၁၉၅၅ နံၣ် လါယူၤလံ ၂၉ သီန့ၣ်, ကီၢ်အမဲရကၤ ဘိးဘၣ်သ့ၣ်ညါဝဲလၢ ကလဲၤတ့ပာ်ထီၣ်စဲးကဟၣ်လၢ အလဲၤတရံးမူပျီန့ၣ်လီၤ. တယံၣ်ဘၣ်ဒီး, ကီၢ်ရၢးရှၣ် စ့ၢ်ကီး ဘိးဘၣ်သ့ၣ်ညါဝဲအတၢ်ရဲၣ်တၢ်ကျဲၤလၢ ကမၤတၢ် ဒ်သိးဒီး ကီၢ်အမဲရကၤ မၤဝဲန့ၣ်လီၤ. မူပျီအတၢ်ပြၢစးထီၣ်ဝဲဒၣ်န့ၣ်လီၤ. ကီၢ်ရၢးရှၣ် ပာ်ထီၣ်ဝဲဒၣ် စပိးန့း(Sputnik) စဲးကဟၣ် တရံး မူပျီအဆိကတၢၢ်တဘ့ၣ်, ဃုာ်ဒီး ယူၢ်ရံၣ် ကၣ်ကရ့ (Yuri Gagarin) ပှၤကညီအဆိကတၢၢ်တဂၤ, လၢအလဲၤတရံး ဟီၣ်ခိၣ်ဖျၢၣ်တဝီၤန့ၣ်လီၤ. တၢ်ပြၢအံၤ လဲၤတုၤဝဲဆူ ၁၉၆၉ နံၣ်, လါယူၤလံ အသီ (၂၀), ဖဲ န့ အါစထရီ (Neil Armstrong) ပာ်လီၤဝဲအခီၣ်လီၢ်, “ခီၣ်ကါဖးဒိၣ်လၢ ပှၤဟီၣ်ခိၣ်ဖိအဂီၢ်” လၢလါအဖီခိၣ်အံၤ မၤကတၢၢ် တၢ်ပြၢအံၤန့ၣ်လီၤ. တၢ်ကမၤသကိးတၢ်အကတီၢ်အကျဲ ဟဲအိၣ်ထီၣ်, ဒီးတုၤဃီၤဆူ တၢ်ဒုးအိၣ်ထီၣ် “ထံကီၢ်ပာ်ဖှိၣ်မူပျီသန့” (International Space Station) လၢမူပျီအပူၤန့ၣ်လီၤ.

တဘျီတခီၣ် တၢ်ပြၢလိာ်သးန့ၣ် ဂ့ၤဝဲ, သဆၣ်ထီၣ်ပခံ ဒ်သိးပကမၤန့ၢ်တၢ်လၢ ပတဆိကမိၣ်တ့ၢ်ဝဲန့ၣ်လီၤ. ဘၣ်ဆၣ် လၢတၢ်မၤအသးတနီၤန့ၣ်, တၢ်ပြၢလိာ်သးအံၤမၤဟးဂီၤတၢ်န့ၣ်လီၤ. တၢ်အံၤမ့ၢ် ကရံၣ်သူး တၢ်အိၣ်ဖှိၣ်အတၢ်ကီတၢ်ခဲန့ၣ်လီၤ. မ့ၢ်လၢ တၢ်အိၣ်ဖှိၣ်အပူၤန့ၣ် အိၣ်ဒီးကရူၢ်လီၤဆီတဖုဘၣ်တဖု, လၢအဝဲသ့ၣ်အတၢ်မုၢ်လၢ်အတၢ်ကပီၤအဂီၢ်, လူၤပိာ်ခိၣ်နၢ်တဖၣ် တဂၤစူၢ်စူၢ်အခံအဃိန့ၣ်လီၤ. စီၤပီလူး ပာ်ဖျါတၢ်ဂ့ၢ်အံၤလၢ ၁ ကရံၣ် ၃:၇ အပူၤ, “ပှၤလၢအသူၣ်တၢ် တမ့ၢ်ဘၣ်တၢ်ဘၣ်, ဒီးပှၤလၢ အဖှိၣ်တၢ် တမ့ၢ်ဘၣ်တၢ်ဘၣ်, မ့မ့ၢ် ပှၤလၢအဒုးဒိၣ်ထီၣ်တၢ် ယွၤတဂၤန့ၣ် မ့ၢ်တၢ်လီၤ,” ဒီး ၁ ကရံၣ် ၃:၉ န့ၣ် မၤကတၢၢ်ဝဲလၢ “ပမ့ၢ်ယွၤအပှၤမၤသကိးတၢ်” န့ၣ်လီၤ.

ပှၤမၤသကိးတၢ်- တမ့ၢ် ပှၤပြၢမၤနၢၤလိာ်သးတဖၣ်ဘၣ်. ဒီးတမ့ၢ်ထဲ ပမၤသကိးတၢ်ဒီးပှၤဂုၤပှၤဂၤဘၣ်, မ့ၢ်ပမၤသကိးတၢ်ဒီးယွၤအနီၢ်ကစၢ်န့ၣ်လီၤ. ခီဖျိလၢယွၤအတၢ်ဟ့ၣ်စိဟ့ၣ်ကမီၤ, ဒီးအတၢ်နဲၣ်ကျဲအပူၤန့ၣ်, ဒ်ယွၤအပှၤမၤသကိးတၢ်တဖၣ်အသိး လၢတၢ်ရၤလီၤ ကစၢ်ယ့ၣ်ရှူး အတၢ်သးခုကစီၣ်, လၢယွၤအလၤကပီၤအဂီၢ် တမ့ၢ်လၢ ပမၤလၤကပီၤလီၤပသးအဂီၢ်ဘၣ်န့ၣ် ပမၤသကိးဃူဃူဖိးဖိး သ့ဝဲဒၣ်န့ၣ်လီၤ.