ဒ်ပှၤဒိတၢ်ဂီၤတဂၤအသိးန့ၣ်, သူးမုၢ်သံၣ်ဘိ တဟ့ၣ်ဝဲခွဲးယာ်ဆူ တိၣ်နံၣ် ဘဲးကၤရိၣ် (Tony Vaccaro) ဘၣ်ဆၣ် တၢ်မၤအံၤ ဆိကတီၢ်အီၤတန့ၢ်ဘၣ်. တၢ်ဆၢကတီၢ်လၢ အလီၤပျံၤလီၤဖုး ဖဲကျိသၣ်ဒီးမျိာ်သၣ်တဖၣ် ဟဲလီၤဝဲဒ်တၢ်စူၤထံအသိး အကတီၢ်ဒၣ်လဲၣ် အဝဲဒိန့ၢ်တၢ်ဂီၤန့ၣ်လီၤ. ဝံၤန့ၣ်ဒီး, ဖဲအတံၤသကိးတဖၣ် မံၤဝဲအဆၢကတီၢ်န့ၣ်, အဝဲစူးကါ အတံၤသကိးတဖၣ် အထးခိၣ်ကုာ် ဒ်သိးကဃါဃုာ်ဝဲဒၣ် ကသံၣ်ထံလၢတၢ်ဒုးကဲထီၣ် အတၢ်ဂီၤမူအဂီၢ်န့ၣ်လီၤ. ပှၢ်လၢ်ကျါ မုၢ်နၤတၢ်ခံးသူအတီၢ်အံၤ ကဲထီၣ်ဝဲတၢ်ခံးအဒၢး ဖဲ ဘဲးကၤရိၣ် ဒုးအိၣ်ထီၣ် တၢ်ဂီၤမူလၢ အဘၣ်ထွဲဒီး တၢ်ဒုးဖးဒိၣ် ခံဘျီတဘျီလၢ ဟၢးကၢၣ် (Hurtgen) အပှၢ်လၢ်ကျါအဂ့ၢ်န့ၣ် ဘၣ်တၢ်ပာ်ပနီၣ်အီၤ တုၤခဲကနံၣ်အံၤန့ၣ်လီၤ.
စီၤပၤစီၤဒၤဝံး ဘၣ်လဲၤခီဖျိ တၢ်ဒုးတၢ်ယၤ, ဒီးတၢ်ဆၢကတီၢ်တဖၣ်လၢအခံးန့ၣ်လီၤ. ၂ ရှမူၤ ၂၂:၁ ပာ်ဖျါထီၣ်, “ယွၤ မၤပူၤမၤဖျဲး(စီၤဒၤဝံး) လၢအဒူၣ်အဒါခဲလၢာ်အစုပူၤ, ဒီးလၢစီၤစီလူးအစုပူၤ” န့ၣ်လီၤ. စီၤဒၤဝံး စူးကါဝဲဒၣ် အတၢ်လဲၤခီဖျိတဖၣ် ဒ်သိးကဒုးအိၣ်ထီၣ်တၢ်ကွဲးနီၣ်လၢ ယွၤအတၢ်တီတၢ်လိၤန့ၣ်လီၤ. ၂ ရှမူၤ ၂၂:၅ န့ၣ် စီၤဒၤဝံး စံးဝဲဒၣ်, “တၢ်သံအလပီဝါခိၣ် အိၣ်ဝးတရံးယၤ, ဒီးတၢ်မၤဟးဂီၤ အထံကျိ မၤပျံၤမၤဖုးယၤ” န့ၣ်လီၤ.
တယံာ်ဘၣ်, စီၤဒၤဝံး အတၢ်သးလီၤဘှါန့ၣ် ဆီတလဲက့ၤအသးဆူ တၢ်မုၢ်လၢ်အဂ့ၢ်န့ၣ် စီၤဒၤဝံး ပာ်ဖျါဝဲဒၣ်လၢ ၂ ရှမူၤ ၂၂:၇ အပူၤ, “တုၤယဘၣ်တၢ်ကိၢ်တၢ်ဂီၤဒီး ယကိးထီၣ်ယွၤ,…ဒီးကနၣ်ဝဲ ယကလုၢ်လၢ အနူၢ်ပူၤ” န့ၣ်လီၤ. စီၤဒၤဝံး မၤလီၤတံၢ်တၢ်စံးထီၣ်ပတြၢၤကစၢ်ယွၤ, လၢအမၤစၢၤအီၤထီဘိန့ၣ်လီၤ. အဆၢဖိ ၂၉ ပာ်ဖျါဝဲ “ယွၤယကစၢ် ကမၤကပီၤထီၣ် ယတၢ်ခံး,” ဒီးအဆၢဖိ ၃၀ န့ၣ် စီၤဒၤဝံး စံးဝဲဒၣ်လၢ “ယဃ့ၢ်နုာ်ဖျိ ပှၤတဖုလၢ နၤလံ. ယစံၣ်ကပာ် တၢ်အဒူၣ်လၢ ယကစၢ်တဂၤန့ၣ်လီၤ.”
စီၤဒၤဝံး ဘျံးကဒါက့ၤ အတၢ်ကီတၢ်ခဲတဖၣ်ဆူ တၢ်ခွဲးတၢ်ယာ်တမံၤ ဒ်သိးကဒုးသ့ၣ်ညါ အကစၢ်ယွၤ လၢအတၢ်တီတၢ်လိၤတဂၤအဂ့ၢ် ဆူဟီၣ်ခိၣ်ချၢန့ၣ်လီၤ. ဒ်စီၤဒၤဝံးအသိး, ပမၤသ့ဝဲဒၣ်န့ၣ်လီၤ. လၢတၢ်ခဲလၢာ်အဖီခိၣ်န့ၣ်, ပသန့ၤပသးလၢကစၢ်ယွၤ, လၢအမၤကပီၤထီၣ်က့ၤ ပတၢ်ခံးတဖၣ်န့ၣ်လီၤ.
