တလးမူးပိာ်မုၣ်ဃံလၤတဂၤန့ၣ် ဖီၣ်စှီၤဃာ်အပၢ် လၢအပာ်ကဖၢအသးအစု, ဒီးအိၣ်ခိးကတဲာ်ကတီၤပာ်အသး, ဒ်သိးကလဲၤထီၣ်ဝဲဆူပျဲၤစီၢ်ခိၣ်န့ၣ်လီၤ. ဘၣ်ဆၣ် အဖိဒိၣ်ခွါဖိ လၢအသးအိၣ်တဆံသၢလါတဂၤ ကဘၣ်ဟဲနုာ်လီၤဆိဝဲဒၣ်န့ၣ်လီၤ. တၢ်လၢကဘၣ်စိာ် တၢ်ဖျီပသံးအလီၢ်န့ၣ် ပှၤမၢအစိာ် လံာ်စီဆှံန့ၣ်လီၤ. ဒ်အမ့ၢ် ပှၤစူၢ်နာ် ကစၢ်ယ့ၣ်ရှူး, ဒီးဟ့ၣ်လီၤအသးလၢာ်လၢာ်ဆ့ဆ့အသိး, ခီဖျိလၢတၢ်စိာ်လံာ်စီဆှံအံၤ, တလးမူးပိာ်မုၣ်ပိာ်ခွါခံဂၤ အဲၣ်ဒိးပာ်ဖျါထီၣ် အတၢ်အဲၣ်ဘၣ် လံာ်စီဆှံန့ၣ်လီၤ. လၢတၢ်နိးတၢ်ဘျး တအိၣ်ဘၣ်အပူၤန့ၣ် ဖိသၣ်အံၤ လဲၤတုၤဝဲဆူ သရိာ်အမဲာ်ညါန့ၣ်လီၤ. ဖိသၣ်ဆံးအမဲအလီၢ်ဖိတဖၣ်အိၣ်ဖျါဝဲဒၣ်လၢ လံာ်စီဆှံ တၢ်ဖံးအကုခိၣ်အလိၤန့ၣ်, ကဲထီၣ်တၢ်ဟ့ၣ်ဒိဟ့ၣ်တဲာ်အဂီၢ်န့ၣ်လီၤ. ပှၤလၢအစူၢ်က့ၤနာ်က့ၤကစၢ်ခရံာ်တဖၣ်, မ့တမ့ၢ် ပှၤသ့ၣ်တဖၣ်လၢအဲၣ်ဒိးသ့ၣ်ညါအါထီၣ်ကစၢ်ယ့ၣ်ရှူးအဂ့ၢ်န့ၣ် ကလ့ၣ်ကွၢ်, ဒီးကယုမၤလိသ့ၣ်ညါ လံာ်စီဆှံအဂီၢ်, မ့ၢ်တၢ်အိၣ်ဖျါတမံၤန့ၣ်လီၤ.
ထါစံးထီၣ်ပတြၢၤ ၁၁၉ မၤလၤကပီၤ လံာ်စီဆှံအလုၢ်အပှ့ၤအလၢအပှဲၤန့ၣ်လီၤ. အဆၢဖိ ၁ ပာ်ဖျါဘိးဘၣ်သ့ၣ်ညါဝဲ တၢ်ဆိၣ်ဂ့ၤဘၣ်ထွဲဒီး ပှၤလဲၤတၢ်လၢယွၤအတၢ်သိၣ်တၢ်သီအပူၤအဂ့ၢ်ဝံၤ, လၢအတၢ်အဲၣ်ဘၣ် ယွၤကလုၢ်ကထါ, ဒီးလၢတၢ်သးဆူၣ်ဖးဒိၣ်အပူၤန့ၣ်, ပှၤကွဲးထါ ကွဲးပာ်ဖျါဝဲ လၢထါအကျိာ်, လၢအဆၢဖိ ၁၅၉ အပူၤ “ယအဲၣ် နတၢ်မၤလိာ်တဖၣ် ဒ်လဲၣ်ဒ်လဲၣ်န့ၣ် ကွၢ်ဆိကမိၣ်တက့ၢ်, ” လၢအဆၢဖိ ၁၆၃ န့ၣ်, “တၢ်ကတိၤကဘျံးကဘျၣ်န့ၣ် ယသးဟ့အီၤ, ဒီးယသးဘၣ်အၢအီၤလီၤ. မ့မ့ၢ် နတၢ်သိၣ်တၢ်သီန့ၣ် ယအဲၣ်အီၤလီၤ,” ဒီးအဆၢဖိ ၁၆၇ န့ၣ် ကွဲးဝဲ “နတၢ်အုၣ်အသးတဖၣ်န့ၣ် ယတိၢ်န့ၢ်လၢယသး, ဒီးယအဲၣ်အီၤ ဒိၣ်ဒိၣ်ကလဲာ်” န့ၣ်လီၤ.
ပကပာ်ဖျါထီၣ် ပတၢ်အဲၣ်ယွၤ, ဒီးပတၢ်အဲၣ်ယွၤအကလုၢ်ကထါ လၢပတၢ်အိၣ်မူအပူၤဒ်လဲၣ်. ကျိၤကျဲတဘိလၢ တၢ်မၤကွၢ် ပတၢ်အဲၣ်ကစၢ်ယွၤန့ၣ် ခီဖျိလၢပကသံကွၢ်တၢ်သံကွၢ်လၢ, မ့ၢ်ယအီၣ်အီ (နီၢ်သးအဂီၢ်) တၢ်မနုၤတဖၣ်လဲၣ်. ယွၤအကလုၢ်ကထါလၢအဝံၣ်အဆၢတဖၣ်န့ၣ် မ့ၢ်ယဂံၢ်ဘျဲး ဆိကမိၣ်ထံလံဧါ. မ့ၢ်ဝံၤန့ၣ်ဒီး, တူၢ်လိာ်တၢ်ကွဲမုာ် ဒ် စံး ၃၄:၈ ပာ်ဖျါဝဲ, “လ့ၣ်ကွၢ်, ဒီးထံၣ်လၢယွၤမ့ၢ်တၢ်ဂ့ၤန့ၣ်တက့ၢ်” အသိးန့ၣ်လီၤ.
