ပှၤသ့စဲအ့ၣ်ဖိတဖၣ် လၢခဲၣ်လံၣ်ဖိနယၣ် ဖၠၣ်စိမိၤ မၤဝဲတၢ်ဃိထံလၢအမ့ၢ် တၢ်မၤကွၢ် မီၣ်လံၣ်ကၠူလၣ် စွး(ဘ) ဒ်သိး ကသ့ၣ်ညါ ပာ်ဖျါလီၤတံၢ် ပှၤသူကွဲၤဒီနၢ် (cell phone) တဂၤစုာ်စုာ် အတၢ်အိၣ်မူ အကျိၤအကျဲ, ဒီးအလုၢ်အလၢ် အက့ၢ်အဂီၤ ကမ့ၢ်ဒ်လဲၣ်အဂီၢ်န့ၣ်လီၤ. ပှၤစူးကါကွဲၤဒီနၢ်တဖၣ်သူဝဲ တၢ်အိၣ်အါမံၤအကျါ အဝဲသ့ၣ်ဃုထံၣ်န့ၢ်, ချါသိ, တၢ်ဖၠူလိၤ (လိရှၢၣ်), တၢ်ပှံၤခိၣ်တဖၣ်, ဒီးတၢ်ကယၢမဲာ်သၣ်ပိးလီ (Make up) တဖၣ်, ဒီးတၢ်အီၣ်တၢ်အီအကလုာ်တဖၣ်, ကသံၣ်ကသီတဖၣ်, လၢအအီၣ်အီ စူးကါဝဲ, ဒီးတၢ်ကူတၢ်ကၤအကလုာ် လၢကူသိးဝဲတဖၣ်န့ၣ်လီၤ. တၢ်ဃုမၤလိန့ၢ်အံၤ ဟ့ၣ်ထီၣ်တၢ်ပျဲလၢ ပှၤဃုထံကွၢ်တၢ်ဖိတဖၣ် ကဒုးအိၣ်ထီၣ် ပှၤတဂၤစုာ်စုာ်အဂ့ၢ် ဖုၣ်ကိာ် ဘၣ်ထွဲဒီး အတၢ်အိၣ်မူကျိၤကျဲတဖၣ် ကမ့ၢ်တၢ်ဒ်လဲၣ်ဒ်လဲၣ်န့ၣ်လီၤ.

ပမ့ၢ်ဘၣ်ဟ့ၣ်ဒိတဲာ်န့ၣ်ဒီး, ဘၤဘူၤလိၣ်ခိၣ်နၢ် ပဒိၣ်တဖၣ်စ့ၢ်ကီး ဃိထံ ပှံၢ်စီ (စွးဘ) စီၤဒၤနံးယ့လး အတၢ်အိၣ်မူ, လၢတၢ်သကဲာ်ပဝး, ဒီးအတၢ်မူကျိၤကျဲအပူၤ ဒ်သိးကထံၣ်န့ၢ် တၢ်အၢတၢ်သီတဖၣ်န့ၣ်လီၤ. ဘၣ်ဆၣ် အနံၣ်နွံဆံအတီၢ်ပူၤန့ၣ်, မၤဝဲ ဘၤဘူၤလိၣ်အဘီမုၢ်တၢ်ဖံးတၢ်မၤ, လၢတၢ်သူၣ်တီသးရၤ, ဒီး ဒၤ ၆:၄ န့ၣ် ဘၣ်တၢ်သ့ၣ်ညါအီၤလၢ “အဂ့ၢ်ဒ်အံၤ, မၤဝဲတီတီ, ဒီးတၢ်ကမၣ်မ့ၢ်ဂ့ၤ မၤတၢ်တတီဘၣ် တမံၤမံၤမ့ၢ်ဂ့ၤ တအိၣ်ဘၣ်လၢအလိၤဘၣ်” န့ၣ်လီၤ. နီၢ်နီၢ်န့ၣ်, အဆၢဖိ ၁-၂ စံးဘၣ်ပှၤလၢ စီၤပၤဒၤရယါဝ့ၣ် ဟ့ၣ်အီၤအလီၢ်အလၤ, ဒ်အမ့ၢ် “ပှၤအခိၣ်သၢဂၤ” အကျါတဂၤလၢပဒိၣ်တဖၣ်အဖီခိၣ်အဃိ, ဘၣ်သ့ၣ်သ့ၣ်, ခိၣ်နၢ်တဖၣ် အသးက့ၣ်အီၤ, ဒီးဃုအတၢ်ကမၣ် ဒ်သိးကတၢၤကွံာ်အီၤ လၢအလီၢ်အလၤအဂီၢ်န့ၣ်လီၤ. ဘၣ်ဆၣ်, အဆၢဖိ ၁၀ ပာ်ဖျါဝဲ “ဒ်အမၤဝဲလၢ အခီၣ်ထံးအသိး”န့ၣ် စီၤဒၤနံးယ့လး ဟံးဃာ် ဂၢၢ်ကျၢၤအတၢ်သးတီ, ဒီးမၤယွၤအတၢ်, ဒီးထုကဖၣ်တၢ်လၢယွၤန့ၣ်လီၤ. အဆၢဖိ ၂၈ စံးဘၣ်ပှၤလၢ အကတၢၢ်န့ၣ်, ဝံ ဘီၣ်ထီၣ်ညီထီၣ် လၢအတၢ်မၤအပူၤန့ၣ်လီၤ.

ပတၢ်အိၣ်မူ ပာ်လီၤတဲာ်တ့ၢ် က့ၢ်ဂီၤအကျိၤဖိတဖၣ်လၢ ကဒုးနဲၣ် ပမ့ၢ်မတၤလဲၣ်, ဒီးမ့ၢ်ပနဲၣ်ဖျါထီၣ် မတၤတဂၤအက့ၢ်အဂီၤလဲၣ်န့ၣ်လီၤ. ပမ့ၢ်ဘၣ်ဂုာ်ကျဲးစၢးအိၣ်မူ, ဒီးပတလၢပှဲၤဘၣ်ဆၣ်, ပှၤအိၣ်လၢပဃၢၤတဖၣ် မ့ၢ်ဃုထံပှံၢ်စီ ပတၢ်အိၣ်မူန့ၣ်ဒီး, ဒ်ကစၢ်ယ့ၣ်ရှူးနဲၣ်ဆှၢပှၤအသိး, မ်ပှၤကဃုထံၣ်န့ၢ် က့ၢ်ဂီၤကျိၤဖိတဖၣ် လၢအပာ်ဖျါ ပတၢ်သူၣ်တီသးရၤ, ဒီးပဟ့ၣ်လီၤပသးဆူ ခရံာ်အအိၣ်န့ၣ်တက့ၢ်.