James Innell Packer, ဘၣ်တၢ်သ့ၣ်ညါအီၤဂ့ၤဂ့ၤ ဒ် J.I. Packer, သံဝဲဒၣ် ဖဲ ၂၀၂၀ နံၣ်, တချုးလၢ အတၢ်အိၣ်ဖျဲၣ်ဆၢက့ၤ ၉၄ ဝီၤတဝီၤ ကတုၤဃီၤအဂီၢ် လိၣ်ဒၣ်ထဲ ယဲၢ်သီအကတီၢ်န့ၣ်လီၤ. ပှၤကူၣ်သ့လၢယွၤဂ့ၢ်ပီညါ, ဒီးပှၤကွဲးလံာ်တဂၤအံၤ အလံာ်လၢ အဘၣ်တၢ်သ့ၣ်ညါအဒိၣ်ကတၢၢ်, “တၢ်သ့ၣ်ညါယွၤ” (Knowing God) န့ၣ်, ဘၣ်တၢ်ဆါအီၤအါန့ၢ် လံာ်အဘ့ၣ် ၁.၅ ကကွဲၢ် စးထီၣ်လၢ တၢ်စဲးကျံးရၤလီၤအီၤန့ၣ်လီၤ. ပဲးကၣ် ဆီၣ်ထွဲမၤစၢၤ လံာ်စီဆှံ အစိအကမီၤ, ဒီးတၢ်ဒုးကဲထီၣ်တၢ်မၢဖိ, ဒီးသဆၣ်ထီၣ် ပှၤစူၢ်က့ၤနာ်က့ၤခရံာ်သ့ၣ်တဖၣ်လၢ တၢ်လီၢ်ကိးပူၤဒဲး ကအိၣ်မူတၢ်အိၣ်မူလၢ ခရံာ်အဂီၢ် သညူးသပှၢ် န့ၣ်လီၤ. ဖဲအတၢ်အိၣ်မူလၢခံအကတီၢ်န့ၣ်, တၢ်စံးဘၣ်အီၤ လၢကကတိၤလီၤတၢ်ဆူ တၢ်အိၣ်ဖှိၣ်န့ၣ်ဒီး, ပဲးကၣ် ကတိၤဝဲ တၢ်ကတိၤတကျိၤ, “မၤလၤကပီၤ ကစၢ်ခရံာ် လၢကျဲကိးဘိ” (Glorify Christ Every Way), အိၣ်ဒၣ်လံာ်မဲာ်ဖျၢၣ်လွံၢ်ဖျၢၣ်န့ၣ်လီၤ.

တၢ်ကတိၤတဖၣ်အံၤ ဒုးထံၣ်က့ၤပှၤလၢ တၢ်မၢဖိစီၤပီလူး အတၢ်အိၣ်မူ, အသးသမူ လဲၤလိၣ်အသးလီၤလီၤဆီဆီဝံၤအလီၢ်ခံန့ၣ်, လၢတၢ်သးတီအပူၤ စးထီၣ်မၤတၢ်မၤလၢ ကဘၣ်မၤဝဲ, ဒီးလၢအတၢ်မၤအစၢတဖၣ်အဂီၢ်န့ၣ် ပာ်လီၤအတၢ်နာ်လၢ ယွၤအစုပူၤန့ၣ်လီၤ. ပကထံၣ်ဘၣ် စီၤပီလူး အတၢ်ကတိၤတဖၣ်လၢ လံာ်ရိမ့ၤအပူၤန့ၣ် အိၣ်ပှဲၤဒီးယွၤဂ့ၢ်ပီညါတဖၣ်လၢ လံာ်စီဆှံအသီတကတြူၢ်အပူၤန့ၣ်လီၤ. ပဲးကၣ် မၤကတၢၢ်ဝဲဒၣ်အတၢ်ကတိၤလၢ စီၤပီလူး အတၢ်ကွဲး ဖဲ ရိမ့ၤ ၁၅:၆ အပူၤ, “မၤလၤမၤကပီၤယွၤ ပကစၢ်ယ့ၣ်ရှူးခရံာ်အပၢ်” န့ၣ်လီၤ.

စီၤပီလူး အတၢ်အိၣ်မူ မ့ၢ်တၢ်အဒိလၢ ပဝဲသ့ၣ်တဖၣ်အဂီၢ်န့ၣ်လီၤ. ပမၤလၤကပီၤ (ယူးယီၣ်) ယွၤလၢ ကျိၤကျဲအါမံၤ သ့ဝဲဘၣ်ဆၣ်, ကျဲတဘိမ့ၢ် အိၣ်မူတၢ်အိၣ်မူလၢ ယွၤပာ်လီၤဝဲဒၣ်လၢပဂီၢ်, ဒီးပာ်လီၤတၢ်အစၢတဖၣ်လၢ ယွၤလၢအတလဲၤလိာ်အသးအစုပူၤန့ၣ်လီၤ. တၢ်ကွဲးလံာ်မ့ၢ်ဂ့ၤ, တၢ်သးခုကစီၣ် အတၢ်မၤမ့ၢ်ဂ့ၤ, သိၣ်လိတၢ်လၢတီၤခၢၣ်သးကၠိမ့ၢ်ဂ့ၤ, တၢ်အံးထွဲကွၢ်ထွဲ မိၢ်ပၢ်သးပှၢ်တဖၣ်မ့ၢ်ဂ့ၤ, အိၣ်ဒီးတၢ်ပညိၣ်တမံၤဃီ, လၢအမ့ၢ် “မၤလၤကပီၤ ကစၢ်ခရံာ်လၢကျဲကိးဘိ” န့ၣ်လီၤ. ဖဲပဘါထုကဖၣ်, ဒီးဖးလံာ်စီဆှံန့ၣ် ယွၤကမၤစၢၤပှၤ လၢပကအိၣ်မူဒိကနၣ် အကလုၢ်ကထါ, ဒီးပိာ်ထွဲအခံ, လၢတၢ်မၤလၤကပီၤယွၤ ခီဖျိပတၢ်ကတိၤ, ဒီးပတၢ်ဖံးတၢ်မၤ လၢပတၢ်အိၣ်မူကိးနံၤဒဲးအပူၤန့ၣ်လီၤ.