, ဖဲလၢထံယွၤလီၤဆူၣ်, ဒီးလီၤပျံၤလီၤဖုးဒိၣ်မးန့ၣ်လီၤ. ဘၣ်ဆၣ်, ဖဲလၢအဝဲသ့ၣ် ခါထီၣ်ခီၣ်ကါဆူထံကျါ, ဒီးကစၢ်ယွၤ ဒုးလီၤသံးကွံာ်ထံ, ဒီးယိၤရှူ ၃:၁၅-၁၆ ပာ်ဖျါဝဲ “ထံလၢအဟဲလီၤန့ၣ် ဆၢထၢၣ်ဝဲ…. လၢာ်ကွံာ်ဝဲ ဒီးဒီၣ်တဲာ်ကွံာ်အသး” န့ၣ်လီၤ.
ပတၢ်အိၣ်မူအပူၤ, ပမ့ၢ်နာ်ဒီးသန့ၤပသးလၢ ကစၢ်ယွၤန့ၣ်ဒီး, ဖဲပဃုထၢ စံးကတိၤ တၢ်မ့ၢ်တၢ်တီ လၢလံာ်စီဆှံအပူၤတဖၣ်မ့ၢ်ဂ့ၤ, ဖဲပခါထီၣ်ခီၣ်ကါဆူ တၢ်လီၢ်လၢ ပတသ့ၣ်ညါအကတီၢ်မ့ၢ်ဂ့ၤ ဒ်သိးပကလဲၤတၢ်ဆူညါအဂီၢ်, အဝဲ ကဟ့ၣ်ပှၤတၢ်သူၣ်ဒူသးဒူန့ၣ်လီၤ. ဖဲတၢ်သမံသမိး တၢ်အိၣ်ဖှိၣ်သရၣ်အံၤ လၢကွီၢ်ဘျီၣ်အပူၤအကတီၢ်န့ၣ်, ပှၤနၢ်ဟူဘၣ် တၢ်သးခုကစီၣ်, ခီဖျိလၢအတၢ်စံၣ်တဲၤတဲလီၤတၢ်န့ၣ်လီၤ. လံာ်ယိၤရှူ ၃:၁၇ ဒီး ၄:၂၄ ပာ်ဖျါဝဲလၢ, ပှၤအံၣ်စရ့လးဖိတဖၣ် ခီဂာ် ယၢ်ဒ့ၣ်ကျိ ဂ့ၤဂ့ၤဘၣ်ဘၣ် ဆူကီၢ်တၢ်စံးပာ်အပူၤ, ဒီးကနီၤဟ့ၣ်ဝဲကစၢ်ယွၤအစိကမီၤလၢခါဆူညါစၢၤသွဲၣ်သီတဖၣ်အအိၣ်န့ၣ်လီၤ.
ပမ့ၢ်ခါထီၣ် ခီၣ်ကါလၢတၢ်နာ်အပူၤန့ၣ်ဒီး, ကစၢ်ယွၤကအံးထွဲကွၢ်ထွဲပှၤတုၤအကတၢၢ်န့ၣ်လီၤ.
