ပှၤလိာ်ကွဲ အမဲရကၤ ဖျၢၣ်ထူ အမံၤဟူသၣ်ဖျါတဂၤ လဲၤထီၣ်ဆူပျဲၢ်စီၤခိၣ် လၢအတမ့ၢ်တၢ်လိာ်ကွဲ ဖျၢၣ်ထူပျီအလီၢ်ဘၣ်န့ၣ်လီၤ. အဝဲစံးကတိၤလီၤတၢ်ဆူ ပှၤဘၣ်လီၤဃိာ်အဂၤ သၢကယၤ အမဲာ်ညါ, ဘၣ်ထွဲဒီးတၢ်ဂ့ၢ်လၢ လံာ်ယရှါယၤအတၢ်ကွဲး ဖဲအဲဘၢကလ့း တၢ်ဘှီဂ့ၤတကဲာ်ပဝးအလီၢ် (ဃိာ်) ဖဲဝ့ၢ်မဲၣ်အါမံၣ်, ကီၢ်စဲၣ်ဖလီရံၣ်ဒၢ်န့ၣ်လီၤ.
အကတီၢ်ဖိအံၤ တမ့ၢ်တၢ်ပာ်ဖျါ ပှၤလိာ်ကွဲတၢ်မံၤဟူသၣ်ဖျါတဂၤအံၤအဂ့ၢ်လၢ မၤဟူးဝးပှၤအသးဘၣ်, မ့မ့ၢ် သးသမူအါမးလၢအသူၣ်ကၢ်သးလီၤ ဒီးသူၣ်ဘၣ်ဒိသးဘၣ်ထံးတဖၣ် အဂ့ၢ်န့ၣ်လီၤ. ဖဲတၢ်ဆၢကတီၢ်လီၤဆီအံၤန့ၣ် ယွၤလီၣ်ဖျါထီၣ်အသး လၢဃိာ်အတၢ်စၢဃာ်ထးဘိတဖၣ် အလီၢ်ခံန့ၣ်လီၤ. ပှၤလၢအဃုသ့ၣ်ညါတၢ်တဂၤ စံးဝဲ, “တၢ်ဘူၣ်တၢ်ဘါအလီၢ်အံၤ ဟူးဝးထီၣ်ဝဲလၢ တၢ်ဘူၣ်ထီၣ်ဘါထီၣ် ဒီးတၢ်စံးထီၣ်ပတြၢၤအကလုၢ်န့ၣ်လီၤ.” ပှၤတဖၣ် ဟီၣ်သကိး, ဒီးထုကဖၣ်သကိးတၢ်န့ၣ်လီၤ. ဖဲတၢ်ဘါဝံၤန့ၣ် ပှၤဃိာ်ဖိ ခံဆံနွံဂၤ ဟ့ၣ်လီၤအသးဆူ ကစၢ်ခရံာ်အစုပူၤန့ၣ်လီၤ.”
ခီဖျိလၢကျဲတဘိဘိန့ၣ်, ပဝဲနၤယၤခဲလၢာ် ပစၢဃာ်လီၤက့ၤပသးလၢ ဃိာ်လၢပမၤဒၣ်ပဝဲ, ပဘၣ်အိၣ်လၢ ပတၢ်သးကွံ, ပတၢ်အဲၣ်လီၤပသး, ဒီးတၢ်သးစဲထီ လၢအမ့ၢ် တၢ်စၢဃာ်ထးဘိတဖၣ်အလီၢ်ခံန့ၣ်လီၤ. ဘၣ်ဆၣ် လၢတၢ်လီၤလိာ်လီၤလးအပူၤန့ၣ် ယွၤ လီၣ်ဖျါထီၣ်အသးန့ၣ်လီၤ. ဖဲလၢမုၢ်တဂီၤအံၤ လၢဃိာ်ပူၤန့ၣ် တၢ်ကလုၢ်ထူ ဖျါဖဲ ယရှါ ၄၃:၁၉ န့ၣ် စံးဝဲ, “ယမၤတၢ်အသီတမံၤလီၤ. ခဲကနံၣ်အံၤ ကမဲထီၣ်လီၤ. သုတသ့ၣ်ညါဘၣ်ဧါ.” လံာ်စီဆှံတတီၤအံၤ ဟ့ၣ်ဂံၢ်ဟ့ၣ်ဘါပှၤ လၢအဆၢဖိ ၁၈ န့ၣ် “တၢ်လၢအခီၣ်ထံးတဖၣ်, သ့ၣ်နီၣ်ထီၣ်က့ၤအီၤတဂ့ၤ, ဒီးတၢ်လၢပျၢၤလၢသီတဖၣ်, ဆိကမိၣ်လၢအဂ့ၢ်တဂ့ၤ”လီၤ. မ့ၢ်လၢ အဆၢဖိ ၂၅ န့ၣ် ကစၢ်ယွၤစံးဝဲ, “ယဲဒၣ်အံၤ ယတြူာ်ကွံာ် နတၢ်သရူး နတၢ်ကမၣ်… ယတသ့ၣ်နီၣ်ထီၣ်က့ၤဘၣ် နတၢ်ဒဲးဘးဘၣ်” န့ၣ်လီၤ.
အဆၢဖိ ၁၁ န့ၣ် ယွၤပာ်ဖျါဝဲ ကဆှီဒီဖိ, “လၢယၤအမဲာ်ညါန့ၣ် တၢ်အုၣ်က့ၤခီၣ်က့ၤတအိၣ်ဘၣ်” န့ၣ်လီၤ. အိၣ်ဒၣ် ပကဟ့ၣ်လီၤပသးဆူ ကစၢ်ခရံာ် အစုပူၤ, ဒ်သိးပကဘၣ်တၢ်မၤပူၤဖျဲးပှၤအဂီၢ်န့ၣ်လီၤ. ပဝဲတနီၤ အလီၢ်အိၣ်ဝဲလၢ ပကဘၣ် ဟ့ၣ်လီၤပသးဆူ ကစၢ်ခရံာ်, ပဝဲတနီၤပဟ့ၣ်လီၤသး ဝံၤလံဘၣ်ဆၣ်, အလီၢ်အိၣ်လၢ တၢ်ကဒုးသ့ၣ်နီၣ်က့ၤပှၤ လီၤတံၢ်လီၤဆဲးလၢ ပသးသမူအကစၢ် မ့ၢ်မတၤလဲၣ်န့ၣ်လီၤ. ပဘၣ်တၢ်မၤလီၤတံၢ်ပှၤလၢ ယွၤကမၤ “တၢ်အသီ” နီၢ်နီၢ် ခီဖျိကစၢ်ခရံာ်န့ၣ်လီၤ. လၢတၢ်န့ၣ်အဃိ, မ်ပကွၢ်ဒီးထံၣ်သကိး တၢ်လၢ ကဟဲထီၣ်တဖၣ်တက့ၢ်.
