တၢ်ဒဲစုဟ့ၣ်ဂံၢ်ဟ့ၣ်ဘါ သီၣ်ဟူထီၣ်ဝဲဒၣ် ဖဲဖျိးစိကၠိဖိတဖၣ် လဲၤထီၣ်ဟံးန့ၢ်ဝဲဒၣ်တၢ်မၤလိမၤဒိးအတၢ်ဖျိးစိ လံာ်အုၣ်သးအခါန့ၣ်လီၤ. ဘၣ်ဆၣ် တၢ်ရဲၣ်တၢ်ကျဲၤန့ၣ် တဝံၤဒံးဘၣ်. ခိၣ်ဖး အဂၤတမံၤန့ၣ် မ့ၢ်တၢ်ဟ့ၣ်လီၤ ကၠိဖိတဖၣ် လၢအတမ့ၢ်ပှၤဖျိးစိလီၤဆီဘၣ်ဆၣ်,လၢအတၢ်မၤလိမၤဒိးအပူၤ တၢ်လဲၤထီၣ်လဲၤထီ အိၣ်အါထီၣ်အဃိန့ၣ်လီၤ. ကၠိဖိတဖၣ် အံၤ ဂုာ်ကျဲးစၢးသပှၢ်ပှၢ် ဒ်သိးအမးပတီၢ်လၢ အလီၤသ့ၣ်တဖၣ် ကဂ့ၤထီၣ်က့ၤအဂီၢ်,ဘှီဘၣ်က့ၤ သကဲာ်ပဝးလၢအတဂ့ၤတဖၣ်, မ့တမ့ၢ် အၢၣ်လီၤအီလီၤဝဲလၢ ကထီၣ်ကၠိကိးနံၤဒဲးန့ၣ်လီၤ. ကၠိဖိမိၢ်ပၢ်တဖၣ် သူၣ်ခုသးခု, ဒီးဒဲစုဟ့ၣ်ဂံၢ်ဟ့ၣ်ဘါဝဲ, ဒီးပာ်ပနီၣ်တူၢ်လိာ်ဖိသ့ၣ်တဖၣ် ဂုာ်ကျဲးစၢးလဲၤတၢ်လၢ ကျဲအဂ့ၤ- ဒီးခါလၢအပူၤကွံာ်အတၢ်လီၤတူာ်လီၤကာ်တဖၣ်န့ၣ် တထံၣ်ဝဲလၢၤဘၣ်. မ့မ့ၢ်ထံၣ်ဝဲထဲ ဖိတဖၣ်လဲၤတၢ်လၢ ကျဲအသီန့ၣ်လီၤ.
တၢ်အဒိဖိ လၢအမၤသူၣ်ဖှံသးညီတၢ်အံၤ ပာ်ဖျါထီၣ် ပပၢ်လၢမူခိၣ်တဂၤန့ၣ် ထံၣ်ပှၤဒ်လဲၣ်န့ၣ်လီၤ. ယွၤတထံၣ်ပှၤလၢပတၢ်အိၣ်မူအလီၢ်လံၤလၢၤဘၣ်. ခဲကနံၣ်အံၤ, ပၢ်ယွၤထံၣ်ပှၤဒ်အဖိတဖၣ်, ပတၢ်အိၣ်မူအသီလၢ ကစၢ်ခရံာ်အပူၤန့ၣ်လီၤ. ယိၤ ၁:၁၂ အပူၤန့ၣ် စီၤယိၤဟၣ် ကွဲးပာ်ဖျါဝဲ “ဘၣ်ဆၣ်ဒီး, ဖဲဒၣ် ပှၤလၢအတူၢ်လိာ်အီၤ, ပှၤလၢအစူၢ်က့ၤနာ်က့ၤ အမံၤတဖၣ်န့ၣ်, ဟ့ၣ်ဝဲလၢ အစိအကမီၤ, ဒ်သိးကကဲထီၣ်ယွၤအဖိလီၤ” န့ၣ်လီၤ.
မ့ၢ်တၢ်ထံၣ်အဃံအလၤတမံၤန့ၣ်လီၤ. လၢတၢ်န့ၣ်အဃိ, စီၤပီလူး ဟ့ၣ်ပလီၢ်ဝဲဒၣ် ပှၤစူၢ်က့ၤနာ်က့ၤအသီတဖၣ်လၢ အဝဲသ့ၣ်မ့ၢ်, “ပှၤလၢအသံတ့ၢ်လၢ တၢ်သရူးတၢ်ကမၣ်ဒီး တၢ်ဒဲးတူၢ်တၢ်ဒဲးဘးသုဝဲသ့ၣ်” (အ့း ၂:၁) န့ၣ်လီၤ. ဘၣ်ဆၣ် အ့း ၂:၁၀ စံးဘၣ်ပှၤ, နီၢ်နီၢ်န့ၣ်, “ပမ့ၢ်အတၢ်မၤလၢ အတ့လီၤဝဲလၢ ယ့ၣ်ရှူးခရံာ်အပူၤ, ဒ်သိးပကမၤတၢ်ဂ့ၤတဖၣ်လၢ ယွၤကတဲာ်ကတီၤပာ်လၢ ပကလဲၤတၢ်လၢအပူၤန့ၣ်လီၤ.”
လၢတၢ်ထံၣ်ဒ်သိးအံၤန့ၣ်, စီၤပ့းတရူး ကွဲးပာ်ဖျါဝဲလၢ ၁ ပ့း ၂:၉-၁၀ အပူၤ “မ့မ့ၢ်သုဝဲသ့ၣ်အံၤ, သုမ့ၢ်တၢ်အစၢၤအသွဲၣ် လၢအဘၣ်တၢ်ဃုထၢအီၤ, ပှၤလုၢ်တၢ်အဒိၣ်
စီၤပၤ, ပှၤစီဆှံတကလုာ်, ပှၤဂီၢ်မုၢ်လၢတၢ်ပှ့ၤက့ၤအီၤ, ဒ်သိးသုကလီၣ်ဖျါထီၣ် ပှၤလၢအကိးန့ၢ်သုလၢ တၢ်ခံးဆူတၢ်ကပီၤလီၤလးအပူၤ,” ဒီးမ့မ့ၢ်ခဲကနံၣ်အံၤ “သုမ့ၢ်ယွၤအပှၤတကလုာ်လီၤ” န့ၣ်လီၤ. ခီဖျိလၢယွၤအတၢ်ထံၣ်အပူၤ, ပကျဲလီၢ်လံၤတဖၣ်န့ၣ် တဘၣ်ထွဲဒီးပှၤလၢၤဘၣ်န့ၣ်လီၤ. ဒ်ယွၤထံၣ်ပှၤအသိး မ်ပကထံၣ်လီၤပသး, ဒီးလဲၤတၢ်လၢကျဲအသီန့ၣ်တက့ၢ်.
