ယဒိးန့ၢ်တၢ်အုၣ်က့ၤခီၣ် ဒီးယပာ်စီဆှံ ယတၢ်အိၣ်မူလၢ ကစၢ်ယွၤအဂီၢ်ဝံၤ တဘျုးနံၣ်န့ၣ်, ယသးကလၢာ်ဘၣ်လၢ ယွၤနဲၣ်ယၤ ဒ်သိးယကဆိကတီၢ်ကွံာ် ယတၢ်ကွဲးတၢ်ပရၢပစၢၣ်အတၢ်ဖံးတၢ်မၤန့ၣ်လီၤ. ယပာ်လီၤ ယထိၣ်ဒံးဘိ, ဒီးတၢ်ကထံၣ်န့ၢ် ယတၢ်ကွဲးတဖၣ်န့ၣ် အလီၢ်တအိၣ်လၢၤဘၣ် အကတီၢ်အခါ တၢ်လၢယသးကလၢၢ်ဘၣ်န့ၣ် မုၢ်တနံၤ ဒ်သိးယကွဲးတၢ်လၢ အလၤကပီၤအဂီၢ် ယွၤကမၢယၤန့ၣ်လီၤ. ဖဲနံၣ်တဖၣ်လၢ ယဘၣ်ဟးဝ့ၤဝီၤလဲၤတၢ်လၢ ယနီၢ်ကစၢ်အပှၢ်မုၢ်ကနၢအကတီၢ်န့ၣ်, ယန့ၢ်ဂံၢ်န့ၢ်ဘါ ခီဖျိလၢ စီၤမိၤရှ့ဒီးအနီၣ်ထိးအဂ့ၢ် ဖျါဖဲ ၂ မိၤ ၄ အပူၤန့ၣ်လီၤ.
စီၤမိၤရှ့ မ့ၢ်ပှၤဒိၣ်ထီၣ်လၢ ဖၤရိၤအနီပူၤ, အိၣ်ဒီးအတၢ်အိၣ်မူ ခါဆူညါအဂ့ၤအဝါ တဂၤအံၤ, ဘၣ်ဃ့ၢ်ဟးထီၣ်ကွံာ် လၢကီၢ်အဲၤကူပတူးအပူၤ, ဒီးဖဲကစၢ်ယွၤကိးထီၣ်အီၤအကတီၢ်န့ၣ် ဘၣ်အိၣ်မူဝဲ ဒ်ပှၤကွၢ်သိတဂၤအသိးန့ၣ်လီၤ. စီၤမိၤရှ့ ကဆိကမိၣ်ဝဲလၢဒ်သိးကဟ့ၣ်ယွၤအဂီၢ် တၢ်တအိၣ်ဒီးအီၤနီတမံၤဘၣ်န့ၣ်လီၤ. ဘၣ်ဆၣ် မၤလိန့ၢ်ဝဲဒၣ်လၢ ကယဲၢ်ပှၤတဂၤဂၤဂ့ၤ, ဒီးတၢ်တမံၤမံၤဂ့ၤန့ၣ် လၢအလၤကပီၤအဂီၢ် ယွၤစူးကါသ့န့ၣ်လီၤ.
၂ မိၤ ၄:၂-၃ န့ၣ် ယွၤသံကွၢ် စီၤမိၤရှ့ “လၢနစုပူၤန့ၣ် မ့ၢ်မနုၤတမံၤလဲၣ်,” ဒီးစံးဆၢဝဲ, “နီၣ်ထိးဘိလီၤ.” ဒီးယွၤစံးဝဲဒၣ်, “တ့ၢ်လီၤကွံာ်အီၤလၢ ဟီၣ်ခိၣ်တက့ၢ်.” စီၤမိၤရှ့ အနီၣ်ထိးဘိဖိအံၤ ကဲထီၣ် ဂုၢ်တဘိန့ၣ်လီၤ. ၂ မိၤ ၄:၃-၄ ပာ်ဖျါထီၣ်, ဖဲ စီၤမိၤရှ့ ဖီၣ်ဝဲ ဂုၢ်သ့ၣ်န့ၣ်ဒီး ယွၤ ဒုးကဲထီၣ်က့ၤဂုၢ်သ့ၣ်ဆူနီၣ်ထိးဘိန့ၣ်လီၤ. အဆၢဖိ ၅ စံးဘၣ်ပှၤလၢ ယွၤ- အပၢ်တဖၣ်အကစၢ်- စီၤအၤဘြၤဟၣ်အကစၢ်, ဒီးစီၤအံၤစဲးအကစၢ်, ဒီးစီၤယၤကိာ်အကစၢ်, လီၣ်ဖျါထီၣ်အသးလၢ နမဲာ်ညါလံန့ၣ်, ဒ်သိးပှၤအံၣ်စရ့လးဖိတဖၣ် ကနာ်ဝဲအဂီၢ် တၢ်ပနီၣ်တထံၣ်အံၤ ဘၣ်တၢ်ဟ့ၣ်လီၤအီၤန့ၣ်လီၤ. ဒ် စီၤမိၤရှ့ တ့ၢ်လီၤ အနီၣ်ထိးဘိ, ဒီးဖီၣ်ထီၣ်က့ၤဝဲအသိး,လၢတၢ်ဒိကနၣ်ယွၤအပူၤန့ၣ် ယပာ်တ့ၢ်ကွံာ် ယတၢ်ဖံးတၢ်မၤ လၢအမ့ၢ် ပှၤကွဲးလံာ်ပရၢပစၢၣ်တဂၤအသိးန့ၣ်လီၤ. လၢခံန့ၣ်ဒီး, ကစၢ်ယွၤ နဲၣ်ယၤလၢ ယကဖီၣ်ထီၣ်က့ၤ ယထိၣ်ဒံးဘိ, ဒီးခဲကနံၣ်အံၤ, လၢတၢ်မၤလၤကပီၤအီၤအဂီၢ် ယကွဲးတၢ်န့ၣ်လီၤ.
ကစၢ်ယွၤကစူးကါပှၤအဂီၢ်, တၢ်လၢအိၣ်ဒီးပှၤန့ၣ် တလိၣ်အါအါဂီၢ်ဂီၢ်ဘၣ်. ခီဖျိလၢတၤလၣ်ဖိတဖၣ် လၢယွၤဟ့ၣ်ပှၤန့ၣ် ပမၤတၢ်သ့လၢယွၤအဂီၢ်န့ၣ်လီၤ. တၢ်ကဘၣ်စးထီၣ်ဖဲလဲၣ် နမ့ၢ်တသ့ၣ်ညါဘၣ်န့ၣ်ဒီး, တၢ်အိၣ်လၢနစုပူၤန့ၣ် မ့ၢ်တၢ်မနုၤလဲၣ်.
