ယသရၣ်ဒိၣ်စိလၢ လံာ်စီဆှံကၠိ, ဒီးကထၢၣ် လံ (Dr. Lee), ပာ်သူၣ်ပာ်သးဝဲလၢ ပှၤပၢၤကွၢ်ထွဲပကၠိ ဘဲကၠံၣ် (Benjie) တဂၤ, လၢတၢ်အီၣ်အီသကိး မဆါတၢ်အီၣ်အဂီၢ်န့ၣ် ကစဲၤခံဝဲဒၣ်အဃိ, ယသရၣ်ဟံးန့ၢ်ပာ်ဃာ်ဝဲ တၢ်အီၣ်အလီခီလၢအဂီၢ်န့ၣ်လီၤ. ဖဲလၢယစံးကတိၤသကိးလိာ်သးဒီး ယတံၤသကိးတဖၣ်အခါ, ပှၤပၢၤတၢ်တဂၤအံၤအဂီၢ် ဒီးကထၢၣ် လံ ဟံးန့ၢ်ကိၣ်လၢအိၣ်တ့ၢ်အကတၢၢ်တလိၣ် လၢလီခီအပူၤ ဒီးတ့ၢ်နုာ်ဝဲဒၣ် ဃီၤသၣ်အကမူၣ်လၢ ကိာ်အံၤအဖီခိၣ်န့ၣ်လီၤ. တၢ်အဲၣ်အတၢ်မၤ ဒ်သိးအံၤန့ၣ် မ့ၢ်ဝဲ လံာ်စီဆှံကၠိသရၣ် အမံၤဟူသၣ်ဖျါတဂၤ မၤဝဲဒၣ်အါမံၤအကျါတမံၤန့ၣ်လီၤ. ဒီးတၢ်လၢယထံၣ်ဘၣ်န့ၣ် ဒီးကထၢၣ် လံ အတၢ်သးတီဒီးယွၤ ပုာ်ထီၣ်ယွၤလီၤဝဲဒၣ်န့ၣ်လီၤ. အနံၣ်ခံဆံပူၤကွံာ်ဝံၤ, တၢ်လၢအဝဲမၤ, ထိၣ်ဟူးထိၣ်ဂဲၤထီၣ် ယသးအံၤ အိၣ်ဒံးဝဲဒၣ်လၢယသးပူၤအဖၢမုၢ်န့ၣ်လီၤ.

တၢ်မၢဖိ စီၤယိၤဟၣ် အိၣ်စ့ၢ်ကီးဒီးအတံၤသကိးတဂၤ လၢအထိၣ်ဟူးထိၣ်ဂဲၤဝဲ ပှၤစူၢ်က့ၤနာ်က့ၤတၢ်ဖိအါဂၤအသးန့ၣ်လီၤ. ၃ ယိၤ ၁:၃ အပူၤန့ၣ်, ပှၤစံးကတိၤပာ်ဖျါ စီၤကါယူး, ဒ်အမ့ၢ်ပှၤလၢ အသးတီဒီးယွၤ, အသးတီဒီးယွၤအကလုၢ်ကထါ, ဒီးမ့ၢ်ပှၤလဲၤတၢ်လၢ “တၢ်မ့ၢ်တၢ်တီ” အပူၤ တပယူာ်ဃီန့ၣ်လီၤ. အဆၢဖိ ၅ ပာ်ဖျါဝဲလၢ စီၤကါယူး မ့ၢ်တသ့ၣ်ညါဝဲ ပှၤဟးဝ့ၤဝီၤ စိာ်တၢ်သးခုကစီၣ်တဖၣ်ဒၣ်လဲာ် တူၢ်လိာ်မုာ်ဝဲဒၣ်န့ၣ်လီၤ. လၢတၢ်န့ၣ်အဃိ, စီၤယိၤဟၣ် တဲအီၤလၢ အဆၢဖိ ၆ အပူၤ, “နတၢ်အဲၣ်တၢ်ကွံ အဂ့ၢ်အကျိၤန့ၣ်, အဝဲသ့ၣ်တဖၣ် အုၣ်အသးလၢ တၢ်အိၣ်ဖှိၣ်အမဲာ်ညါ” န့ၣ်လီၤ. စီၤကါယူးအတၢ်သးတီဒီးယွၤ, ဒီးဆူပှၤဂၤလၢ အနာ်ကစၢ်ယ့ၣ်ရှူးတဖၣ်အံၤ ကဲထီၣ်တၢ်မၤစၢၤ လၢခါဆူညါတၢ်သးခုကစီၣ်အဂီၢ်န့ၣ်လီၤ.

ယသရၣ်အတၢ်မၤလၢ အဟဲဘၣ်တိၢ်ဘၣ်ထံးယၤ, ဒီးစီၤကါယူး အတၢ်မၤလၢ အဘၣ်ဒိဘၣ်ထံး ပှၤဂုၤပှၤဂၤအံၤ မ့ၢ်တၢ်ဒုးသ့ၣ်ညါက့ၤပှၤ, လၢအအိၣ်ဒီးတၢ်စိတၢ်ကမီၤ ဒ်သိးပကသ့ၣ်ညါလၢ ပဒုးအိၣ်ထီၣ်သ့စ့ၢ်ကီး တၢ်ဘၣ်တိၢ်ဘၣ်ထံးလၢပှၤဂၤအဂီၢ်, ယွၤကဒိးသူ ပှၤတဂၤဂၤ လၢတၢ်ကွဲန့ၢ်လွဲန့ၢ် ပှၤဂၤဆူ ကစၢ်ခရံာ်အအိၣ်န့ၣ်လီၤ. ဖဲပလဲၤတၢ်ဒီးကစၢ်ယွၤ လၢတၢ်သးတီအပူၤန့ၣ်, မ်ပကအိၣ်မူ, ဒီးမၤတၢ်ကျိၤကျဲလၢ အမၤစၢၤ ပှၤစူၢ်က့ၤနာ်က့ၤတၢ်ဖိအဂုၤအဂၤတဖၣ် ဒ်သိးကအိၣ်မူလဲၤတၢ်တီတီလိၤလိၤဒီးယွၤအဂီၢ်န့ၣ်တက့ၢ်.