လၢတၢ်ဆၢကတီၢ်အါန့ၣ် အနံၣ် ၁၃၀ ဘျဲၣ်အတီၢ်ပူၤ, တိာ်အံၣ်ဖဲၣ် (Eiffel Tower) ဆၢထၢၣ်ထီခိ ဂၢၢ်တပၢၢ် ဃံဃံလၤလၤလၢ ဝ့ၢ်ပဲရ့း(စ) န့ၣ်, မ့ၢ်တၢ်ပနီၣ်လၢ အဘၣ်ထွဲဒီး တၢ်တ့ထီၣ် တၢ်သူၣ်ထီၣ် အတၢ်သ့တၢ်ဘၣ်လၢ အကဟုကညီၢ် အဃံအလၤတမံၤ န့ၣ်လီၤ. လၢတၢ်ပာ်သး ကဖၢလၢအပူၤ, ဝ့ၢ်န့ၣ် ပာ်ပနီၣ်ဝဲ တိာ်အံၣ်ဖဲၣ်အံၤ ဒ်အမ့ၢ်တၢ်လီၢ်တၢ်ကျဲ, လၢအလီၤဘီလီၤမုၢ်ဂံၢ်ထံးတတီၤအသိးန့ၣ်လီၤ.

ဘၣ်ဆၣ်, ဖဲတိာ်တဖျၢၣ်အံၤ ဘၣ်တၢ်ဘှီထီၣ်အကတီၢ်န့ၣ်, ပှၤအါဂၤ ထံၣ်ဆိကမိၣ်ဆံးအီၤန့ၣ်လီၤ. အဒိန့ၣ်, ကီၢ်ဖြၣ်စ့ၣ် အပှၤကွဲးလံာ် လၢအမံၤဟူသၣ်ဖျါ ကံၣ် ဒ မိၤပၣ်ဆိ (Guy De Maupassant), စံးဝဲ “တိာ်အက့ၢ်အဂီၤန့ၣ် ဖျါလၢအတဂ့ၤကဲၣ်ဆိးဘၣ်, လီၤဂာ်ဒီးမ့ၣ်အူလုၢ်ပျိာ် အပီၤလၢစဲးဖီကဟၣ် တၢ်မၤလီၢ်န့ၣ်လီၤ.” အဝဲကွၢ်ဃုထံၣ် တိာ်အတၢ်ဃံတၢ်လၤ တသ့ဘၣ်န့ၣ်လီၤ.

ဒ်ပတၢ်အုၣ်ခီၣ်ကစၢ်တဂၤအသိးန့ၣ်, ပဝဲပှၤလၢ အအဲၣ်ကစၢ်ယ့ၣ်ရှူး, ဒီးစူၢ်က့ၤနာ်က့ၤအီၤ လၢသူၣ်လၢသးတဖၣ် ပထံၣ်အီၤဒ်အမ့ၢ် ပှၤလၢအဃံလၤ, လီၤအဲၣ်လီၤကွံတဂၤ, ဒ်အတၢ်မ့ၢ်တၢ်, ဒီးတၢ်လၢ အမၤတ့ၢ်ဝဲလၢပဂီၢ်အဃိန့ၣ်လီၤ. ဘၣ်ဆၣ် ယရှါ ၅၃:၂ အပူၤန့ၣ် ဝံယရှါယၤ ကွဲးပာ်ဖျါဝဲလၢ, “တအိၣ်ဘၣ်ဒီး အက့ၢ်အဂီၤဘၣ်, ဒီးတအိၣ်ဘၣ်ဒီးအဃံအလၤဘၣ်, ဒီးတုၤပထံၣ်အီၤဒီး, အဃံအလၤလၢအဘၣ်ပမဲာ်န့ၣ် တအိၣ်ဘၣ်” န့ၣ်လီၤ.

ဘၣ်ဆၣ် လၢပှၤကညီတဖၣ် ညီနုၢ်သ့ၣ်ညါတ့ၢ်ဝဲ, ဒီးလဲၤခီဖျိဘၣ်တ့ၢ်ဝဲ ခဲလၢာ်တဖၣ်အကျါန့ၣ် အတၢ်မၤကဟုကညီၢ် ဒိၣ်ဒိၣ်ထီထီ, လၢအမၤတ့ၢ်ဝဲန့ၣ် မ့ၢ်တၢ်ဃံတၢ်လၤ အမ့ၢ်အတီအဒိၣ်ကတၢၢ်, အစီဆှံကတၢၢ် လၢပဂီၢ်န့ၣ်လီၤ. အဆၢဖိ ၄ စံးဘၣ်ပှၤ “မ့ၢ်မးစိာ်ဝဲပတၢ်ဆူးတၢ်ဆါ ဒီးဝံပတၢ်သူၣ်အုးသးအုးလီၤ.” အဆၢဖိ ၅ ပာ်ဖျါဝဲ ကစၢ်ယ့ၣ်ရှူးန့ၣ်ဘၣ်တၢ် “ဆဲးဖျိအီၤလၢ ပတၢ်ကမၣ်အဃိ, ဒီးဘၣ်တၢ်မၤသဘှံးအီၤလၢ ပတၢ်ဒဲးဘးအဃိလီၤ. တၢ်သိၣ်ဃီၣ်ဘၣ်ဃးဒီး ပတၢ်ဃူတၢ်ဖိးန့ၣ် အိၣ်ဝဲလၢအလိၤ, ဒီးပဘျါက့ၤလၢ အဘၣ်တီၢ်အဃိန့ၣ်လီၤ.”

ပှၤလၢအဃံလၤ, လီၤအဲၣ်လီၤကွံတဂၤ, လၢအကဟုကညီၢ်လိၤလိၣ်လီၤလး, ဒ်အမ့ၢ်ပှၤတူၢ်တၢ်လၢပဂီၢ် လၢသ့ၣ်ဖျၢၣ်ထူၣ်စုညါအလိၤ, လၢပတၢ်ဒဲးဘးအဂီၢ် ဟံးထီၣ်ယိးထီၣ် တၢ်စံၣ်ညီၣ်လၢ ပစံးကတိၤပာ်ဖျါတန့ၢ်, တသ့န့ၣ် တမ့ၢ်ပကဃုထံၣ်န့ၢ်ပှၤဒ်သိးဒီးအီၤနီတဘျီဘၣ်န့ၣ်လီၤ.
အဝဲန့ၣ် မ့ၢ်ကစၢ်ယ့ၣ်ရှူးန့ၣ်လီၤ. ပှၤလၢအဃံလၤ, လီၤအဲၣ်လီၤကွံတဂၤန့ၣ်လီၤ. မ်ပကွၢ်ထီၣ်ဆူအအိၣ် ဒီးအိၣ်မူအိၣ်ဂဲၤသကိးတက့ၢ်.