အလိၤဖိ အံသၣ် (Ethan) အဂီၢ်, ဘါဘရၣ် ဆးန့ၢ်ဝဲ ဆ့ကၤလၢၤ တချုးဝံၤဒံးဘၣ်န့ၣ် အဝဲလဲၤပူၤကွံာ်ဟီၣ်ခိၣ်န့ၣ်လီၤ. ဒ်သိးတၢ်ကမၤဝံၤ ဆ့ကၤလၢၤအံၤအဂီၢ် ဘၣ်တၢ်အးလီၤဆူ ပှၤဆးတၢ်ဖိအဂၤတဂၤ, ဒီးစံးဘျုးဘၣ် တၢ်ကရၢကရိလၢ အဃုဘျးစဲ ပှၤကမၤဝံၤတၢ်မၤ ပှၤစုသ့တဖၣ်လၢမုာ်သးမၤကလီတၢ်တ့ၣ်လီၤ. အဝဲသ့ၣ်ကမၤဝံၤတၢ်မၤ- လၢဒူၣ်ဖိထၢဖိတဖၣ် တချုးမၤဝံၤဒံးဘၣ် အတၢ်မၤတဖၣ် ဒီးလဲၤပူၤကွံာ်ဟီၣ်ခိၣ်အဂီၢ်န့ၣ်လီၤ. “ပှၤမၤဝံၤတၢ်မၤတဖၣ်” အံၤန့ၣ် ဟ့ၣ်လီၤဝဲ အတၢ်ဆၢကတီၢ်, ဒီးအတၢ်သ့တၢ်ဘၣ် လၢတၢ်အဲၣ်အပူၤ, ဒ်သိးကမၤဝံၤ တၢ်မၤတဖၣ်လၢကဟ့ၣ်ထီၣ် တၢ်မၤမုာ်ထီၣ်က့ၤ ပှၤဘၣ်မိၣ်ဘၣ်မးတဖၣ်အဂီၢ်န့ၣ်လီၤ.
ဝံအ့ၤလံယၤအတၢ်မၤအဂီၢ် ကစၢ်ယွၤဟ့ၣ်လီၤ “ပှၤကမၤဝံၤတၢ်မၤ” စ့ၢ်ကီးန့ၣ်လီၤ. မ့ၢ်လၢ ပှၤအံၣ်စရ့လးဖိတဖၣ် စူးကွံာ်ညိကွံာ်ယွၤအတၢ်အၢၣ်လီၤ, ဒီးမၤသံဝံတဖၣ်အဃိ, ဝံအိၣ်သယုာ်သညိထဲတဂၤဧိၤ, ဒီးအသးဟးဂီၤဝဲဒၣ်န့ၣ်လီၤ. လၢတၢ်မၤဆၢက့ၤအီၤအဂီၢ် ၁ စီၤ ၁၉:၁၆ ပာ်ဖျါဝဲ ယွၤနဲၣ်လီၤ အ့ၤလံယၤလၢ ကဖှူ အလံရှါ လၢကထီၣ်အလီၢ် ဒ်ဝံတဂၤအသိးန့ၣ်လီၤ. ဖဲလၢဝံအ့ၤလံယၤ တအိၣ်လၢဘၣ် အလီၢ်ခံန့ၣ်, မၤလီၤတံၢ်ဝဲ တၢ်မၤအံၤလၢအမ့ၢ် တၢ်ဘိးဘၣ်သ့ၣ်ညါကိးသတြီထီၣ် ယွၤအတၢ်မ့ၢ်တၢ်တီ ကလဲၤဒံးဝဲဆူညါအဂီၢ်န့ၣ်လီၤ.
ဒ်သိးကဒုးနဲၣ်ဝဲလၢ ဝံအ့ၤလံယၤအလီၢ် ကစၢ်ယွၤ ဃုထၢ အလံၤရှါ ဒ်ယွၤအဝံ တဂၤအသိးန့ၣ်, အဆၢဖိ ၁၉ ပာ်ဖျါဝဲ အ့ၤလံယၤ “ကွံာ်ဃီၤအယၣ်လၢအလိၤ” န့ၣ်လီၤ. လၢတၢ်ဒုးနဲၣ်ဖျါ ပှၤတဂၤအစိကမီၤ ဒ်အမ့ၢ်ပှၤလၢ ကစၢ်ယွၤဃုထၢအီၤတဂၤ ကကဲထီၣ် ပှၤကတိၤတၢ်လၢယွၤအဂီၢ်န့ၣ် (ကွၢ် ၂ စီၤပၤ ၂:၈) တၢ်စူးကါဝံအယၣ်အဃိ, တၢ်မၤအံၤ မၤလီၤတံၢ်ဝဲ အလံၤရှါ ဘၣ်တၢ်ကိးအီၤလၢယွၤန့ၣ်လီၤ.
ဒ်ပမ့ၢ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်အဃိ, ပဘၣ်တၢ်ကိးပှၤ လၢပကဟ့ၣ်နီၤ ကစၢ်ယွၤအတၢ်အဲၣ်ဆူ ပှၤဂၤအအိၣ်အဂီၢ်န့ၣ် ၁ ပ့း ၂:၉ ပာ်ဖျါဝဲလၢ “လီၣ်ဖျါထီၣ် အတၢ်ဂ့ၤ …” န့ၣ်လီၤ. တၢ်မၤအံၤ ကပျံကွံာ် ပသးသမူဘၣ်ဆၣ် ကစၢ်ယွၤ ကဒုးအိၣ်ဂၢၢ်ဆိးကျၢၤ တၢ်မၤအံၤ, တၢ်မၤအစီအဆှံလၢ ပှၤဂၤကသ့ၣ်ညါအီၤအဂီၢ်, ကစၢ်ယွၤကကိး “ပှၤမၤဝံၤတၢ်မၤတဖၣ်” န့ၣ် ပနာ်သပှၢ်ကတၢၢ် သ့ဝဲဒၣ်န့ၣ်လီၤ.
