ယွၤတ့လီၤဝဲဒၣ် ဒိကအိ ဝါဃးဖးဒိၣ်, အိၣ်ဒီးအတၢ်သ့စဲၣ်နီၤလၢ မၤဘၢမၤတဒၢအသးန့ၣ်လီၤ. စ့အလွဲၢ်ဝါဃး အဆူၣ်အဒံးတဖၣ်န့ၣ် အိၣ်ဒီးအလွဲၢ်က့ၢ်ဂီၤဖိတဖၣ်လၢအပျဲ ကမၤတၢ်ဃါဃုာ်အသးဒီးသ့ၣ်အဖံးတဖၣ် ဖဲအစီၢ်လီၤဝဲလၢ သ့ၣ်အလိၤန့ၣ်လီၤ. ဖဲဒိကအိတဖၣ်အံၤ မ့ၢ်တအဲၣ်ဒိး တၢ်ထံၣ်အီၤဘၣ်န့ၣ်ဒီး, အိၣ်ခူသူၣ်ဝဲလၢ ပှၤထံၣ်အီၤညီအလီၢ်, အိၣ်တဒၢဃါဃုာ်အသးဒီး တၢ်လီၢ်ဘၢၣ်ကဝီၤ ခီဖျိလၢအဆူၣ်အဒံးအလွဲၢ်လၢ အမၤလီၤဂာ်လီၤဘၢတၢ် အတၢ်မၤစၢၤန့ၣ်လီၤ.

ဘၣ်တဘျီဘျီန့ၣ်, ယွၤအပှၤကညီတဖၣ် လီၤဂာ်ဒ်ဒိကအိဝါဃးဖးဒိၣ်အံၤန့ၣ်လီၤ. လၢအအိၣ်ဒီးတၢ်တိာ် မ့ၢ်ဂ့ၤ, လၢအတအိၣ်ဒီး တၢ်တိာ် မ့ၢ်ဂ့ၤ, ပအိၣ်မူကျဲၣ်ကျီလၢဟီၣ်ခိၣ်, ဒီးတဘၣ်တၢ်သ့ၣ်ညါနီၣ်ပှၤ ဒ်ပှၤစူၢ်က့ၤနာ်က့ၤကစၢ်ခရံာ်တဖၣ်အသိးဘၣ်န့ၣ်လီၤ. ယိၤ ၁၇:၆ အပူၤန့ၣ် ကစၢ်ယ့ၣ်ရှူးဃ့ထုကဖၣ်တၢ်လၢ အပျဲၢ်အဘီၣ်တဖၣ်-လၢပၢ်ယွၤ ဟ့ၣ်လီၤအီၤ, “လၢဟီၣ်ခိၣ်ဖိအကျါ” ပှၤလၢ “အတိၢ်န့ၢ်လံ” ယွၤအကလုၢ်ကထါန့ၣ်လီၤ. အဆၢဖိ ၇-၁၃ ပာ်ဖျါဝဲ ဖဲလၢကစၢ်ယ့ၣ်ရှူး ပာ်လီၤတဲာ်တ့ၢ် အဝဲသ့ၣ် အကတီၢ်န့ၣ်, ဒ်သိးအပျဲၢ်အဘီၣ်တဖၣ် ကအိၣ်မူအိၣ်ဂဲၤ လၢတၢ်စီတၢ်ဆှံ, ဒီးကပၢၤဃာ် တၢ်သးခုစွံကတုၤအဂီၢ်, ဖိခွါကစၢ်ခရံာ် ဃ့ဝဲ ပၢ်ကစၢ်ယွၤ လၢကဒီတဒၢ, ဒီးကဟ့ၣ်စိဟ့ၣ်ကမီၤ အပျဲၢ်အဘီၣ်တဖၣ်အဂီၢ်န့ၣ်လီၤ. အဆၢဖိ ၁၅ န့ၣ် ကစၢ်ယ့ၣ်ရှူး စံးဝဲလၢ, “ဒ်သိး နကဟံးထီၣ်ကွံာ်အီၤလၢဟီၣ်ခိၣ်န့ၣ်, ယတဃ့ဘၣ်. မ့ၢ်လၢ နကအံးက့ၤကွၢ်က့ၤအီၤ, ဒ်သိး တၢ်အၢတၢ်သီသုတဘၣ်အီၤတဂ့ၤန့ၣ်လီၤ.” အဆၢဖိ ၁၆-၁၉ ပာ်ဖျါဝဲလၢ ယ့ၣ်ရှူးသ့ၣ်ညါ အပျဲၢ်အဘီၣ်တဖၣ် အလီၢ်အိၣ်လၢ ကဘၣ်ပာ်စီဆှံအသး, ဒီးကဘၣ်အိၣ်လီၤဆီ, အိၣ်လီၤဖးအသးဒီးဟီၣ်ခိၣ်အက့ၢ်အဂီၤတဖၣ် ဒ်သိးဒီးကအိၣ်မူမၤလၢပှဲၤတၢ်ပညိၣ်လၢ ကစၢ်ယ့ၣ်ရှူးမၢလီၤ အပျဲၢ်အဘီၣ် ကဘၣ်မၤလၢပှဲၤဝဲန့ၣ်လီၤ.

ဒ်သိးပသုတလီၤဘၣ်တၢ်လ့ပစီ လၢအမ့ၢ် တၢ်အိၣ်ဃါဃုာ်ပသးဒီးဟီၣ်ခိၣ်, ဒီးမၤလီၤမၢ်ပသးအဂီၢ် ယွၤအသးမုာ်စီဆှံမၤစၢၤပှၤသ့ဝဲန့ၣ်လီၤ. ပမ့ၢ်အးလီၤပသး ကိးမုၢ်နံၤ ဆူအအိၣ်န့ၣ်ဒီး, ပကလီၤဂာ်အါထီၣ်ဒီး ကစၢ်ယ့ၣ်ရှူးန့ၣ်လီၤ. ပမ့ၢ်အိၣ်မူအိၣ်ဂဲၤလၢ တၢ်ဃူတၢ်ဖိး, ဒီးတၢ်အဲၣ်တၢ်ကွံန့ၣ်ဒီး, သးစီဆှံကစၢ်ကထုးန့ၢ်ပှၤဂၤတဖၣ်ဆူ ခရံာ်အအိၣ် လၢပၢ်အလၤကပီၤအဂီၢ်န့ၣ်လီၤ.