ဖ့လ်ဂရ့မ် (Pilgrim) မ့ၢ် တၢ်သးဝံၣ်ဒုးနဲၣ် အတၢ်ဂီၤမူတယုၢ်, ဘၣ်တၢ်သန့ၤထီၣ်အီၤလၢပှၤလၢအလဲၤဘူၣ်တၢ်ဘါတၢ်တဂၤ အတၢ်လဲၤထီၣ်လဲၤထီ (The Pilgrim’s Progress), တၢ်ကွဲးဒိဘၣ်ထွဲဒီး ပှၤစူၢ်က့ၤနာ်က့ၤ ကစၢ်ယ့ၣ်ရှူးတဂၤအသးသမူအဂ့ၢ်န့ၣ်လီၤ. တၢ်ဂီၤမူဒုးနဲၣ်ပာ်ဖျါဝဲ သးအဘီမုၢ်အစိကမီၤတဖၣ်လၢ တၢ်ထံၣ်န့ၢ်အီၤတသ့ခဲလၢာ်န့ၣ် ဆူပှၤကွၢ်တၢ်ဂီၤမူဖိတဖၣ် ကထံၣ်ဘၣ်အဂီၢ်န့ၣ်လီၤ. ပှၤဟူးဂဲၤဒုးနဲၣ် စီၤပၤက့ၢ်ဂီၤ, ဒ်အမ့ၢ်ကစၢ်ယွၤအခၢၣ်စးန့ၣ် အိၣ်ဖျါလၢ တၢ်ဂီၤမူအံၤ ဒီတယုၢ်ညါဃၣ်ဃၣ်အပူၤန့ၣ်လီၤ. အဝဲဘၣ်တၢ်ဒုးကူကၤ ဆ့ကၤဖးထီအဝါ, ဒီးတြီဆၢဒီဒၣ်ကယဲၢ်ဒုၣ်ဒါအတၢ်မၤအၢတဖၣ်ခဲလၢာ်, ပှၤလၢအဘၣ်ဒိဆါတဖၣ်န့ၣ် ဟံးဃာ်ကဟုကယာ်ဝဲလၢတၢ်အဲၣ်ကပုာ်လုး, တနၢၣ်ပှၤဂုၤပှၤဂၤတဖၣ် လၢအစုနၢၣ်ခံကဖီလီဖိ ဒ်သိးပှၤကမၤတၢ်အဂ့ၤအဂီၢ်န့ၣ်လီၤ. စီၤပၤအလီၢ်အလၤ က့ၢ်ဂီၤဒိအံၤ မူဒါတၢ်မၤတဖၣ် လၢကဘၣ်မၤသပှၢ်တၢၢ်န့ၣ်မၤဝဲဘၣ်ဆၣ်, ပှၤဘၣ်ဂဲၤဒိတၢ် ဒ်ပှၤကညီတဖၣ် ကထံၣ်ဘၣ် စီၤပၤအံၤ လၢနီၢ်ခိန့ၣ်တသ့ဘၣ်. တၢ်ကထံၣ်ထဲဒၣ် တၢ်ကဲဘျုးကဲဖှိၣ်တဖၣ် လၢအမၤတ့ၢ်ဝဲဒၣ်န့ၣ်လီၤ.

ပကထံၣ်ဘၣ်ယွၤလၢနီၢ်ခိ တန့ၢ်တသ့အကတီၢ်ဒၣ်လဲာ် မ့ၢ်ပအိၣ်မူအိၣ်ဂဲၤ ဒ်စီၤပၤ အမ့ၢ်အတီ မူဂဲၤမၤတၢ်လၢပတၢ်အိၣ်မူအပူၤကစီဒီဧါ. ဖဲတၢ်လိၣ်ဘၣ်နီၢ်နီၢ်အကတီၢ်န့ၣ်, ဒၤ ၁၀:၇ ပာ်ဖျါဝဲလၢ ဝံဒၤနံးယ့လး ဒိးန့ၢ်တၢ်ထံၣ်လၢညါခီ, အိၣ်ဟဲခီဖျိလၢမူခိၣ်ကလူး, ဒီးအဆၢဖိ ၁၂ စံးဘၣ်ပှၤ, ဒ်အမ့ၢ်ပှၤလၢအစိာ်ဆှၢ တၢ်စံးဆၢလိၤလိၤ လၢအတၢ်ထုကဖၣ်အဂီၢ်န့ၣ်လီၤ. အဆၢဖိ ၁၃ အပူၤန့ၣ် ပှၤစိာ်တၢ်ကစီၣ်တဂၤအံၤ ဒုးသ့ၣ်ညါအီၤလၢ နီၢ်သးအတၢ်ဒုးတၢ်ယၤ မၤယံာ်မၤနီၢ်အတၢ်ဟဲ, ဒီးမူခိၣ်ကလူးတဂၤမၤစၢၤအီၤအဂ့ၢ်န့ၣ်လီၤ. စီၤဒၤနံးယ့လး ထံၣ်န့ၢ် ကစၢ်ယွၤတသ့ဘၣ်ဆၣ်, အဝဲဘၣ်တၢ်ဒုးသ့ၣ်ညါအီၤလၢယွၤ အတၢ်ကဟုကယာ်, ဒီးအတၢ်သူၣ်အိၣ်သးအိၣ်တဖၣ်န့ၣ် အိၣ်ဝးတရံးဂၢၤဃာ်အီၤအဂ့ၢ်န့ၣ်လီၤ. အဆၢဖိ ၁၉ န့ၣ် ပှၤဟဲစိာ်ဆှၢ တၢ်ကစီၣ်တဂၤအံၤဟ့ၣ်ဂံၢ်ဟ့ၣ်ဘါအီၤလၢ “ပှၤလၢအဘၣ်တၢ်အဲၣ်အီၤတဂၤဧၢ, ပျံၤတၢ်တဂ့ၤ” န့ၣ်လီၤ. တုၤလၢ တၢ်ဂီၤမူ ဖ့လ်ဂရ့ၣ် အကတၢၢ်န့ၣ် ပှၤဒုးနဲၣ်တၢ် က့ၢ်ဂီၤအခိၣ်သ့ၣ် လဲၤခီဖျိခီဂာ် တၢ်ကီတၢ်ခဲတဖၣ်အါမးဝံၤ, လဲၤတုၤဆူမူခိၣ်အပဲတရီန့ၣ်ဒီး, လၢတၢ်သးခုအပူၤ ကိးပသူထီၣ်ဝဲ အဆိကတၢၢ်န့ၣ် “ယထံၣ်ဘၣ် စီၤပၤလံ” န့ၣ်လီၤ. တချုး ပထံၣ်ဘၣ် ကစၢ်ယွၤ လၢပမဲာ်ချံအတၢ်ထံၣ်သီလၢမူခိၣ်ဘီမုၢ်အပူၤအကတီၢ်န့ၣ် တနံၤအံၤ, ပကလူၤဃုထံၣ်ယွၤအတၢ်မၤ လၢပတၢ်အိၣ်မူ အပူၤန့ၣ်တက့ၢ်.