မိၢ်တဂၤန့ၣ် ဖဲအကွၢ်ထွဲမၤစၢၤ အဖိမုၣ်လၢအဒိၣ်တုာ်ခိၣ်ပှၤတဂၤ, ဒ်သိးကဒိးန့ၢ် တၢ်ကူစါယါဘျါလၢအဂ့ၤ, ဒီးကသံၣ်ကသီလၢအဂ့ၤ, ဒီးတၢ်ကတိၤဟ့ၣ်ဂံၢ်ဟ့ၣ်ဘါလၢအဂီၢ်န့ၣ် အဝဲဃ့ထုကဖၣ်တၢ် အါနံၣ်အါလါန့ၣ်လီၤ. တသီဘၣ်တသီန့ၣ်,မိၢ်တဂၤအံၤအသးဘၣ်ကိၢ်ဘၣ်ဂီၤဝဲ, ခီဖျိလၢအဖိမုၣ် အတၢ်အိၣ်ဆူၣ်အိၣ်ချ့န့ၣ် ဂ့ၤတဘျီအၢတဘျီ, တယာ်က့ၤအဂ့ၢ် တသ့လၢၤဘၣ်အဃိန့ၣ်လီၤ. အဝဲလီၤဘှံးလီၤတီၤလၢတၢ်သးအုး, ဒီးသ့ၣ်ညါဝဲဒၣ်လၢ ကဘၣ်ကွၢ်ထွဲလီၤအသးစ့ၢ်ကီးန့ၣ်လီၤ. အတံၤသကိးတဂၤ ဟ့ၣ်ကူၣ်အီၤလၢ ကကွဲးလီၤ အတၢ်ဘၣ်ယိၣ်ဘၣ်ဘီတဖၣ်, တၢ်လၢအပၢၤဝဲတန့ၢ်တဖၣ် လၢလံာ်က့ဖိတဖၣ်အပူၤ ဒီးပာ်လီၤလၢ “ယွၤအလီခီ” အပူၤ, လၢအလီၢ်မံကပၤန့ၣ်လီၤ. တၢ်မၤယိယိဖိအံၤ တမၤဟါမၢ် တၢ်ဃၢတၢ်စံာ်လၢအသးပူၤခဲလၢာ်ဘၣ်ဆၣ်, ဖဲအထံၣ်ဘၣ် လီခီဖိအံၤန့ၣ် ကမၤသ့ၣ်နီၣ်အီၤလၢအတၢ်ဘၣ်ယိၣ်ဘၣ်ဘီတဖၣ်အံၤ အိၣ်လၢ ယွၤအလီခီအပူၤ, ဒီးတမ့ၢ်လၢ အဝဲအအိၣ်ဘၣ်န့ၣ်လီၤ.

ဒ်န့ၣ်အသိး, စီၤဒၤဝံး အထါစံးထီၣ်ပတြၢၤ အါတက့ၢ် စံး ၅၅:၁, ၁၆-၁၇ အပူၤန့ၣ်ကွဲးပာ်ဖျါဝဲ အတၢ်ကီတၢ်ခဲတဖၣ်, ဒီးပာ်လီၤဝဲဒၣ် အတၢ်ကီတၢ်ခဲတဖၣ် လၢယွၤအလီခီအပူၤန့ၣ်လီၤ. ၂ ရှမူၤ ၁၅-၁၆ ပာ်ဖျါဝဲလၢ စီၤဒၤဝံး အဖိခွါ စီၤအးဘရှါလိၣ် ဂုာ်ဟံးန့ၢ် အစိကမီၤ, အတံၤသကိး အဃံသဖ့ၤလး မၤသကိးတၢ်ဒီးအဒုၣ်အဒါ ဒ်သိး ကမၤသံအီၤန့ၣ်လီၤ. လၢတၢ်န့ၣ်အဃိ, စံး ၅၅:၁-၂, ၁၆-၁၇ အပူၤန့ၣ် ပကထံၣ်ဘၣ် “လၢမုၢ်နၤ, လၢမုၢ်ဂီၤ, လၢမုၢ်ထူၣ်န့ၣ်, စီၤဒၤဝံး ဟီၣ်ပသူဝဲဒၣ်လၢ တၢ်သးဘၣ်ဒိအပူၤ,” ဒီးကစၢ်ယွၤနၢ်ဟူအတၢ်ထုကဖၣ်န့ၣ်လီၤ. စံး ၅၅:၂၂ စံးဘၣ်ပှၤလၢ စီၤဒၤဝံး ဃုထၢ “ပာ်တၢ်လၢအဟ့ၣ်လီၤအီၤန့ၣ် လၢယွၤအလိၤ”ဒီးလဲၤခီဖျိဘၣ်ဝဲ ယွၤအတၢ်ကဟုကယာ်န့ၣ်လီၤ.

တၢ်ဘၣ်ယိၣ်ဘၣ်ဘီ, ဒီးတၢ်ပျံၤတၢ်ဖုးတဖၣ် မၤဘၣ်ဒိဆါပှၤကိးဂၤဒဲးန့ၣ်ပအၢၣ်လီၤဒူဒူဒီးတီတီသ့ဝဲဒၣ်န့ၣ်လီၤ. ဘၣ်သ့ၣ်သ့ၣ် ပကဆိကမိၣ် ဒ်စီၤဒၤဝံးပာ်ဖျါဝဲဖဲ စံး ၅၅:၆ အပူၤအသိး, “ဒီးယစံး, မ်ယအိၣ်ဒီးဒံးဆ့ ဒ်ထိၣ်လွံၢ်အသိးန့ၣ်တက့ၢ်. မ့မ့ၢ်ဒ်န့ၣ်ဒီး, ယကယူၤထီၣ်ကွံာ်, ဒီးအိၣ်ဘှံးအိၣ်သါလီၤ ယွၤမ့ၢ်ပှၤလၢအအိၣ်ဘူးဒီးပှၤ, ဒီးမ့ၢ်ထဲပှၤတဂၤဧိၤ လၢအအိၣ်ဒီးစိကမီၤ ဒ်သိးကလဲလိာ် ပတၢ်အိၣ်သးတဖၣ်န့ၣ်လီၤ. ပာ်လီၤတၢ်ခဲလၢာ်ခဲဆ့ လၢအလီခီအပူၤတက့ၢ်.”