တၢ်ပျံၤတၢ်ဘၣ်ယိၣ် အလပီဖးဒိၣ်တဖၣ် လုၣ်ဘၢအီၤအဃိ, စူစံၣ် (Susy) ဆ့ၣ်နီၤဟီၣ်ဝဲလၢ တၢ်ဆါဟံၣ် တၢ်ကဟုကယာ်ဒၢးလီၤဆီအချၢန့ၣ်လီၤ. အဖိဆံးအိၣ်ဒံးဒၣ်ထဲ ခံလါဖိန့ၣ် အပသိၣ်ဆံးဆံးဖိအပူၤ အိၣ်ပှဲၤဒီးထံဧိၤနိဧိၤ, ဒီးကသံၣ်သရၣ်စံးဝဲလၢ အဝဲသ့ၣ် ကမၤဝဲအဂ့ၤကတၢၢ်, ဘၣ်ဆၣ် တအုၣ်ကီၤဝဲလၢဖိသၣ် ကဂ့ၤထီၣ်အဂီၢ်ဘၣ်. အကတီၢ်ဖဲန့ၣ် စူစံၣ် စံးဝဲဒၣ်လၢ, “အသးကလၢၢ်ဘၣ် သးမုာ်စီဆှံ အတၢ်တနၢၢ်အီၤ မုာ်မုာ်ကပုာ်လုးဖိန့ၣ် ဒုးသ့ၣ်နီၣ်အီၤလၢ ကဘူၣ်ထီၣ်ဘါထီၣ်ယွၤ” န့ၣ်လီၤ. ဆူမဲာ်ညါ သၢသီအတီၢ်ပူၤ, ဖဲအိၣ်ဝဲလၢတၢ်ဆါဟံၣ်အကတီၢ်န့ၣ်, ကသူၣ်ဝံၣ်သးဆၢတၢ်အဂီၢ် တၢ်ဂံၢ်တၢ်ဘါတအိၣ်အဃိ, အိးထီၣ်ကနၣ်ဝဲ ထါသးဝံၣ်စံးထီၣ်ပတြၢၤယွၤတဖၣ်လၢ အကွဲၤဒီနၢ်အပူၤန့ၣ်လီၤ. ဖဲအဘူၣ်ထီၣ်ဘါထီၣ်ယွၤအကတီၢ်န့ၣ် စူစံၣ် ဃုထံၣ်န့ၢ်ဝဲ တၢ်မုၢ်လၢ်ဒီးတၢ်ဃူတၢ်ဖိးန့ၣ်လီၤ. မုၢ်တနံၤအံၤ, စူစံၣ် ပာ်ဖျါထီၣ်ဝဲလၢ အတၢ်လဲၤခီဖျိ သိၣ်လိအီၤလၢ “တၢ်ဘူၣ်ထီၣ်ဘါထီၣ်ယွၤအတၢ်မၤန့ၣ် ဆီတလဲကစၢ်ယွၤတန့ၢ်ဘၣ်. ဘၣ်ဆၣ် ဆီတလဲက့ၤပှၤနီၢ်နီၢ်န့ၣ်လီၤ.”
စံး ၃၀:၈ ပာ်ဖျါဝဲလၢ တၢ်ကွၢ်ဆၢၣ်မဲာ် တၢ်အိၣ်အသးမၤအသး လၢအလီၤဘၣ်ယိၣ်အကတီၢ်, စီၤဒၤဝံးကိးထီၣ်ယွၤ ခီဖျိတၢ်ထုကဖၣ်, ဒီးတၢ်စံးထီၣ်ပတြၢၤယွၤန့ၣ်လီၤ. ပှၤထုးထီၣ် လံာ်စီဆှံအခီပညီတဂၤ ပာ်ဖျါဝဲလၢ စီၤဒၤဝံး ထုကဖၣ်ဝဲဒ်သိး “တၢ်ဘျုးတၢ်ဖှိၣ် ကဒုးအိၣ်ထီၣ် တၢ်စံးထီၣ်ပတြၢၤ ဒီးတၢ်ဆီတလဲ” အဂီၢ်န့ၣ်လီၤ. အဆၢဖိ ၁၁-၁၂စံးဘၣ်ပှၤလၢ ကစၢ်ယွၤ ဆီတလဲကွံာ် စီၤဒၤဝံး အတၢ် “ဟီၣ်တၢ်ယၢၤတၢ်ဆူ တၢ်ဂဲၤကလံၣ်,” ဒီး စီၤဒၤဝံး ပာ်ဖျါဝဲ “ယကစံးထီၣ်ပတြၢၤနၤလီၤထူလီၤယိာ်,” လၢတၢ်အိၣ်အသးမၤအသးခဲလၢာ်အပူၤန့ၣ်လီၤ. လၢတၢ်နးတၢ်ဖှီၣ်အကတီၢ်တဖၣ်အပူၤန့ၣ် တၢ်ကစံးထီၣ်ပတြၢၤယွၤအဂီၢ် တၢ်ဂ့ၢ်ကီကအိၣ်ဝဲဘၣ်ဆၣ်, ကနဲၣ်ဆှၢပှၤဆူ တၢ်ဆီတလဲ- လၢတၢ်ဘၣ်ယိာ်ဘၣ်ဘီ ဆူတၢ်မုၢ်လၢ်, လၢတၢ်ပျံၤတၢ်ဖုးဆူတၢ်နာ် သ့ဝဲန့ၣ်လီၤ. ဒီးအဆၢဖိ ၄-၅ ပာ်ဖျါဝဲလၢ ယွၤစူးကါ ပတၢ်အိၣ်မူဟ့ၣ်ဒိအံၤ လၢတၢ်ဟ့ၣ်ဂံၢ်ဟ့ၣ်ဘါ, ဒီးတၢ်ဆီတလဲပှၤဂၤအဂီၢ်န့ၣ်လီၤ.
မ့ၢ်လၢယွၤအဘျုးအဖှိၣ်အဃိ, စူစံၣ် အဖိခွါဆံးဖိ အိၣ်မုာ်ထီၣ်က့ၤဝဲဒၣ်န့ၣ်လီၤ. လၢပတၢ်အိၣ်မူအပူၤ တၢ်ဂ့ၢ်ကီတဖၣ်န့ၣ်, ဒ်ပမုၢ်လၢ်တ့ၢ်ဝဲအသိး တကတၢၢ်ဝဲဘၣ်ဆၣ်, အဆၢဖိ ၁၁ စံးဘၣ်ပှၤလၢ ပတၢ်ဘၣ်ဒိဆါတဖၣ်အပူၤဒၣ်လဲာ် ပမ့ၢ်ပဘူၣ်ထီၣ်ဘါထီၣ်အီၤန့ၣ်ဒီး, ယွၤကဆီတလဲပှၤ, ဒီးကမၤပှဲၤဝဲတၢ်သးခုအသီသ့ဝဲဒၣ်န့ၣ်လီၤ.
