ပိာ်မုၣ်ခံဂၤ ဆ့ၣ်နီၤလၢစီၢ်နီၤခိၣ်အကပၤ အမဲာ်သၣ်ခံဘ့ၣ်န့ၣ် ဖျါထံဆးဝဲဒၣ်န့ၣ်လီၤ. ပိာ်မုာ်တဂၤအမဲာ်သၣ်န့ၣ် ကံးကူးအသးဒီး တၢ်သးဖျိးဖးဒိၣ် ဒီးအတဂၤအမဲာ်သၣ်န့ၣ် ပဝံာ်အသးဒီး တၢ်သးဘၣ်ဒိဆါန့ၣ်လီၤ. အကတီၢ်လၢ တံၤသကိးလီၢ်လံၤတဖၣ် ပာ်ဖှိၣ် ထံၣ်လိာ်က့ၤသးအံၤ ပိၢ်ဖးထီၣ် ခီဖျိလၢပိာ်မုၣ်တဂၤ အ့ၣ်လိာ်ကဒူးကဒ့ၣ် ပှၤအဂၤတဂၤ အတၢ်စူၢ်တၢ်နာ်, ဒီးကိးဃါလိာ်သးအဃိန့ၣ်လီၤ. တၢ်ဂ့ၢ်လိာ်အံၤန့ၣ် တုၤဆူ ပိာ်မုၣ်လၢအစးထီၣ် တၢ်အ့ၣ်လိာ်တဂၤ ဆဲးထူခီၣ်ဒီးဟးထီၣ်လၢ တၢ်အီၣ်အကျး, ဒီးအတဂၤန့ၣ်ဘၣ်အိၣ်တ့ၢ်ဝဲလၢ တၢ်ပျံၤတၢ်ဖုး, ဒီးတၢ်မဲာ်ဆှးအပူၤန့ၣ်လီၤ.
မ့ၢ်ပအိၣ်မူအိၣ်ဂဲၤဘၣ် ဖဲလၢပှၤတဝံသးစူၤ တၢ်ထံၣ်ဆိကမိၣ် လီၤဆီလိာ်အသး အကတီၢ်န့ၣ်ဧါ. ပှၤခံဂၤအသးတလီၤပလိာ်အဃိ ပစံးလၢ အဝဲသ့ၣ်တဂ့ၤနီတဂၤန့ၣ် တသ့ဘၣ်. တၢ်ကတိၤအဆူၣ်အကိၤ, ဒီးအသူးအသ့ၣ်တအိၣ်တဖၣ်န့ၣ် တထုးန့ၢ် ပှၤဂၤအသးဘၣ်. တၢ်ထံၣ်လၢအအိၣ်ဒီးတၢ်သးဆူၣ်တခီတၢၤန့ၣ် တကြၢးကမၤန့ၢ် မၤနၢၤ တၢ်သကဲာ်ပဝးဆဲးလၤအဂ့ၤ, ဒီးတၢ်သးအိၣ်သးကညီၤတၢ်ဘၣ်.
ရိမ့ၤ ၁၂:၁၀,၁၆ မ့ၢ် တၢ်နဲၣ်ကျဲဖးဒိၣ်လၢ ပက “ယူးယီၣ်လိာ်ပသး” ဒီး “အိၣ်မူဃူဃူဖိးဖိး” ဒီးပှၤဂၤတဖၣ်အဂီၢ်န့ၣ်လီၤ . ယိၤ ၁၃:၃၅ အပူၤန့ၣ်, ကစၢ်ယ့ၣ်ရှူး နဲၣ်ဖျါဝဲလၢ ပှၤစူၢ်နာ်အီၤတဖၣ် အိၣ်ဒီးအတကဲာ်ပဝးလီၤဆီလၢအမ့ၢ် တၢ်အဲၣ်လၢ ပအဲၣ်လိာ်ကွံလိာ်သးကဒဲကဒဲန့ၣ်လီၤ. ဖဲတၢ်ပာ်ထီၣ်ထီသး ဒီးတၢ်သူၣ်ဒိၣ်သးဖျိးန့ၣ် ဒုးလီၤတလ့ၣ်ပကျဲ ညီညီဘှါဘှါသ့ဝဲဒၣ်, တၢ်သ့ၣ်တဖၣ်အံၤ ထီဒါလိာ်သးလိၤလိၤဘျၢဘျၢဒီးတၢ်အဲၣ်လၢ ယွၤအဲၣ်ဒိးဝဲ ပကဒုးနဲၣ်အီၤဆူ ပှၤဂၤတဖၣ်အအိၣ်န့ၣ်လီၤ.
ဖဲပကီၤက့ၤပၢၤက့ၤ ပတၢ်သူၣ်ဟူးသးဂဲၤတန့ၢ်ဘၣ်အကတီၢ်, ဒ်သိးပတပာ်ဒ့ၣ် ပာ်ကမၣ်လၢ ပှၤဂၤတဖၣ်အလိၤန့ၣ် ကဲထီၣ် တၢ်ဂ့ၢ်ကီလၢပဂီၢ်ဘၣ်ဆၣ်, ရိမ့ၤ ၁၂:၁၈ ပာ်ဖျါဝဲ, “ဖဲသုသ့န့ၣ်, မ့ၢ်သ့ဒီး, အိၣ်ဃူလိာ်ဖိးလိာ်သုသးဒီးပှၤကိးဂၤဒဲးတက့ၢ်” အံၤန့ၣ်ဒုးနဲၣ်ပှၤလၢ ပကအိၣ်မူပာ်ဖျါထီၣ် ကစၢ်ခရံာ်အသကဲာ်ပဝးန့ၣ်လီၤ. ပမူဒါအံၤန့ၣ် ပဟ့ၣ်ကွံာ်ဆူ ပှၤဂၤအိၣ်တသ့, တန့ၢ်ဘၣ်. တၢ်အံၤ ကအိၣ်ဒီးပဝဲတဂၤစုာ်စုာ် လၢအစိာ်ဟံးဃာ်ကစၢ်ယ့ၣ်ရှူးအမံၤန့ၣ်လီၤ.
