တၢ်ဒုးသုး ကဘီသုးမုၢ်လီၤဆီ အခိၣ်ကျၢၢ် ဝ့လယၢၣ် မဲးရ့ဘၢၣ် န့ၣ် ဘၣ်တၢ်သ့ၣ်ညါအီၤ, ဒ်အမ့ၢ်ပှၤသုးဖိတဂၤ လၢအကတိၤလီၤတၢ်ဆူ ပှၤဖျိခီလ့ၣ်ကၠိတဖၣ်အဂီၢ်, ဘၣ်ထွဲဒီး တၢ်ထူထီၣ်က့ၤလီၢ်မံ ကိးမုၢ်ဂီၤဒဲးအဂ့ၢ်န့ၣ်လီၤ. အဝဲကတိၤလီၤတၢ်န့ၣ် ပှၤခိးကွၢ်လၢ အ့ထၢၣ်နဲး အိၣ်အကကွဲၢ် တကယၤန့ၣ်လီၤ. ဘၣ်ဆၣ်, ဝ့လယၢၣ် မဲးရ့ဘၢၣ် လၢအအိၣ်ဘှံးတ့ၢ်လံလၢတၢ်မၤတဂၤအံၤ, နီၤဟ့ၣ်ဝဲ တၢ်မၤလိအဂၤတမံၤလၢ အထိၣ်ဟူးထိၣ်ဂဲၤ ပှၤအသးန့ၣ်လီၤ. ဖဲလၢမုၢ်ထီၣ်လီၢ်ခၢၣ်သး တၢ်ဒုးတၢ်ယၤအကတီၢ်န့ၣ်, လၢတၢ်သးအုးအပူၤ မဲးရ့ဘၢၣ် အၢၣ်လီၤဝဲ ဒူၣ်ဖိထၢဖိတနီၤ လၢအတၢ်ကမၣ် တအိၣ်တဖၣ်န့ၣ် ဘၣ်တၢ်မၤသံကမၣ်အီၤအဂ့ၢ်န့ၣ်လီၤ. နာ်ဝဲလၢ ဒူၣ်ဖိထၢဖိတဖၣ်န့ၣ် တၢ်ကဘၣ်ဃ့သကွံာ်ကညးက့ၤအဝဲသ့ၣ်အဃိ, မဲးရ့ဘၢၣ် ဃ့ကညးဝဲဒူဒူဆူ ပၢ်လၢ အသးဘၣ်ဒိ, လီၤသဘှံးတဂၤလၢ ကပျၢ်အတၢ်ကမၣ်အဂီၢ်န့ၣ်လီၤ.
မဲးရ့ဘၢၣ် တဲဘၣ်အီၤ ခီဖျိလၢပှၤကတိၤကျိာ်ထံတၢ်, “ယမ့ၢ်ပှၤသုးဖိတဂၤ, ယအိၣ်ဒီးယဖိစ့ၢ်ကီးန့ၣ်လီၤ. ဒီးယသးဘၣ်ဒိဒိၣ်မးလၢ နဂီၢ်န့ၣ်လီၤ.” ပှၤတဂၤအံၤမၤဆၢက့ၤ မဲးရ့ဘၢၣ် ခီဖျိလၢတၢ်သူၣ်အိၣ်သးအိၣ်အတၢ်ဟ့ၣ် လၢအမ့ၢ် တၢ်ပျၢ်တၢ်ကမၣ်န့ၣ်လီၤ. ပှၤတဂၤအံၤ အဖိလၢ အိၣ်မူတ့ၢ်ဝဲတဂၤ စံးဘၣ်အီၤ, “တၢ်ဘျုးဒိၣ်မးလီၤ. တၢ်ထီဒုၣ်ထီဒါ လၢနလိၤန့ၣ် တအိၣ်လၢပသးပူၤနီတမံၤဘၣ်” န့ၣ်လီၤ.
ကလီး ၃:၁၃ န့ၣ် တၢ်မၢဖိစီၤပီလူးကွဲးဝဲ တၢ်ဂ့ၢ်ဘၣ်ထွဲဒီး တၢ်သးအိၣ်ဟ့ၣ်ညီတၢ် အဘျုးအဖှိၣ်အဂ့ၢ်- “မၤသးဒ်န့ၣ်ဒီး ဒ်ပှၤလၢယွၤဃုထၢအီၤ, ပှၤစီဆှံ, ဒီးပှၤလၢတၢ်အဲၣ်အီၤတဖၣ်အသိးန့ၣ် ကူထီၣ်သိးထီၣ် တၢ်သးကညီၤ, တၢ်မၤဂ့ၤတၢ်, တၢ်ဆီၣ်လီၤသး, တၢ်သးစူၤ, တၢ်ဝံသးစူၤသ့ၣ်တဖၣ်တက့ၢ်” န့ၣ်လီၤ. စီၤပီလူး သ့ၣ်ညါ ပတၢ်အိၣ်မူန့ၣ် တၢ်မၤကွၢ်တဖၣ် အိၣ်ဝဲဒၣ် ကျိၤကျဲအကလုာ်ကလုာ်န့ၣ်လီၤ. အဆၢဖိ ၁၃ န့ၣ် စီၤပီလူးသိၣ်သီပှၤကလီးစဲဖိ လၢအစူၢ်က့ၤနာ်က့ၤတၢ်တဖၣ်, “ဝံသးစူၤလိာ်သုသး ဒီးပှၤအတၢ်ကမၣ်မ့ၢ်အိၣ်ဒီး ပျၢ်လိာ်သုသးတက့ၢ်. ဒ်ခရံာ်ပျၢ်သုတၢ်အသိးန့ၣ် မၤသုဝဲဒ်န့ၣ်အသိးစ့ၢ်ကီးတက့ၢ်” န့ၣ်လီၤ.
ဒ်သိးပကအိၣ်ဒီး တၢ်သူၣ်ကညီၤသးကညီၤ, ဒီးသးလၢ အသ့ပျၢ်တၢ်ကမၣ်တဖၣ်အဂီၢ် တၢ်မနုၤမၤစၢၤပှၤလဲၣ်. ယွၤအတၢ်သူၣ်အိၣ်သးအိၣ်, ဟ့ၣ်ညီတၢ် အတၢ်အဲၣ်န့ၣ်လီၤ. လၢခံကတၢၢ် အဆၢဖိ ၁၄ န့ၣ် စီၤပီလူးစံးဝဲလၢ, “တၢ်န့ၣ်တဖၣ်ခဲလၢာ် အဖီခိၣ် ကူထီၣ်သိးထီၣ် တၢ်အဲၣ်တၢ်ကွံလၢအမ့ၢ် တၢ်လၢတၢ်ပှဲၤ အပျံၤစၢဃာ်တၢ်န့ၣ်တက့ၢ်” န့ၣ်လီၤ.
