ဖဲလၢယမ့ၢ်ဒံးဒၣ် ပှၤစူၢ်က့ၤနာ်က့ၤတၢ် လၢသးစၢ်အကတီၢ်, ယဆိကမိၣ်ယဲလၢ “ကစၢ်ယွၤလီၣ်ဖျါထီၣ်အသး အကတီၢ်တဖၣ်” န့ၣ် ကမ့ၢ်တၢ်လီၢ်လၢယထံၣ်ဘၣ် ကစၢ်ယ့ၣ်ရှူးန့ၣ်လီၤ. ဘၣ်ဆၣ် တၢ်ဆၢကတီၢ်ဒ်သိးအံၤတဖၣ်န့ၣ် တအိၣ်စံာ်အိၣ်ကျၢၤ မ့တမ့ၢ် တဆှၢပှၤဆူ တၢ်ဒိၣ်ထီၣ်န့ၣ်ဘၣ်. ပှၤကွဲးလံာ် လံနၣ် အဘူၣ် ကၠါမ်ရၣ် (Lina Abu Jamra) စံးဝဲဒၣ်, တၢ်လၢပှၢ်မုၢ်ကနၢအလီၢ်အကျဲန့ၣ် ပထံၣ်ဘၣ်ယွၤ ဒီးပဒိၣ်ထီၣ်ဝဲဒၣ်န့ၣ်လီၤ. လၢအတၢ်မၤလိ လံာ်စီဆှံ- “တၢ်လဲၤခီဂာ် ပှၢ်မုၢ်ကနၢ” (Through the Desert) အပူၤန့ၣ်, ကွဲးပာ်ဖျါဝဲ, “ယွၤအတၢ်ပညိၣ် လၢအဝဲစူးကါပှၢ်မုၢ်ကနၢတဖၣ် လၢပတၢ်အိၣ်မူအပူၤန့ၣ်ဒ်သိးကမၤဆူၣ်ထီၣ်ပဂံၢ်ပဘါန့ၣ်လီၤ.” အဝဲကွဲးကဒီးဝဲ, “ယွၤအတၢ်ဂ့ၤတၢ်ဝါတမံၤအံၤ နကဒိးန့ၢ်အီၤ ဖဲနတူၢ်ဘၣ် တၢ်နးတၢ်ဖှီၣ်အပူၤန့ၣ်လီၤ. တၢ်နးတၢ်ဖှီၣ် မ့ၢ်တအိၣ်ဘၣ်န့ၣ်ဒီး တၢ်ကပာ်ဖျါအုၣ်အသးလၢ ကစၢ်ယွၤအတၢ်ဂ့ၤတၢ်ဝါတသ့ဘၣ်န့ၣ်လီၤ.”
တၢ်ကီတၢ်ခဲ အလီၢ်အကျဲတဖၣ် လၢအမ့ၢ် တၢ်သူၣ်အုးသးအုး, တၢ်လီၤမၢ်, ဒီးလၢတၢ်နးတၢ်ဖှီၣ်အပူၤန့ၣ်, ဒ်သိးပကဒိၣ်ထီၣ်လၢ တၢ်စူၢ်တၢ်နာ်, ဒီးပကအိၣ်ဘူး အါထီၣ်ဒီးအီၤအဂီၢ် ယွၤမၤစၢၤပှၤန့ၣ်လီၤ. ဒ် လံနၣ် မၤလိန့ၢ်ဝဲအသိး, “လၢယွၤအတၢ်ရဲၣ်တၢ်ကျဲၤအပူၤန့ၣ် တမ့ၢ်ပှၢ်မုၢ်ကနၢ ဟဲအိၣ်ထီၣ်ဝဲလၢ တၢ်ကလီကလီဘၣ်. လၢပတၢ်ဒိၣ်ထီၣ်အပတီၢ်အဂီၢ်, မ့ၢ်တၢ်လီၢ်တၢ်ကျဲလၢ ယွၤပာ်လီၤအီၤန့ၣ်လီၤ.”
လံာ်စီဆှံအလီၢ်လံၤအပူၤန့ၣ် ယွၤနဲၣ်ဆှၢ ပၢ်ဒိၣ်သ့ၣ်တဖၣ် ဆူပှၢ်မုၢ်ကနၢန့ၣ်လီၤ. စီၤအၤဘြၤဟၣ်, စီၤအံၤစဲး, ဒီးစီၤယၤကိာ်တဖၣ်ခဲလၢာ် အိၣ်ဒီးပှၢ်မုၢ်ကနၢ အတၢ်လဲၤခီဖျိန့ၣ်လီၤ. ၂ မိၤ ၃:၁-၂, ၉-၁၀ ပာ်ဖျါဝဲ, ယွၤကတဲာ်ကတီၤ စီၤမိၤရှ့အသး လၢပှၢ်မုၢ်ကနၢအပူၤ, ဒီးကိးအီၤဒ်သိးကထုးထီၣ်က့ၤ အပှၤဂီၢ်မုၢ်လၢ တၢ်ကဲကုၢ်န့ၣ်လီၤ. ၅ မိၤ ၂:၇ န့ၣ် ပကထံၣ်ဘၣ် “န (ပှၤအံၣ်စရ့လးဖိတဖၣ်) လဲၤတၢ်လၢပှၢ်မုၢ်ကနၢဖးဒိၣ်အံၤ (န့ၣ် ယွၤ)သ့ၣ်ညါဝဲလီၤ. အနံၣ် လွံၢ်ဆံအံၤ ယွၤအိၣ်လံဒီးနၤလံ. နတဆံးလီၤစှၤလီၤဘၣ်တၢ်ဘၣ်” န့ၣ်လီၤ.
လၢပှၢ်မုၢ်ကနၢအတၢ်လဲၤန့ၣ်, ယွၤအိၣ်ဒီး စီၤမိၤရှ့ဒီးပှၤအံၣ်စရ့လးဖိတဖၣ် လၢအခီၣ်ကါတခါစုာ်စုာ် ဒီးအဝဲအိၣ်စ့ၢ်ကီးဒီး နၤဒီးယၤ လၢပပှၢ်မုၢ်ကနၢအပူၤန့ၣ်လီၤ. တၢ်လၢပှၢ်မုၢ်ကနၢအပူၤန့ၣ်, ပမၤလိန့ၢ် တၢ်နာ်, သန့ၤသးလၢယွၤန့ၣ်လီၤ. ဖဲပှၢ်မုၢ်ကနၢန့ၣ် ပထံၣ်ယွၤ ဒီးပဒိၣ်ထီၣ်န့ၣ်လီၤ.
