“တမ့ၢ်ယမၤတၢ်န့ၣ်ဘၣ်” စံးတၢ်န့ၣ် မ့ၢ်တၢ်လီတၢ်ဝ့ၤတမံၤန့ၣ်လီၤ. ဘူးတ့ၢ်မးလၢ ယကပူၤဖျဲးဒီး တၢ်လီတၢ်ဝ့ၤအံၤ တုၤကစၢ်ယွၤဘၣ်တြီဃာ်ယၤန့ၣ်လီၤ. ဖဲယထီၣ် တီၤခၢၣ်သးကၠိ အကတီၢ် ယဂဲၤလိာ်ကွဲသကိးဒီးပှၤတဖု, ပခးပှၤဂၤလၢ ပီၤလၢပှၤဘၣ်အူအီၤတဖၣ် ဖဲပှၤဒုးနဲၣ်တၢ်အကတီၢ်န့ၣ်လီၤ. ပပှၤနဲၣ်တၢ်မ့ၢ် ပှၤမၤတ့ၢ်တၢ်လၢ တၢ်ဒုးကဘီသုးမုၢ်, ဒီးမ့ၢ်ပှၤဖီၣ်တၢ်သိၣ်တၢ်သီဃံးဃံးအဃိ, ယပျံၤအီၤဒိၣ်မးန့ၣ်လီၤ. လၢပမၤတၢ်အကျါ ယတံၤသကိးတဂၤန့ၣ် တဲဖျါထီၣ်ဝဲလၢ ယဂဲၤဃုာ်ဒီး အဝဲသ့ၣ်န့ၣ်ဒီး ယလီပပှၤနဲၣ်တၢ်လၢ ယတမၤဘၣ်, ဒီးယလီစ့ၢ်ကီးယပၢ်န့ၣ်လီၤ.
ဘၣ်ဆၣ် ယွၤတပျဲတၢ်လီတၢ်ဝ့ၤအံၤ ကမၤအသးဒီးယၤဆူညါဘၣ်. အဝဲဟ့ၣ်ယၤသးခီၣ်ရှ့ၣ်လၢ ယပလၢၢ်ဘၣ်က့ၤ ယတၢ်ဒဲးဘးန့ၣ်လီၤ. ယသမၢတၢ် စှၤနွံဝံၤ ယသးဆီတလဲ, ဒီးယဃ့ကညး ကစၢ်ယွၤ, ဒီးယပၢ် ဒ်သိးကပျၢ်ယတၢ်ကမၣ်န့ၣ်လီၤ. တယံာ်ဘၣ်န့ၣ် ယလဲၤဆူ ယပှၤနဲၣ်တၢ်အအိၣ်ဒီး လၢတၢ်မဲာ်ထံမဲာ်နိအပူၤ ယအၢၣ်လီၤ ယတၢ်ကမၣ်န့ၣ်လီၤ. အဝဲ သးကညီယၤ, ဒီးပျၢ်ယတၢ်ကမၣ်န့ၣ်လီၤ.
ယသးကလၢၢ်ဘၣ်လၢ ယတၢ်ဝံတၢ်ယိးဖှံထီၣ်တၢ်န့ၣ် ဂ့ၤဒိၣ်ဝဲထဲလဲၣ်န့ၣ် ယတသးပ့ၤနီၣ်နီတဘျီလၢၤဘၣ်န့ၣ်လီၤ. ယထူၣ်ဖျဲးထီၣ်လၢ တၢ်ဒဲးဘး အတယၢၢ်ဃၢ,
ဒီးသးခုသးမုာ်ထီၣ်က့ၤ အဆိကတၢၢ်တဘျီ လၢနွံတဖၣ်အပူၤန့ၣ်လီၤ. စီၤဒၤဝံး စ့ၢ်ကီး လၢအတၢ်အိၣ်မူပူၤ, ပာ်ဖျါထီၣ်ဝဲ တၢ်အကတီၢ်တဖၣ် ဖဲအထံၣ်သ့ၣ်ညါ အတၢ်ကမၣ်, ဒီးအၢၣ်လီၤဝဲဒၣ်န့ၣ်လီၤ. စံး ၃၂:၃-၅ န့ၣ် စီၤဒၤဝံး တဲဘၣ်ကစၢ်ယွၤလၢ, “ဖဲယအိၣ်ဘှီၣ်ကလာ် ဒီးယဃံလီၢ်လံၤဝဲလၢ ယကိးပသူထီၣ်သ့သ့တနံၤအဃိလီၤ. အဂ့ၢ်ဒ်အံၤ, လၢမုၢ်ဆါဆဲးလၢမုၢ်နၤန့ၣ် နစုအိၣ်ယၤလၢ ယလိၤလီၤ.” စံးကဒီးဝဲ, “ယဘိးဘၣ်သ့ၣ်ညါနၤလၢ ယတၢ်ဒဲးဘး…” န့ၣ်လီၤ.
တၢ်အမ့ၢ်အတီ မ့ၢ်တၢ်အကါဒိၣ်တမံၤလၢ ယွၤအဂီၢ်န့ၣ်လီၤ. ကစၢ်ယွၤအဲၣ်ဒိးလၢ ပကအၢၣ်လီၤ ပတၢ်ဒဲးဘးလၢအီၤ, ဒီးပကဃ့ပျၢ်ပသးလၢ ပှၤလၢ ပမၤကမၣ်ဘၣ်အီၤတဖၣ်န့ၣ်လီၤ. အဆၢဖိ ၅ န့ၣ် စီၤဒၤဝံး ပာ်ဖျါထီၣ်ဝဲ, “ဒီးနပျၢ်ကွံာ် ယတၢ်ဒဲးဘးလီၤ” န့ၣ်လီၤ. တၢ်ဂ့ၤန့ၢ် ပသ့ၣ်ညါဘၣ် တၢ်သဘျ့ ဟဲခီဖျိလၢ ကစၢ်ယွၤ ပျၢ်ပတၢ်ဒဲးဘးန့ၣ် တအိၣ်လၢဟီၣ်ခိၣ်ချၢလၢၤဘၣ်န့ၣ်လီၤ.
