လၢတၢ်မၤလၤကပီၤ ယမိၢ်အသးသမူလၢခံကတၢၢ် တၢ်ဘူၣ်တၢ်ဘါအဂီၢ်န့ၣ်, ယကတဲာ်ကတီၤယသး, ဒ်သိးယကပာ်ဖျါ အသးသမူ, “စးထီၣ်လၢ အအိၣ်ဖျဲၣ်ထီၣ်နံၤတုၤအလဲၤပူၤကွံာ် ဟီၣ်ခိၣ်” (Hyphen years) အဂ့ၢ်န့ၣ် ယဃ့ထုကဖၣ်လၢ ယတၢ်စံးကတိၤ ကလဲၤအသးဂ့ၤဂ့ၤဘၣ်ဘၣ်အဂီၢ်န့ၣ်လီၤ. ယကွၢ်ထံဆိကမိၣ်က့ၤ ယမိၢ်ဒီးယၤ ပတၢ်ဘၣ်ထွဲလိာ်သး အကတီၢ်လၢအဂ့ၤတဖၣ်, ဒီးအတဂ့ၤကဲၣ်ဆိးတဖၣ်န့ၣ်လီၤ. ဖဲယမိၢ်ထံၣ် ကစၢ်ယ့ၣ်ရှူးဆီတလဲသးဝံၤအလီၢ်ခံ, မုၢ်နံၤလၢ ယမိၢ်တူၢ်လိာ် ကစၢ်ယ့ၣ်ရှူး ဒ်အမ့ၢ် တၢ်အုၣ်ခီၣ်ကစၢ်အဃိ ယစံးထီၣ်ပတြၢၤယွၤန့ၣ်လီၤ. ဒ်သိးပကဒိၣ်ထီၣ်သကိး လၢတၢ်စူၢ်တၢ်နာ်အပူၤအဂီၢ် ယွၤမၤစၢၤပဝဲခံဂၤ, ဒီးပှၤသ့ၣ်တဖၣ်လၢဟ့ၣ်ခီဟ့ၣ်နီၤလီၤတၢ်ဂ့ၢ် ဘၣ်ထွဲဒီး ယမိၢ်ဟ့ၣ်ဂံၢ်ဟ့ၣ်ဘါ, ဒီးဃ့ထုကဖၣ်တၢ်လၢ အဝဲသ့ၣ်အဂီၢ်အဃိ, ယစံးဘျုးဘၣ်ကစၢ်ယွၤန့ၣ်လီၤ. ယမိၢ်န့ၣ် တမ့ၢ်ပှၤလၢပှၤပှဲၤတဂၤဘၣ်ဆၣ်, မုာ်လၤသးခုဘၣ်ဝဲ နီၣ်တိၤတဲာ် (-), လၢအမ့ၢ် အတၢ်အိၣ်ဖျဲၣ်ထီၣ်ဒီးအတၢ်သံအဘၢၣ်စၢၤဖိအံၤ, လၢအအိၣ်ပှဲၤဒီးအခီပညီအဃိ, အတၢ်အိၣ်မူန့ၣ် အိၣ်မူကဲဘျုးဝဲဂ့ၤဂ့ၤဘၣ်ဘၣ် လၢကစၢ်ယ့ၣ်ရှူးအဂီၢ်န့ၣ်လီၤ.

ပှၤလၢအစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အကျါ ပှၤလၢပှၤပှဲၤ တအိၣ်နီတဂၤဘၣ်. ဘၣ်ဆၣ်, ကလီး ၁:၁၀ စံးဘၣ်ပှၤ “ဒ်သိးသုကလဲၤတၢ် ဒ်အကြၢးဒီးကစၢ်, လၢတၢ်ဘၣ် အသးခဲလၢာ်သတးဒီး” အဃိ, သးစီဆှံ မၤလၢမၤပှဲၤပှၤ သ့ဝဲဒၣ်န့ၣ်လီၤ. မ့မ့ၢ်လၢအဆၢဖိ ၃-၆ အပူၤန့ၣ် ဒ်ပှၤတၢ်မၢဖိစီၤပီလူး ပာ်ဖျါဝဲအသိး, ကလီးစဲ တၢ်အိၣ်ဖှိၣ်ဖိတဖၣ်န့ၣ် ဘၣ်တၢ်သ့ၣ်ညါအဝဲသ့ၣ်လၢ အတၢ်စူၢ်တၢ်နာ်ဒီး အတၢ်အဲၣ်အဃိန့ၣ်လီၤ. အဆၢဖိ ၉-၁၀ ပာ်ဖျါဝဲလၢ သးစီဆှံကစၢ် ဟ့ၣ်လီၤ “တၢ်ကူၣ်သ့ဒီးတၢ်နၢ်ပၢၢ်,” ဒ်သိးအဝဲသ့ၣ် “ကသၣ်ထီၣ် လၢကယဲၢ်တၢ်မၤဂ့ၤ, ဒီးအါထီၣ်လၢတၢ်သ့ၣ်ညါယွၤ” အဂီၢ် ဟ့ၣ်စိဟ့ၣ်ကမီၤဝဲဒၣ်န့ၣ်လီၤ. အဆၢဖိ ၁၄ န့ၣ် ပှၤစူၢ်က့ၤနာ်က့ၤတၢ်တဖၣ်အဂီၢ် စီၤပီလူး ဃ့ထုကဖၣ်ဝဲ, ဒီးစံးထီၣ်ပတြၢၤ အဝဲသ့ၣ်အကတီၢ်န့ၣ်, အဝဲပာ်ဖျါထီၣ် ကစၢ်ယ့ၣ်ရှူးအမံၤ, ကစၢ်လၢ “အဝဲဒၣ်အပူၤပဘၣ်တၢ်ပှ့ၤက့ၤပှၤ, တၢ်ပျၢ်ပတၢ်ဒဲးဘးလီၤ.” န့ၣ်လီၤ.
ပမ့ၢ်ဟ့ၣ်လီၤအးလီၤပသးလၢ သးစီဆှံကစၢ်အစုပူၤန့ၣ်ဒီး, ပကဒိၣ်ထီၣ်စ့ၢ်ကီးလၢ တၢ်သ့ၣ်ညါယွၤ, တၢ်အဲၣ်ယွၤဒီးပှၤကညီ, တၢ်ရၤလီၤတၢ်သးခုကစီၣ်, ဒီးမုာ်လၤသးခုလၢ နီၣ်တိၤတဲာ်အပူၤ, လၢအအိၣ်ပှဲၤဒီးတၢ်အိၣ်မူအခီပညီ, တၢ်အိၣ်မူလၢ ပကအိၣ်မူကဲဘျုး ဂ့ၤဂ့ၤဘၣ်ဘၣ် လၢကစၢ်ယ့ၣ်ရှူးအဂီၢ်သ့ဝဲဒၣ်န့ၣ်လီၤ.