ဖဲတီၤထီကၠိဖိတဖၣ် သးဝံၣ်ဝဲဒၣ် ပှၤအၣ်ကၠံၣ်တံနါဖိ အတၢ်သးဝံၣ် “အဲၣ် စံၣ်ယဲလိၣ် ကဲတၣ် အလဲၣ်ကရံၤယၤ” (El Cielo Canta Alegria) အကတီၢ်န့ၣ် တၢ်သးခုအိၣ်ဖျါဝဲလၢ တၢ်သးဝံၣ်အပူၤန့ၣ်လီၤ. တၢ်ဟ့ၣ်ထီၣ်တခါအံၤ ယဘၣ်သူၣ်ဘၣ်သးယဲဘၣ်ဆၣ်, မ့ၢ်လၢ ယတသ့ၣ်ညါ စပ့ၣ် (Spanish)အကျိာ်အဃိ, တၢ်သးဝံၣ်အဖျၢၣ်တဖၣ်န့ၣ် ယတနၢ်ပၢၢ်ဘၣ်. ဘၣ်ဆၣ်တယံာ်ဝဲဘၣ်, ဖဲပှၤသးဝံၣ်တၢ်ဖိတဖၣ် သးဝံၣ်ထီၣ်ဝဲ “ဟါလၤ့လူယၤ” တဘျီဝံၤတဘျီန့ၣ်ဒီး ယနၢ်ဟူ တၢ်သးဝံၣ်အဖျၢၣ်လၢယနၢ်ဟူညီနုၢ်န့ၣ်လီၤ. ယနၢ်ဟူ “ဟါလ့ၤလူၤယၤ” မ့ၢ်တၢ်သးဝံၣ်စံးထီၣ်ပတြၢၤယွၤ အသီၣ်အံၤ ညီနုၢ်ပနၢ်ဟူလၢ ဟီၣ်ခိၣ်ဒီဖျၢၣ် ကျိာ်တၢ်ကတိၤအါမးအပူၤန့ၣ်လီၤ.မ့ၢ်လၢ ယအဲၣ်ဒိးသ့ၣ်ညါ တၢ်သးဝံၣ်အံၤ အဂံၢ်ထံးအဃိ, ဖဲတၢ်ဟ့ၣ်ထီၣ်အံၤဝံၤန့ၣ် ယလူၤဃုလၢ ပှာ်ဘျးစဲ, ဒီးယထံၣ်ဘၣ် တၢ်ကွဲးကျိာ်ထံက့ၤ တၢ်သးဝံၣ်အခိၣ်တီအံၤ “လၢတၢ်သးခုအဂီၢ် မူခိၣ်သးဝံၣ်တၢ်” န့ၣ်လီၤ.
လံာ်လီၣ်ဖျါ ၁၉ မ့ၢ် လံာ်စီဆှံအဆၢလၢ အမၤလၤကပီၤတၢ်သးခုအံၤအပူၤန့ၣ်-မူခိၣ်ဖိခဲလၢာ် သူၣ်ဖှံသးညီ, တၢ်လၢကမၤအသးနီၢ်နီၢ်တမံၤန့ၣ် ဘၣ်တၢ်ဒုးသ့ၣ်ညါပှၤလၢတၢ်သးဝံၣ်အံၤအပူၤ တဆံးတက့ၢ်န့ၣ်လီၤ. လၢလံာ်စီဆှံ အသီတကတြူၢ်, အကတၢၢ်တဘ့ၣ်အပူၤန့ၣ်, တၢ်မၢဖိ စီၤယိၤဟၣ်ထံၣ်ဝဲ တၢ်ထံၣ်လၢညါခီ, လၢအမ့ၢ် ပှၤဂီၢ်မုၢ်ဖးဒိၣ်ဒီးကလူးတဖၣ် အိၣ်ဖှိၣ်တပူၤဃီ, ဒီးသးဝံၣ်စံးဘျုးစံးထီၣ်ပတြၢၤ ကစၢ်ယွၤန့ၣ်လီၤ. စီၤယိၤဟၣ်, ကွဲးပာ်ဖျါထီၣ် တၢ်သးဝံၣ် စံးထီၣ်ပတြၢၤ ယွၤအစိကမီၤလၢ အမၤနၢၤကွံာ် တၢ်အၢတၢ်သီ, တၢ်တတီတလိၤ, ယွၤပၢဆှၢတၢ်လၢ ဟီၣ်ခိၣ်ဒီဘ့ၣ်, ဒီးတၢ်အိၣ်မူအထူအယိာ်ဒီးယွၤ အစိၤစိၤအဃၣ်ဃၣ်န့ၣ်လီၤ. လီၣ် ၁၉:၁,၃,၄,၆ ပာ်ဖျါဝဲလၢ, မူခိၣ်ဖိခဲလၢာ် သးဝံၣ်ပာ်ဖျါထီၣ် “ဟါလ့ၤလူယၤ” မ့တမ့ၢ် “သးဝံၣ်စံးထီၣ်ပတြၢၤယွၤ”တဘျီဝံၤတဘျီန့ၣ်လီၤ.
လီၣ် ၅:၉ ပာ်ဖျါဝဲလၢ, မုၢ်တနံၤန့ၣ် “ကယဲၢ်ပှၤအဒူၣ်, ဒီးပှၤကတိၤတၢ် အကျိာ်အကလုာ်ကလုာ်, ဒီးကယဲၢ်ပှၤဂီၢ်မုၢ်, ဒီးကယဲၢ်ပှၤအကလုာ်တဖၣ်” ကသးဝံၣ် မၤလၤကပီၤယွၤန့ၣ်လီၤ. လၢတၢ်သးခုအပူၤ ပကကိးထီၣ်စံးထီၣ်ပတြၢၤယွၤ “ဟါလ့ၤလူယၤ” လၢကျိာ်တၢ်ကတိၤအကလုာ်ကလုာ်န့ၣ်လီၤ.
