“နလိာ်လ့ယၤဧါ.” ယကိးပသူထီၣ်, ဒီးခွဲးခွးကွၢ်ဃု ယဆ့ကၤဝါ လၢတၢ်မၤဃ့ထီၣ် တၢ်ကူတၢ်သိးကဟၣ်အပူၤန့ၣ်လီၤ. ယထံၣ်န့ၢ်အီၤ, လၢအဘၣ်အၢဒီးတၢ်အဂၤန့ၣ်လီၤ.
ယဆ့ကၤဝါလိၤန့ၣ် ဘၣ်အၢဒီးထိၣ်ဒံးမဲၣ်ထံအဖိးဖိတဖၣ်န့ၣ်လီၤ. နီၢ်နီၢ်န့ၣ်, တၢ်အဖိးဖိတဖၣ်လၢ ခ့ဘှ့အဖံးဘ့ၣ်လိၤအသိး – မဲၣ်ထံအဖိးတဖၣ်မၤဘၣ်အၢ ယဆ့ကၤဒီတဘ့ၣ်ညါန့ၣ်လီၤ. မ့ၢ်လၢယတကွၢ်ထံဘၣ် ယဆ့ကၤအထၢၣ်အဃိဒီး, ထိၣ်ဒံးဘိလၢအမဲၣ်ထံတတံာ်ဂ့ၤဂ့ၤန့ၣ် မၤဘၣ်အၢဆ့ကၤခဲလၢာ်န့ၣ်လီၤ.
တၢ်ကပၥ်ဖျါတၢ်ဒဲးဘးအဂီၢ် ယွၤအကလုၢ်ကထါ စူးကါတၢ်ကတိၤ ‘မၤဘၣ်အၢ’ (stain) တလီၢ်လီၢ်န့ၣ်လီၤ. တၢ်ဘၣ်အၢဖိတဖိး မ့ၢ်ဘၣ်စုၣ်နုၥ်လီၤဆူ လုၣ်တၢ်ကံးညၣ် တမံၤမံၤ ဒီးမၤဟးဂီၤဝဲဒၣ်လီၤ. ဒီးတၢ်ကပၥ်ဖျါ တၢ်ဒဲးဘးအကျိၤအကွၥ်အဂီၢ် ကစၢ်ယွၤ စံးကတိၤခီဖျိ ဝံယံးရမံယၤႇ လၢတၢ်မၤသ့ၣ်နီၣ်အၦၤဂီၢ်မုၢ် အတၢ်ဒဲးဘး, လၢအဒိၣ်ထီန့ၢ် အဝဲသ့ၣ်အတၢ်သ့တၢ်ဘၣ်လၢကမၤကဆှီအတၢ်ဒၣ်ဝဲန့ၣ် ဖျါဖဲ ယံး ၂:၂၂ အပူၤ, “အဂ့ၢ်ဒ်အံၤႇ နမ့ၢ်သ့စီနသးလၢဟီၣ်ခိၣ် အဆးပၠၣ်, ဒီးဟံးန့ၢ် ဆးပၠၣ်လၢအအါ ဘၣ်ဆၣ်ဒီး နတၢ်အၢကွဲးအသးလၢယမဲၥ်ညါလီၤန့ၣ် ကစၢ်ယွၤ စံးဝဲဒၣ်” န့ၣ်လီၤ.
တၢ်ဒဲးဘးန့ၣ် တမ့ၢ်လၢတၢ်အကတၢၢ်ဘၣ်အဃိ, ပကဘၣ်စံးဘျုးယွၤန့ၣ်လီၤ. ပနၢ်ဟူဘၣ်ယွၤအတၢ်အၢၣ်လီၤလၢ ကမၤကဆှီၦၤလၢပတၢ်ဒဲးဘးအတၢ်ဘၣ်အၢသ့ဝဲအဂ့ၢ်န့ၣ် ပကထံၣ်ဘၣ်ဖဲ ယၡါ ၁:၁၈ အပူၤပာ်ဖျါဝဲ, “သုတၢ်ဒဲးဘး မ့ၢ်ဒ်တၢ်ဂီၤကယဲၢ်အသိးဘၣ်ဆၣ်ဒီးႇ ကဝါထီၣ်ဝဲဒ်မူခိၣ်ဖီအသိးလီၤ” န့ၣ်လီၤ.
ယမၤစီကွံၥ် မဲၣ်ထံဘၣ်အၢအကဝီၤဖိ လၢယဆ့ကၤလိၤတန့ၢ်ဘၣ်. ဒ်န့ၣ်အသိး, ယတၢ်ဒဲးဘး အတၢ်ဘၣ်အၢစ့ၢ်ကီး ယမၤဟါမၢ်တန့ၢ်ဘၣ်. ဒ်ကစၢ်ယွၤအၢၣ်လီၤဝဲလၢ ၁ ယိၤ ၁:၉ အပူၤ, “ပမ့ၢ်တဲၥ်လီၤကျဲၤလီၤပတၢ်ဒဲးဘးဒီး, အဝဲဒၣ်အကလုၢ်တီ, ဒီးတီဝဲလိၤဝဲဒ်သိးအကပျၢ်ကွံၥ် ပတၢ်ဒဲးဘး, ဒီးသ့စီကွံၥ်ၦၤလၢကယဲၢ်တၢ်အၢတၢ်သီခဲလၢၥ်လီၤ” အသိး ခီဖျိကစၢ်ယ့ၣ်ရှူးခရံၥ်အပူၤန့ၣ်, ကစၢ်ယွၤ မၤကဆှီက့ၤၦၤအဃိ ပကဘၣ်စံးဘျုးယွၤန့ၣ်လီၤ.
