ကၠိနံၣ် အံၣ်ရဲးစၢၣ် ထါဒၢ် (Joni Eareckson Tada) တဲဝဲ အတံၤသကိး ရံးခၣ် (Rika) အဂ့ၢ်န့ၣ်, ပာ်ဖျါလီၤဆီဝဲ အတံၤသကိး “အတၢ်စူၢ်တၢ်နာ် ကစၢ်ယွၤ အဒိၣ်အယိာ်, ဒီးဘၣ်တၢ်မၤကွၢ်အီၤ ယံာ်ယံာ်ထၢထၢအဂ့ၢ်,” ဒီးဒုးအိၣ်ထီၣ်ဝဲ အတၢ်တူၢ်တၢ်န့ၢ်ခီၣ်တၢ်ကဲအဂ့ၢ် ဖဲတူၢ်ဘၣ်တၢ်ဆါထၢ လၢမၤစှၤလီၤအဂံၢ်ဘါန့ၣ်လီၤ. ၁၅ နံၣ်ဘျဲၣ်အတီၢ်ပူၤန့ၣ်, ရံးခၣ် ဘၣ်အိၣ်ဝဲလၢအချၢ, အဲၣ်ဒိးကွၢ်ဝဲ လါဖိလၢအပဲတြီဖိဒၣ်လဲာ် မ့ၢ်တၢ်ဂ့ၢ်ကီလၢအဂီၢ်န့ၣ်လီၤ. ဘၣ်ဆၣ် အတၢ်မုၢ်လၢ်တလီၤမၢ်ဘၣ်. အဝဲနာ်ကစၢ်ယွၤ, ဖးဒီးမၤလိ ယွၤအကလုၢ်ကထါ, ဒီးဒ်ကၠိနံၣ်ပာ်ဖျါဝဲအသိး, “ဖဲတၢ်ဒုးတၢ်ယၤအဆူၣ်ကတၢၢ်အကတီၢ် လၢတၢ်ထီဒါ တၢ်သးဟးဂီၤဖးဒိၣ်အဂီၢ်, ကဘၣ်ဆၢထၢၣ်ဂၢၢ်ကျၢၤဒ်လဲၣ်န့ၣ် ရံးခၣ် သ့ၣ်ညါဝဲဒၣ်န့ၣ်လီၤ.”
ကၠိနံၣ် မၤဘၣ်ထွဲဝဲ ရံးခၣ် အတၢ်ပာ်သးစွံကတုၤအံၤလၢ စီၤပၤစီၤဒၤဝံး အစိၤ, အပှၤသုးဖိ စီၤအလၤဧစၢ်, ဂ့ၢ်လိာ်ဝဲလၢ ကဃ့ၢ်ပူၤဖျဲးအသး လၢပှၤဖလ့ရှသးဖိအစုပူၤန့ၣ်လီၤ. အဝဲကဘၣ်က့ၤပိာ်ထွဲ ပှၤသုးဖိတဖၣ်လၢ ဂုၤက့ၤအသးဆူတၢ်လီၢ်ခံအလီၢ်န့ၣ်, ၂ ရှမူၤ ၂၃:၁၀ ပာ်ဖျါဝဲလၢ, “အလၤဧ့စၢ် ဂဲၤဆၢထၢၣ်ဝဲ, ဒီးကျီကွံာ် ပှၤဖလ့ရှသးဖိတုၤအစုဘှံးဒီးအစုစဲဘူးဒီးအနး” န့ၣ်လီၤ. ခီဖျိလၢကစၢ်ယွၤအစိကမီၤအဃိ, လံာ်စီဆှံ ပာ်ဖျါဝဲ “တၢ်လၢမုၢ်တနံၤန့ၣ် ယွၤအုၣ်က့ၤခီၣ်က့ၤတၢ်ဖးဒိၣ်” န့ၣ်လီၤ. ကၠိနံၣ် ထံၣ်သ့ၣ်ညါဝဲဒၣ်လၢ, ဒ်စီၤအလၤဧစၢ် ဟံးဃာ်အနးလၢ တၢ်ပာ်လီၤသးကျၢၤမုဆှုအသိး, ရံးခၣ် ဟံးဃာ်ဂၢၢ်ကျၢၤ သးစီဆှံ အနး လၢအမ့ၢ် ယွၤအကလုၢ်ကထါ, ဒ် အ့း ၆:၁၇ ပာ်ဖျါဝဲအသိးန့ၣ်လီၤ. လၢတၢ်န့ၣ်အဃိ, ရံးခၣ် ဃုထံၣ်န့ၢ် တၢ်ဂံၢ်တၢ်ဘါ လၢယွၤအပူၤန့ၣ်လီၤ.
လၢတၢ်အိၣ်ဆူၣ်အိၣ်ချ့သူၣ်မုာ်သးခုအကတီၢ်မ့ၢ်ဂ့ၤ, ခီဖျိလၢတၢ်ဆါထၢအဃိ ပဘၣ်ဒုးတၢ်ဒီးတၢ်သးဟးဂီၤဖးဒိၣ်အကတီၢ်မ့ၢ်ဂ့ၤန့ၣ်, ဒ်သိးကစၢ်ယွၤကမၤယိာ်ထီၣ် ပတၢ်မုၢ်လၢ်, ယွၤကမၤစၢၤပှၤ ဒ်သိးဒီးပကတူၢ်တၢ်ခီၣ်တၢ်ကန့ၢ်အဂီၢ်, ပဝဲနၤယၤစ့ၢ်ကီး ပကွၢ်ထီၣ်ဆူ ယွၤအအိၣ်သ့ဝဲန့ၣ်လီၤ. ပဃုထံၣ်န့ၢ် ပဂံၢ်ပဘါ လၢကစၢ်ခရံာ်အပူၤန့ၣ်လီၤ.
