သးပှၢ်ပိာ်ခွါတဂၤ အဟံၣ်ဃၢၤန့ၣ် မိၢ်လၢအဝၤတအိၣ်တဂၤ အိၣ်ဆိးဝဲဒၣ် အါန့ၢ်ယဲၢ်နံၣ်လံန့ၣ်လီၤ. ဘၣ်တနံၤန့ၣ် ပိာ်မုၣ်အတၢ်အိၣ်ဆိး အတၢ်အိၣ်မူအတၢ်ဂ့ၤတၢ်ဝါအဂီၢ် ပှၤသးပှၢ်အံၤ ဘၣ်ယိၣ်ဝဲအဃိ လဲၤစံၢ်ဝဲ ပိာ်မုၣ်အဟံၣ်တြဲၤအဒၢလွဲၢ်ဖိ ဒီးစံးဝဲ, “ယတထံၣ်ဘၣ်နၤ အိၣ်တနွံလံ. ယဟဲသံကွၢ်နၤ မ့ၢ်နအိၣ်မုာ်ကစီဒီဧါန့ၣ်လီၤ.” ပှၤသးပှၢ်တဂၤအံၤ အတၢ်ဟဲသံကွၢ်အီၤန့ၣ် ကဲထီၣ် တၢ်ဂံၢ်တၢ်ဘါလၢ ပိာ်မုၣ်အံၤအဂီၢ်န့ၣ်လီၤ. ဖဲအသးစၢ် အကတီၢ်, မ့ၢ်လၢအပၢ်တအိၣ်လၢၤဘၣ်အဃိ, စံးဘျုးစံးဖှိၣ်ဘၣ်ဝဲလၢ အအိၣ်ဒီးသးပှၢ်သူၣ်ဂ့ၤသးဝါတဂၤအံၤ လၢအကွၢ်ထွဲအီၤ, ဒီးကွၢ်ထွဲအပှၤဟံၣ်ဖိအဃိန့ၣ်လီၤ.

တၢ်အဲၣ်တၢ်သးကညီၤအတၢ်ဟ့ၣ်လၢ ပဟ့ၣ်ကလီအီၤ, ဒီးလၢပှၤဒိးန့ၢ်တၢ်အဂီၢ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်တမံၤအံၤ ဖဲအလဲၤတလၢကွံာ် တၢ်သူၣ်ဂ့ၤသးဝါအကတီၢ်န့ၣ်, ပစံးအီၤသ့လၢ, ပမၤတၢ်ခ့တၢ်ပှၤအတၢ်မၤလၢပှၤဂၤအဂီၢ်, ခီဖျိတၢ်နီၤဟ့ၣ် ကစၢ်ခရံာ်အတၢ်အဲၣ်ဆူအဝဲသ့ၣ်အအိၣ်န့ၣ်လီၤ. ပှၤကွဲးလံာ် စံးဝဲဒၣ်လၢ ဧ့ၤဘြံၤ ၁၃:၁၅ အပူၤ, ပှၤလၢအစူၢ်က့ၤနာ်က့ၤကစၢ်ယ့ၣ်ရှူးတဖၣ်န့ၣ် ကြၢး “ပာ်ထီၣ်တၢ်လုၢ်စံးထီၣ်ပတြၢၤယွၤတဘိယူၢ်ဃီ ဒ်ပစံးတၢ်အသိး, ပထးခိၣ်အတၤသၣ်လၢ တၢ်အၢၣ်လီၤအီလီၤအမံၤ” န့ၣ်လီၤ. ဝံၤန့ၣ်ဒီး, ပှၤကွဲးလံာ် မၤလိာ်အဝဲသ့ၣ်လၢ ကအိၣ်မူပိာ်ထွဲ အတၢ်စူၢ်တၢ်နာ်အခံ, ဒီးအဆၢဖိ ၁၆ န့ၣ် စံးဝဲ, “ဘၣ်ဆၣ်ဒီး တၢ်မၤဂ့ၤတၢ်ဒီးတၢ်ဟ့ၣ်ညီတၢ်န့ၣ် သးပ့ၤနီၣ်တဂ့ၤ. အဂ့ၢ်ဒ်အံၤ တၢ်လုၢ်ဒ်န့ၣ်တဖၣ်န့ၣ် ဘၣ်ယွၤအသးလီၤ” န့ၣ်လီၤ.

တၢ်ဘူၣ်ထီၣ်ဘါထီၣ် ကစၢ်ယ့ၣ်ရှူး ခီဖျိလၢတၢ်အၢၣ်လီၤအမံၤန့ၣ် မ့ၢ်တၢ်လၢအမၤမုာ်ပသး, ဒီးမ့ၢ်ခွဲးယာ်လီၤဆီလၢပဂီၢ်န့ၣ်လီၤ. ဘၣ်ဆၣ်, ပမ့ၢ်အဲၣ်တၢ် ဒ်ကစၢ်ယ့ၣ်ရှူးအသိးန့ၣ်ဒီး, မ့ၢ်ဒၣ်ပဒုးနဲၣ် ပတၢ်အဲၣ်တံၢ်နီၢ်လၢ ကစၢ်ယွၤအဂီၢ်န့ၣ်လီၤ. ပကဃ့ သးစီဆှံကစၢ်လၢ ကဒုးသ့ၣ်ညါပှၤတၢ်အခွဲးအယာ်တဖၣ်, ဒီးကဟ့ၣ်စိဟ့ၣ်ကမီၤပှၤ, လၢပှၤဂၤအတၢ်ဂ့ၤတၢ်ဝါအဂီၢ်, ပကအဲၣ်ပဟံၣ်ဖိဃီဖိဃုာ်ဒီးပှၤဂၤ တဖၣ်န့ၣ်လီၤ. ဖဲပမၤကစၢ်ယွၤအတၢ်မၤ အကတီၢ်ဒ်သိးအံၤန့ၣ်, ပဟ့ၣ်ခီဟ့ၣ်နီၤ ကစၢ်ယ့ၣ်ရှူးအဂ့ၢ် ခီဖျိလၢတၢ်အဲၣ်အတၢ်ကစီၣ်, လၢအစိကမီၤဒိၣ်အံၤ လၢပတၢ်အိၣ်မူအိၣ်ဂဲၤအပူၤန့ၣ်လီၤ.