ဖဲ ခရံာ်နံၣ် ၂၀၀၀ န့ၣ် တၢ်အိၣ်ဖှိၣ်သရၣ် အဲး ဒီးပ်စၢၣ် (Ed Dobson) ဒိးန့ၢ်ဝဲ ထူၣ်ပျၢ်နၢာ်ဟးဂီၤအတၢ်ဆါ (ALS) အဃိ ပှၤကညီလၢအကထိတဖၣ်န့ၣ် ဃ့ထုကဖၣ်တၢ်လၢအဂီၢ်န့ၣ်လီၤ. လၢတၢ်ယါဘျါအဂီၢ်, အဝဲသ့ၣ်မ့ၢ်ဃ့ဘါထုကဖၣ်လၢတၢ်နၥ်အပူၤန့ၣ်ဒီး, ယွၤ ကစံးဆၢတကီၢ်ခါလီၤန့ၣ် ၦၤအါဂၤ နၥ်ဝဲဒၣ်န့ၣ်လီၤ. သရၣ် အဲး န့ၣ် ဘၣ်ဂဲၤပျုၢ်ဂဲၤဆှးဒီး ထူၣ်ပျၢ်နၢာ်တဖၣ် အဂံၢ်ဘါစၢ်လီၤ တစဲးဘၣ်တစဲး အတၢ်ဆါအံၤ ၁၂ နံၣ်ဝံၤအလီၢ်ခံန့ၣ်, (ဒီးတချုးလၢအဝဲသံဒံးဘၣ်သၢနံၣ်) ၦၤတဂၤ သံကွၢ်အီၤလၢ တုၤခဲကနံၣ်အံၤဒၣ်လဲာ် ဘၣ်မနုၤအဃိ ကစၢ်ယွၤတမၤဘျါအတၢ်ဆါန့ၣ် မ့ၢ်အဆိကမိၣ်ဝဲဒ်လဲၣ်န့ၣ်လီၤ. ဖဲန့ၣ် အဲး စံးဆၢဝဲလၢ “တၢ်စံးဆၢအဂ့ၤတအိၣ်ဘၣ်အဃိ ယတသံကွၢ်ကစၢ်ယွၤဘၣ်” န့ၣ်လီၤ. အမါ, လီၣ်နၢၣ် (Lorna) တဲအါထီၣ်ဝဲလၢ “နမ့ၢ်အိၣ်စဲဘူးထီဃၥ်ထီဘိလၢ တၢ်စံးဆၢတဖၣ် ကဘၣ်အိၣ်ဝဲလီၤန့ၣ်ဒီး, နကအိၣ်မူအိၣ်ဂဲၤနီၢ်နီၢ်တသ့ဘၣ်” န့ၣ်လီၤ.

အဲး ဒီး လီၣ်နၢၣ်တဖၣ် အတၢ်ကတိၤအပူၤ, တၢ်ယူးယီၣ်ပၥ်ဒိၣ်ယွၤန့ၣ် မ့ၢ်နနၢ်ဟူဘၣ်ဧါ. ယွၤအတၢ်ကူၣ်သ့ အိၣ်ထီၣ်ထီလၢ အဝဲသ့ၣ်အတၢ်သ့ၣ်ညါအဖီခိၣ်လီၤန့ၣ် အဝဲသ့ၣ် သ့ၣ်ညါဝဲဒၣ်န့ၣ်လီၤ. ဘၣ်ဆၣ် အဲး အၢၣ်လီၤဝဲလၢ, “တဘၣ်ကိၢ်တၢ်လၢခဲမုၢ်ဂီၤအဂီၢ် တဂ့ၤန့ၣ် ကဲထီၣ်ညီညီတသ့ဘၣ်န့ၣ် ယထံၣ်န့ၢ်လံ” န့ၣ်လီၤ. တၢ်ဆါအံၤ ကမၤဆံးလီၤ စှၤလီၤအါထီၣ် အတၢ်ဟူးဂဲၤဖံးမၤတၢ်န့ၣ် အဲး နၢ်ပၢၢ်ဝဲဒၣ်, ဒီးဆူညါတနံၤ, တၢ်ဂ့ၢ်ကီအသီ မနုၤတဖၣ် ကမၤအသးလဲၣ်န့ၣ် တသ့ၣ်ညါဝဲဘၣ်န့ၣ်လီၤ.

ဒ်သိးကကဲထီၣ်တၢ်မၤစၢၤလၢ ခ့ခါအတူၢ်ဘၣ်ခီၣ်ဘၣ်တၢ်တဖၣ်အဂီၢ်, အဲး ပၥ်ဃၥ်လံၥ်စီဆှံအဆၢ ဧ့ၤဘြံၤ ၁၃:၅-၆, လၢအသိလ့ၣ်, လၢတၢ်လုၣ်ထံဒၢးအမဲၥ်ထံကလၤလိၤႇ ဒီးလၢအလီၢ်မံကပၤန့ၣ်လီၤ. “အဂ့ၢ်ဒ်အံၤႇ တၢ်စံးဝဲဒၣ်, ယတညိကွံၥ်ဘၣ်နၤ, ယတလဲၤသဒၣ်ဘၣ်နၤဘၣ်. မၤသးဒ်န့ၣ်ဒီး ပကစံးလၢပသးခူတလ့ၢ်, ယွၤမ့ၢ်ၦၤမၤစၢၤယၤႇ ဒီးဖဲဒၣ် ၦၤကညီကမၤဘၣ်ယၤန့ၣ်, ယတပျံၤဘၣ်.” ဖဲအသးဘၣ်ယိၣ်ဘၣ်ဘီတၢ် တဘျီလၢ်လၢ်န့ၣ်, အဝဲရူးဖးလံၥ်စီဆှံအဆၢအံၤ တဘျီဝံၤတဘျီ ဒ်သိးကနဲၣ်ဆှၢက့ၤ အတၢ်ဆိကမိၣ် ဆူတၢ်မ့ၢ်တၢ်တီအဂီၢ်န့ၣ်လီၤ.

ခဲဂီၤတနံၤန့ၣ် တၢ်ကမၤအသးမနုၤတမံၤလဲၣ်န့ၣ် ပှၤတသ့ၣ်ညါနီၤတဂၤဘၣ်န့ၣ်လီၤ. ပကဃၣ်တရံးပတၢ်ဘၣ်ယိၣ်ဘၣ်ဘီတဖၣ် ဆူတၢ်ခွဲးယၥ်လၢပကအိၣ်ဒီးတၢ်စူၢ်တၢ်နၥ်အဂီၢ်, ဘၣ်သ့ၣ်သ့ၣ် အဲး အတၢ်အိၣ်မူဂဲၤလိန့ၣ် ကဲထီၣ်တၢ်မၤစၢၤသ့ဝဲဒၣ်န့ၣ်လီၤ.