ပကစံးကတိၤသကိး တၢ်အိၣ်ပတုာ်လၢကျဲ တစိၢ်တလီၢ်န့ၣ်တက့ၢ်. ဖံ စထရ့ကၠဲၣ် (Phil Stringer) န့ၣ် ကဘီယူၤ စဲၤခံဝဲလၢကလံၤမုၢ်အဃိဒီး ကဒိးဘၣ် ကဘီယူၤအဂီၢ် ဘၣ်အိၣ်ခိးဝဲ ၁၈ နၣ်ရံၣ်န့ၣ်လီၤ. အဝဲအတၢ်သူၣ်စူၤသးစူၤ, ဒီးအတၢ်ပာ်သးစွံကတုၤအံၤ ဟ့ၣ်ထီၣ် တၢ်အစၢလၢအဂ့ၤန့ၣ်လီၤ. တၢ်လီၢ်လၢ ကဘၣ်လဲၤဝဲန့ၣ်, လဲၤတုၤဝဲ, ဒီးတၢ်အိၣ်ဖှိၣ်အကါဒိၣ်လၢ အတၢ်ဖံးတၢ်မၤအဂီၢ်စ့ၢ်ကီး လဲၤထီၣ်ဘၣ်ဝဲ ဘၣ်ဆၢဘၣ်ကတီၢ်န့ၣ်လီၤ. ဘၣ်ဆၣ် အဝဲဘၣ်ဒိးကဘီယူၤ ထဲတဂၤဧိၤန့ၣ်လီၤ. ပှၤလဲၤတၢ်ဖိအဂၤတဖၣ် ဆိကတီၢ်အတၢ်ခိး, မ့တမ့ၢ် ပှၤတနီၤန့ၣ် ရဲၣ်ကျဲၤလဲၤဝဲလၢ ကျဲအဂၤအဃိန့ၣ်လီၤ. ကဘီယူၤအပှၤမၤတၢ်ဖိတဖၣ် ကွၢ်ထွဲအီၤ, ဟ့ၣ်အီၤ တၢ်အီၣ်တၢ်အီလၢအဘၣ်သးအီၣ်အီတဖၣ်, တကးဒံးဘၣ်န့ၣ် စထရ့ကၠဲၣ် စံးဝဲဒၣ်,“ယဆ့ၣ်နီၤဘၣ်လၢ တၢ်မဲာ်ညါ, ဒီးကဘီယူၤဒီဆိ မ့ၢ်ဒၣ်ယဂီၢ်အဃိ ယဆ့ၣ်နီၤဝဲဒၣ်န့ၣ်လီၤ.” တၢ်မၤအသးအံၤ ကြၢးဝဲဘၣ်ဝဲလၢအဂီၢ်န့ၣ်လီၤ.

တၢ်လၢအစဲၤခံ ဖးယံာ်ဖးထၢတမံၤအဂီၢ် စီၤအၤဘြၤဟၣ်စ့ၢ်ကီး လၢတၢ်သးစူၤအပူၤ ဘၣ်အိၣ်ခိးဝဲန့ၣ်လီၤ. အပူၤကွံာ် ဖဲတၢ်သ့ၣ်ညါအီၤလၢ စီၤအၤဘြၣ် အကတီၢ်, ၁ မိၤ ၁၂:၂-၃ အပူၤန့ၣ် ကစၢ်ယွၤ စံးဘၣ်အီၤလၢ အကဒုးကဲထီၣ် “ပှၤတကလုာ်ဖးဒိၣ်” ဒီး “ပှၤဟီၣ်ခိၣ်ဖိအဒူၣ်ခဲလၢာ် ကဘၣ်ဆိၣ်ဂ့ၤလၢ” အီၤအဂ့ၢ်န့ၣ်လီၤ. ၁ မိၤ ၁၂:၄ ပာ်ဖျါဝဲလၢ ပှၤသးပှၢ်, ၇၅ နံၣ် တဂၤအံၤအဂီၢ် တၢ်ကီတၢ်ခဲ အိၣ်ထဲတမံၤဧိၤန့ၣ်- မ့ၢ်လၢအဝဲတအိၣ်ဒီးဖိလံၤစဲၤသွဲၣ်အဃိ, ကကဲထီၣ် ပှၤတကလုာ်ဖးဒိၣ် ကသ့ဒ်လဲၣ်. အဝဲ ဘၣ်အိၣ်ခိးဝဲဒၣ် ဒ်ယံာ်ထီၣ်, ဒီးအသးဆၢမိၣ်န့ၢ်အစဲၤသွဲၣ်ဒ်အါထီၣ်, (အဃိ, အဝဲဒီးအမါနီၢ်စၤရၤ ဂုာ်ကျဲးစၢးမၤလၢပှဲၤကစၢ်ယွၤအတၢ်တိာ်လၢအဂီၢ် ခီဖျိ တၢ်ဆိကမိၣ်လၢ အကမၣ်န့ၣ်လီၤ. ကွၢ် ၁ မိၤ ၁၅:၂-၃, ၁၆:၁-၂). ၁ မိၤ ၂၁:၅ ပာ်ဖျါဝဲလၢ ဖဲစီၤအၤဘြၤဟၣ် အသးအိၣ်အနံၣ် ၁၀၀ န့ၣ် အဖိခွါ စီၤအံၤစဲး အိၣ်ဖျဲၣ်ထီၣ်လၢအဂီၢ်န့ၣ်လီၤ. တၢ်ဆၢကတီၢ်လၢခံ, ဧ့ၤဘြံၤ ၁၁:၈-၁၂ အပူၤန့ၣ်,ပကထံၣ်ဘၣ် ပှၤကွဲးလံာ်ဧ့ၤဘြံၤ မၤလၤကပီၤ စီၤအၤဘြၤဟၣ်အတၢ်စူၢ်တၢ်နာ်အံၤန့ၣ်လီၤ.

တၢ်ဘၣ်အိၣ်ခိးတၢ်န့ၣ် ကမ့ၢ်တၢ်ဂ့ၢ်ကီန့ၣ်လီၤ. ဒ်စီၤအၤဘြၤဟၣ်အသိး ပအိၣ်ခိးတၢ်တဖၣ်စ့ၢ်ကီး တမ့ၢ်ကလၢထီၣ်ပှဲၤထီၣ်ဝဲဘၣ်. ဘၣ်ဆၣ် ဒ်ပဃ့ထုကဖၣ်, ဒီးနာ်န့ၢ်ယွၤအတၢ်ရဲၣ်တၢ်ကျဲၤတဖၣ်န့ၣ်ဒီး, အဝဲကဟ့ၣ်ပှၤတၢ်သူၣ်စူၤသးစူၤ တၢ်သးစွံကတုၤန့ၣ်လီၤ. လၢယွၤအပူၤန့ၣ်, ပကအိၣ်ခိးတၢ်အဂီၢ် ကြၢးဝဲဘၣ်ဝဲထီဘိန့ၣ်လီၤ.