ဖဲလ့ ဒ့းက့စၢၣ် ဖၠၣ်စိမိၤ (Fairleigh Dickinson University- FDU) အပှၤလိာ်ကွဲ ဖျၢၣ်ကွံာ်နုာ် (Basketball) တဖု, ဘၣ်စးထီၣ် ဟံးန့ၢ်ဝဲဒၣ် ဖျၢၣ်ကွံာ်န့ၣ်ဒီး, ပှၤဟ့ၣ်ဂံၢ်ဟ့ၣ်ဘါတၢ်ဖိတဖၣ်ဆၢထၢၣ် ဟ့ၣ်ဂံၢ်ဟ့ၣ်ဘါ အဝဲသ့ၣ်န့ၣ်လီၤ. ပှၤလိာ်ကွဲတၢ်တဖုအံၤပှၤထံၣ်လၢ တမ့ၢ်ကမၤနၢၤတၢ်ဘၣ်န့ၣ်လီၤ. တၢ်ဆၢကတီၢ် တၢတဝီၤဒၣ်လဲာ် ပှၤလိာ်ကွဲတၢ်ဖိတဖၣ်န့ၣ် တဆိကမိၣ်လၢ ကလဲၤခီဖျိန့ၢ်ဝဲဘၣ်ဆၣ် အဝဲသ့ၣ် မၤဝဲဂ့ၤဂ့ၤန့ၣ်လီၤ. ဒီးအဝဲသ့ၣ် အနီၢ်ကစၢ်ဒၣ်ဝဲ အပှၤဒ့တၢ်အူတၢ်ဖိ တအိၣ်ဘၣ်ဒၣ်လဲၣ်န့ၣ် ခဲကနံၣ်အံၤ အဝဲသ့ၣ်နၢ်ဟူ အကၠိအတၢ်သးဝံၣ် ဟ့ၣ်ဂံၢ်ဟ့ၣ်ဘါ အဝဲသ့ၣ်န့ၣ်လီၤ. တချုးတၢ်ပြၢစးထီၣ်န့ၣ် ဒ့တိၣ် ဖၠၣ်စိမိၤ (Dayton) အပှၤဒ့တၢ်အူတၢ်ဖိတဖၣ် မၤလိၤန့ၢ်ဝဲဒၣ် FDU ဖၠၣ်စိမိၤ အတၢ်သးဝံၣ်န့ၣ်လီၤ. ဒ်အဝဲသ့ၣ် သ့ၣ်ညါဝဲအသိး ဒ့ဝဲဒၣ် တၢ်သးဝံၣ်တဖၣ် ယိယိဖိဘၣ်ဆၣ် အဝဲသ့ၣ် ဃုထၢမၤလိဝဲဒၣ် တၢ်သးဝံၣ်အံၤ လၢတၢ်မၤစၢၤ ကၠိအဂၤတဖျၢၣ်, ဒီးပှၤလိာ်ကွဲတၢ်ဖိအဂၤတဖုအဂီၢ်န့ၣ်လီၤ.
ပှၤဒ့တၢ်အူတၢ်တဖုအံၤ အတၢ်မၤန့ၣ် ပာ်ဖျါဒိတဲာ်ဝဲ တၢ်ဃူတၢ်ဖိးအတၢ်ပနီၣ်ဖျါလၢ လံာ်ဖံလံးပံၤအပူၤန့ၣ်လီၤ. စီၤပီလူး တဲဘၣ် တၢ်အိၣ်ဖှိၣ်အဆိလၢ ဖံလံးပံၤအပူၤ, ဒီးခ့ခါပဝဲနၤယၤတဖၣ်အဂီၢ်-လီၤဆီဒၣ်တၢ်န့ၣ်, မ့ၢ်လၢ တၢ်ပာ်ဖှိၣ် အဝဲသ့ၣ် တပူၤဃီလၢခရံာ်အပူၤအဃိ, ဒ် ဖံ၂:၂ ပာ်ဖျါဝဲအသိး,ပကဘၣ်အိၣ်မူလၢ တၢ်ဃူတၢ်ဖိးအပူၤ, မ့တမ့ၢ် “လၢ တၢ်သးတဖျၢၣ်ဃီ” န့ၣ်လီၤ. လၢတၢ်ကမၤ ဒ်သိးအံၤအဂီၢ်န့ၣ်, တၢ်မၢဖိစီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ်လၢ ကပာ်တ့ၢ်ကွံာ် တၢ်အဲၣ်လီၤအသးဒၣ်ဝဲ, ဒီးကဆိကမိၣ်တၢ်လၢ ပှၤဂၤအတၢ်ဘၣ်ဘျုးအဂီၢ်န့ၣ်လီၤ.
တၢ်ပာ်လုၢ်ပာ်ပှ့ၤ ပှၤဂၤအါန့ၢ် ပနီၢ်ကစၢ်စံးတၢ်န့ၣ် တအိၣ်ဟဲကဲထီၣ်အသးဒၣ်ဝဲအဃိ, အလီၢ်အိၣ်လၢ ပကဘၣ်ကွၢ်လိမၤဒိးကစၢ်ခရံာ်န့ၣ်လီၤ. ဖံ၂:၃ အပူၤန့ၣ် စီၤပီလူး ကွဲးဝဲ, “လၢတၢ်အ့ၣ်လိာ်ဆိးက့ ဒီးတၢ်ဟူထီသါလီၤ ကလီၤကလီၤန့ၣ်, မၤတၢ်နီတမံၤတဂ့ၤ. မ့မ့ၢ်လၢ တၢ်ဆီၣ်လီၤသုသးသတးဒီး, မ်ပှၤပာ်ပှၤဂၤ ဂ့ၤန့ၢ် အကစၢ်ဒၣ်ဝဲတက့ၢ်” န့ၣ်လီၤ. တၢ်ကွၢ်ဆိကမိၣ်ထဲ ပနီၢ်ကစၢ်ဒၣ်ဝဲအဂီၢ် အလီၢ်န့ၣ်, အဆၢဖိ ၄ ပာ်ဖျါဝဲလၢ,“ဆိကမိၣ်တၢ်လၢ ပှၤဂၤအဂီၢ်” လၢတၢ်ဆီၣ်လီၤသးအပူၤန့ၣ်လီၤ.
ပဆီၣ်ထွဲမၤစၢၤပှၤဂၤ ကသ့ဒ်လဲၣ်. ပမၤကသ့ ခီဖျိပဆိကမိၣ်န့ၢ်တၢ်လၢ အဝဲသ့ၣ်အတၢ်ဂ့ၤတၢ်ဝါအဂီၢ်, ခီဖျိလၢပမၤလိၤန့ၢ် တၢ်သးဝံၣ်လၢ ဟ့ၣ်ဂံၢ်ဟ့ၣ်ဘါအဝဲသ့ၣ်,မ့တမ့ၢ် ဟ့ၣ်မၤစၢၤ တၢ်လၢအဝဲသ့ၣ်လိၣ်ဘၣ်တဖၣ်န့ၣ်တက့ၢ်.
