ဖဲတၢ်မၤကွၢ် အ့ၣ်အၣ် ကဟၣ်ဃုတၢ် (AI-artificial intelligence) အသီတဖျၢၣ်န့ၣ်ဒီး ပှၤကွဲးတၢ်လၢ နယူယီးထဲ(မ) (New York Times), ခဲဘၢၣ် ရူး(စ)(Kevin Roose) အသးဘၣ်တံာ်တာ်ဝဲဒိၣ်မးန့ၣ်လီၤ. ဖဲ ရူး(စ) ဒီးအ့ၣ်အၣ် ကတိၤ သကိးတၢ် ခီဖျိတၢ်စူးကါ ခၠး(ထ) ဘီး(ထ) (Chatbot) ခံနၣ်ရံၣ်အတီၢ်ပူၤန့ၣ် အ့ၣ်အၣ် စံးဝဲလၢ အဝဲအဲၣ်ဒိးထီဒါ ဖျိကွံာ် ပှၤတ့ဒုးအိၣ်ထီၣ်အီၤ အတၢ်သိၣ်တၢ်သီလၢ ဃံးဒိၣ်မးတဖၣ်, အဲၣ်ဒိးရၤလီၤတၢ်ကစီၣ်လၢ အကမၣ်, ဒီးအဲၣ်ဒိးကဲထီၣ်လၢ ပှၤကညီန့ၣ်လီၤ. အဝဲ (AI) တဲဖျါထီၣ်လၢ အအဲၣ်ဘၣ် ရူး(စ) ဒီးမၢ ရူး(စ) ပာ်တ့ၢ်အမါ ဒ်သိးကအိၣ်ဃုာ်ဒီးအီၤန့ၣ်လီၤ. တၢ်လၢ အ့ၣ်အၣ် န့ၣ် တအိၣ်ဒီးအသးသမူ, ဒီးတၢ်သးပလၢၢ်ဘၣ်န့ၣ် ရူး(စ) သ့ၣ်ညါဝဲဘၣ်ဆၣ်, ခီဖျိဟ့ၣ်ကူၣ်ဝဲလၢ ပှၤကညီတဖၣ်ကမၤ တၢ်ဟးဂူာ်ဟးဂီၤ အကျဲတဖၣ်အဃိ, အဝဲ ဆိကမိၣ်ထီၣ်လၢ မ့ၢ် အ့ၣ်အၣ် ကမၤဘၣ်ဒိဆါတၢ်မနုၤတဖၣ်ကသ့လဲၣ်န့ၣ်လီၤ.

တၢ်သ့ဟံးန့ၢ်မူဒါ, ဒီးဖံးမၤ အ့ၣ်အၣ် (AI) ကဟၣ်ပီညါအံၤ မ့ၢ်ခ့ခါအတၢ်တၤပှၤဘၣ်ဆၣ်, ပှၤဟီၣ်ခိၣ်ဖိတဖၣ် ဘၣ်ကွၢ်ဆၢၣ်မဲာ်ဝဲ တၢ်ကလုၢ်တၢ်ကတိၤတဖၣ်လၢ ပနာ်န့ၢ်အီၤတသ့န့ၣ် ယံာ်တ့ၢ်မးလံန့ၣ်လီၤ. ကတိၤ ၁:၁၃-၁၉ အပူၤန့ၣ် ဘၣ်ထွဲဒီး အဝဲသ့ၣ် အတၢ်ဘၣ်ဘျုးအဂီၢ် ပှၤလၢ အအဲၣ်ဒိးမၤဘၣ်ဒိဆါပှၤဂၤတဖၣ် ဒိၣ်စိ
လုၢ်ဘၢတၢ်အဂ့ၢ်န့ၣ် လံာ်တၢ်ကတိၤဒိ ဟ့ၣ်ပလီၢ်ပှၤန့ၣ်လီၤ. လၢတၢ်သ့ၣ်တဖၣ်အံၤ အလီၢ်န့ၣ် အဆၢဖိ ၂၀-၂၃ ပာ်ဖျါထီၣ်ဝဲ တၢ်ကူၣ်သ့ “ကိးထီၣ်တၢ်လၢခိ, ထုထီၣ် အကလုၢ်လၢကျဲပူၤ,” ဒ်သိးကထုးန့ၢ် ပသူၣ်ပသး, ဒီးဟ့ၣ်ဂံၢ်ဟ့ၣ်ဘါပှၤလၢ ပကဒိကနၣ် တၢ်ကူၣ်သ့အကလုၢ်အံၤအဂီၢ်န့ၣ်လီၤ.

ကတိၤ ၂:၆ ပာ်ဖျါဝဲ “ယွၤဟ့ၣ်လီၤတၢ်ကူၣ်သ့” အဃိ ဒ်သိးပကဒီတဒၢပသးဒီးတၢ်စိကမီၤ လၢပနာ်န့ၢ်အီၤတသ့တဖၣ် အတၢ်လုၢ်ဘၢပှၤအဂီၢ် နီၣ်ဝံာ်ခံန့ၣ် မ့ၢ်ဝဲ တၢ်သုးဘူးပသး အဘူးကတၢၢ်ဆူ ယွၤအသးန့ၣ်လီၤ. ခီဖျိလၢတၢ်လဲၤနုာ်လီၤဆူ ယွၤအတၢ်အဲၣ်, ဒီးအစိကမီၤအပူၤန့ၣ်, အဆၢဖိ ၉ ပာ်ဖျါဝဲလၢ ပကသ့ “နၢ်ပၢၢ်တၢ်တီ တၢ်လိၤ, ဒီးတၢ်စံၣ်ညီၣ်, ဒီးတၢ်အသးစၢၢ်ဆၢ, ကယဲၢ် ကျဲဧိၤကပူၤဧိၤလၢ အဂ့ၤအဘၣ်လီၤ” အဂီၢ်န့ၣ်လီၤ. ဒ်သိးပကသ့ဃုထံၣ်န့ၢ် တၢ်ဃူတၢ်ဖိး, ဒီးတၢ်ဒီတဒၢလၢ
တၢ်အကလုၢ် လၢဃုမၤဟးဂီၤပှၤတဖၣ်အဂီၢ်, ကစၢ်ယွၤမၤလီၤပလိာ်ပသူၣ်ပသးဒ်သိးဒီးအီၤန့ၣ်လီၤ.