ဖဲ ရဲယၢၣ် (Ryan) သးစၢ်လိၣ်ဘိအကတီၢ်, အမိၢ်န့ၣ်လဲၤပူၤကွံာ်ဟီၣ်ခိၣ် လၢခဲစၢၣ်တၢ်ဆါအဃိ အဝဲကဲထီၣ် ပှၤဟံၣ်တအိၣ်ဃီတအိၣ်, ဒီးလၢခံန့ၣ်ဟးထီၣ်ဝဲလၢကၠိန့ၣ်လီၤ. အသးတူၢ်ဘၣ် အတၢ်မုၢ်လၢ်လီၤမၢ်, ဒီးသၣ်ဝံၤလီၤဒိတလီၢ်လီၢ်န့ၣ်လီၤ. နံၣ်တဖၣ်ပူၤကွံာ်ဒီး ရဲယၢၣ် ဒုးအိၣ်ထီၣ်ဝဲဒၣ် တၢ်ကရၢကရိလၢ အမၤစၢၤပှၤဂၤ, လီၤဆီဒၣ်တၢ် လၢဖိသၣ်သးစၢ်တဖၣ်အဂီၢ်, ဒ်သိးကသူၣ်တၢ်ဖျးတၢ်, ကကူးက့ၤတၢ်, ဒီးကတဲာ်ကတီၤ တၢ်အီၣ်လၢ အမၤန့ၢ်ဝဲလၢ အတၤသၣ်အလီၢ်န့ၣ်လီၤ. တၢ်ဒုးအိၣ်ထီၣ် တၢ်ကရၢကရိအံၤ အတၢ်ပညိၣ် မ့ၢ်ဝဲ ဒ်သိးဒီး ပှၤနီတဂၤ အသုတအိၣ်ဒီးတၢ်သၣ်ဝံၤလီၤဒိတဂ့ၤအဂီၢ်, ဒီးပှၤလၢအအိၣ်ဒီး တၢ်တမံၤမံၤစ့ၢ်ကီး ကအံးထွဲကွၢ်ထွဲ ပှၤလၢအတၢ်တအိၣ်နီတမံၤတဖၣ်အဂီၢ်န့ၣ်လီၤ. ရဲယၢၣ်အတၢ်ဘၣ်ယိၣ်လၢ ပှၤဂၤအဂီၢ်အံၤ ဖျါလီၤဂာ်ဒီးယွၤအသးလၢ အအဲၣ်တၢ်တီတၢ်လိၤ, ဒီးသးကညီၤတၢ်န့ၣ်လီၤ.

ပဘၣ်ကွၢ်ဆၢၣ်မဲာ် တၢ်ဘၣ်ဒိဆါ, ဒီးတၢ်နးတၢ်ဖှီၣ်တဖၣ်န့ၣ် ယွၤသ့ၣ်ညါဝဲဒၣ်န့ၣ်လီၤ. ဖဲကစၢ်ယွၤထံၣ် တၢ်တတီတလိၤ လၢအံၣ်စရ့လး-ကလံၤစိး အကီၢ်ပူၤန့ၣ်ဒီး, ဆှၢလီၤဝဲဒၣ် ဝံၤဧၤမိၣ်လၢ ကကိးသတြီထီၣ် အတၢ်ပာ်ဂ့ၤပာ်ဝါအသးတဖၣ်န့ၣ်လီၤ. ဧၤမိၣ် ၂:၆ ပာ်ဖျါဝဲလၢ အဝဲသ့ၣ်တဘျီမ့ၢ်တ့ၢ်ဝဲ ပှၤဂီၢ်မုၢ်လၢ ယွၤထုးထီၣ်ကွံာ်အီၤလၢ အဲၤကူပတူး အတၢ်ဆီၣ်သနံးအပူၤန့ၣ်, ခဲကနံၣ်အံၤ လၢခီၣ်ဖံးတခိၣ်အဂီၢ် ဆါလီၤဝဲ ပှၤလၢအဃၢၤတဖၣ် လၢကုၢ်အလီၢ်န့ၣ်လီၤ. ဧၤ ၂:၆-၇ န့ၣ် ပကထံၣ်ဘၣ် အဝဲသ့ၣ်ဆါလီၤဝဲ ပှၤတီပှၤလိၤလၢ ဒုၣ်ဒါအစုပူၤ, ကွၢ်ကပာ်ကွံာ်ဝဲ တၢ်တီတၢ်လိၤဆူ ပှၤဘၣ်တၢ်ဆီၣ်သနံးအီၤတဖၣ်, ယီၢ်လီၤဝဲဒၣ် ပှၤဖှီၣ်ဖိယာ်ဖိအခိၣ်, ဒီး ဧၤ ၄:၄-၅ ပာ်ဖျါဝဲ, ဖဲလၢအဝဲသ့ၣ်ခဲလၢာ် ပာ်မၤအသးလၢ တၢ်ဘူၣ်ထီၣ်ဘါထီၣ်ယွၤ, လုၢ်ထီၣ်အတၢ်လုၢ်တၢ်ပာ်တဖၣ် လၢမုၢ်နံၤစီဆှံတဖၣ်န့ၣ်လီၤ.

ဧၤ ၅:၁၄ န့ၣ် ဝံဧၤမိၣ် ဃ့ကညးဝဲ ပှၤအံၣ်စရ့လးဖိတဖၣ်လၢ “ဒ်သိးသုကမူဒီး, ဃုတၢ်ဂ့ၤတက့ၢ်. ဃုတၢ်အၢတဂ့ၤ, ဒီးဒ်န့ၣ်, တၢ်ကမၤအသးလၢ ယွၤတၢ်သုးမုၢ်ဂီၢ်မုၢ်အကစၢ်န့ၣ် ကအိၣ်ဒီးသု, ဒ်သုစံးအသိးန့ၣ်လီၤ.” ဒ် ရဲယၢၣ် အသိး, ပဝဲတဂၤစုာ်စုာ် လၢပတၢ်အိၣ်မူန့ၣ်, ပအိၣ်ဒီး တၢ်လဲၤခီဖျိလၢ အမၤဆါပှၤ, ဒီးတၢ်မၤတတီတလိၤပှၤတဖၣ်လၢလၢလီၢ်လီၢ်, ဒ်သိးပကဒိသူၣ်ဒိသး, ဒီးကကဲထီၣ်တၢ်မၤစၢၤ လၢပှၤဂၤအဂီၢ် န့ၣ်လီၤ. “ပကဃုတၢ်ဂ့ၤ” ဒီးမၤသကိးတၢ်ဒီးယွၤလၢ တၢ်သူၣ်လီၤဖျးလီၤ ကယဲၢ်တၢ်တီတၢ်လိၤခဲလၢာ်အဂီၢ် အကတီၢ်ဘၣ်လံန့ၣ်လီၤ.