ပှၤလီတၢ်ဝ့ၤတၢ်စဲၣ်နီၤ အိၣ်ဝဲတဂၤ, ဖဲအနီၢ်ကစၢ်ဘၣ်ကွၢ်ဆၢၣ်မဲာ်ဒီး တၢ်ခီပတာ် တၢ်နီၣ်သိလ့ၣ် အတၢ်သိၣ်တၢ်သီန့ၣ်ဒီး မၤပူၤဖျဲးအသးလၢ အတၢ်ကတိၤကဘျံးကဘျၣ်န့ၣ်လီၤ. ဖဲဘၣ်လဲၤထံၣ်လိာ်အသးဒီးစံၣ်ညီၣ်ကွီၢ်အါဂၤန့ၣ်ကလုာ်ကလုာ်လၢ ဘျီၣ်ပူၤ, အဝဲတဲကဘျံးကဘျၣ် အပူတယုၢ် လၢအမ့ၢ် “ယလီၤဖးဒီးယတၢ်အဲၣ်တီ, ဒီးအဝဲဟံးန့ၢ်ဒိးထီၣ် ယသိလ့ၣ်န့ၣ် ယတသ့ၣ်ညါဘၣ်” န့ၣ်လီၤ. တကးဒံးဘၣ်န့ၣ်, လၢအတၢ်ဖံးတၢ်မၤစ့ၢ်ကီး တမၤတၢ်ဂ့ၤဂ့ၤအဃိ, တၢ်ဘၣ်ဒ့ၣ်ပာ်ကမၣ်အီၤတလီၢ်လီၢ်န့ၣ်လီၤ. အကတၢၢ်န့ၣ်, ပဒိၣ်အပီၢ်ရီတဖၣ် စံၣ်ညီၣ်အီၤလၢ အုၣ်အသး ကဘျံးကဘျၣ် ဘၣ်ထွဲဒီးတၢ်ဂ့ၢ်လွံၢ်မံၤ, ဒီး ဒ်သိးကလီဝဲ စံၣ်ညီၣ်ကွီၢ်တဖၣ်အဂီၢ် ပာ်ဖျါထီၣ် လံာ်အုၣ်သး ကဘျံးကဘျၣ် ယဲၢ်မံၤအဂီၢ်န့ၣ်လီၤ. ပှၤတဂၤအံၤအဂီၢ်န့ၣ်, တၢ်လီၤတၢ်ဝ့ၤ ကဲထီၣ် လုၢ်လၢ်တမံၤလၢ အတၢ်အိၣ်မူတစိၤသးန့ၣ်လီၤ.
တၢ်လၢအထီဒါလိာ်သးဒီးတၢ်ဂ့ၢ်လၢထးန့ၣ်, ပှၤတၢ်မၢဖိ စီၤပီလူး ပာ်ဖျါဝဲလၢ တၢ်စံးကတိၤ တၢ်မ့ၢ်တၢ်တီန့ၣ် မ့ၢ်လုၢ်လၢ်အဂ့ၤအဝါတမံၤ လၢပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ကဘၣ်မူထွဲမၤထွဲဝဲန့ၣ်လီၤ. အ့ဖ့း ၂:၁-၅ န့ၣ် အဝဲ ဒုးသ့ၣ်နီၣ်ထီၣ် ပှၤအ့းဖ့းစူးဖိတဖၣ် လၢကစူးကွံာ်ညိကွံာ် တၢ်အိၣ်မူ ကျိၤကျဲလီၢ်လံၤတဖၣ်, ခီဖျိဟ့ၣ်လီၤ အးလီၤသးဆူ ကစၢ်ခရံာ်န့ၣ်လီၤ. ခဲအံၤ, အဝဲသ့ၣ် ကဘၣ်အိၣ်မူအိၣ်ဂဲၤ ဒ်အဝဲသ့ၣ်ကဲထီၣ်ဝဲ ပှၤအသီတဖၣ်အသိး, ဒီးကဘၣ်ဖံးသကိးမၤသကိးတၢ် လၢအဝဲသ့ၣ်အတၢ်အိၣ်မူအပူၤန့ၣ်လီၤ. အ့ဖ့း ၄:၂၅ ပာ်ဖျါဝဲ တၢ်လၢအဝဲသ့ၣ် ကဘၣ်စူးကွံာ်ညိကွံာ်တဖၣ်အကျါတမံၤန့ၣ် မ့ၢ်- “တၢ်ကတိၤကဘျံးကဘျၣ်,” ဒီးအဂၤတမံၤ မ့ၢ်တၢ် “ကတိၤလိာ်သုသးလၢ တၢ်မ့ၢ်တၢ်တီ တဂၤဒီးတဂၤ” န့ၣ်လီၤ. ဒီးအဆၢဖိ ၂၉ န့ၣ် ပကထံၣ်ဘၣ်, တၢ်မၤအံၤ မ့ၢ်တၢ်ဒီတဒၢ တၢ်အိၣ်ဖှိၣ်အတၢ်ဃူတၢ်ဖိးအဃိ, ပှၤအ့ဖ့းစူးဖိတဖၣ် ကဘၣ်စံးကတိၤ, ဖံးမၤတၢ်တီတီလိၤလိၤထီဘိ လၢတၢ် “မၤထီၣ်မၤထီလိာ်သး” အဂီၢ်န့ၣ်လီၤ.
အဆၢဖိ ၃-၄ စံးဘၣ်ပှၤ ဒ်သးစီဆှံမၤစၢၤပှၤအသိး, ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ် ဂုာ်ကျဲးစၢၤအိၣ်မူအိၣ်ဂဲၤကသ့ဝဲလၢတၢ်မ့ၢ်တၢ်တီအပူၤ လၢအတၢ်စံးတၢ်ကတိၤ, ဒီးလၢအတၢ်ဖံးတၢ်မၤအပူၤန့ၣ်လီၤ. ဖဲန့ၣ်ဒီး တၢ်အိၣ်ဖှိၣ်ကမ့ၢ်တၢ်တမံၤဃီ, ဒီးကစၢ်ယွၤကဒိးဘၣ် တၢ်လၤကပီၤန့ၣ်လီၤ.
